By DONNA RABANG PETA
www.nordis.net

VINTAR, Ilocos Norte — Indauloan ni Hon. Mayor Jose Foronda ken Vice Mayor Ferdinand Mabanag ti Caravan dagiti amin a kameng ti LGU iti Vintar, Ilocos Norte kontra iti panagminas a nagturong kadagiti kabambantayan aglalo kadagiti maapektaran ken addaan ti aplikasyon ti panagminas iti nasao nga ili.

Karaman iti daytoy a caravan dagiti amin a kameng ti Sangguniang Bayan, amin nga LGU Department heads, sumagmamano a media, kameng ti simbaan, NGO ken ti PSALM-IN (Peoples Solidarity Against Large Scale and Destructive Mining in Ilocos Norte). Naisayangkat ti NO TO MINING Caravan idi February 3 ken idi February 16 kadagiti barangay kas iti Canaam, Cabangaran, Isic Isic ken Cabayo.

Ditoy a Caravan, natalantan dagiti nakaro ken makadadael nga epekto ti panagminas. Aktibo nga inatendaran ti umili manipud kadagitoy a luglugar ti forum kabayatan ti caravan ken ditoy da nga impeksa ti takder da a NO TO MINING IN VINTAR! “Agkikibin tayo a mangsalaknib iti aglaw-law ken ti lubong a paggargarawan tayo. Dagiti amin a kameng ti konseho ket saan mi pulos nga ipalubos ti panagminas iti ili tayo a Vintar!,” kinuna ni Sangguniang Bayan Cherry Agtang-Reyes

Inlawlawag ni Mayor Foronda a dagiti amin a Municipal official ket saan a pabaybayadan kas kadagiti sayangguseng iti napalabas nga aldaw. “Napinget ti takder mi nga opisyal ti Vintar a NO TO MINING kami,” inyebkas ni Mayor Foronda iti bitla na.

Sakbay iti daytoy a Caravan, idi February 2 ket naisayangkat ti maysa a Prayer Vigil iti sango ti simbaan ti Saint Nicolas de Tolentino nga inatendaran dagiti umili. Addaan daytoy ti tema a “A Burning Passion to Save Mother Earth.”

Paset iti daytoy a vigil ket naiyaramid ti prosisyon ken candle lighting kadagiti kalsada iti sentro ti Vintar. Nadumaduma a pabuya ti naiparang iti daytoy a Vigil kas iti daniw , video ken slide presentation, sala ken dadduma pay.

Ditoy met nga imbingay ni Msgr. Ian Rabago ti kaipapanan ti kinapateg ti panagkaykaysa ti umili ken simbaan tapno saluadan ti lubong a nakaiparsuan. Sakbay a naileppas ti Prayer Vigil, naikkan ti maysa a tribute wenno pananglagip kadagiti amin a biktima ti didigra karaman ditoy ti didigra nga impaay ti panagminas.

Inted ti PSALM-IN ti maysa a “pledge of commitment” kas basaran ti tuloytuloy a panangsaluad dagiti taga-Vintar iti ili da.

Linaon daytoy a komitment ti – “Ikarik a saluadak ken taripatoen ti aglawlaw. Mamatiak a ti kinabaknang ti alawlaw ket isu iti insagot ti diyos iti tao a temporaryo a pagnaedan isu a kasapulan ngarud a mataripato ken salakniban para iti sumarsaruno a kapututan. Makikaykaysaak iti padak a tao ken kailiak tapno itandudo ti kinabaknang ti aglawlaw ken ili tayo. Kas umili iti Vintar, ipaganetget mi daytoy a komitment mi… Ili mi a Vintar aywanan daka!”

Gapu ta napinget ti tignayan dagiti Vintarinians kontra iti panagminas iti lugar da, idi February 15, 2012 inaprobaran dagiti upisyales da ti maysa a municipal resolution a nainget a mangiparparit ti aniaman a panagminas ken gandat a mineral reservation iti masakupan iti intero a Vintar. Maysa a linaon daytoy a resolusyon a ti epekto ti panagminas iti lugar da ket mangdadael iti Vintar River Watershed nga isu ti maysa a kangrunaan a watershed iti Region I a mangsupsuplay ti danum a mainum kadagiti residente iti syudad ti Laoag ken Bacarra ken paggapuan iti irigasyon a mangpasayak ti Laoag City, Vintar, Bacarra ken Pasuquin. # nordis.net