Ni BRENDA S. DACPANO
www.nordis.net

Aniaman ti awag ditoy…. sinalab (grilled), sinugba iti Cebuano, inasal iti Hiligaynon ken tinuno iti Ilokano ket saan a maawan a pagsasanguan iti Paskua ken Baro a Tawen.

Nalaka laeng ti agtuno – pabeggangen ti uging, pabaraen ti parilya, ikabilen ti ituno. Pinaka-simple a timpla ti asin ken paminta para kadagiti ikan/lames ken karne.

No agtuno ti ikan wenno lames, timplaan daytoy ti asin ken paminta. Mabalin met a paseksekan ti buksit ti lames iti kamatis, sibuyas ken laya. Tapno naramraman, bayat a maituntuno daytoy, pulagidan ti garlic oil (kitaen ti resipi). Kadawyan a maituno iti 3 agingga 4 a minutos iti tunggal bangir.

Panagaramid ti garlic oil: ipapudot ti maysa tasa a mantika (olive, canola, corn, vegetable) iti pariok wenno napuskol a kaserola. No napudoten, ipisok ti napitpit a maysa nga ulo a bawang. Pakapsoten ti apuy ti dalikan tapno saan a makset ti bawang. Patayen ti apuy kalpasan ti dua a minuto. Pabaawan. Mabalinen nga ipunas (babaen iti barbecue brush) iti ituntuno.

Kas ti panagtuno iti ikan, masapul nga husto ti timpla ti karne sakbay nga ituno. Warakiwakan ti asin ken paminta ti karne. Naim-imas no maiyuper iti 30 minutos wenno nabaybayag pay sakbay nga ituno. Ti tunggal 300 gramo a karne ti baka ken agarup 2 pulgada kapuskol, iluto iti 2 a minutos iti agsumbangir para iti pannakaluto a rare; 4 a minutos iti tunggal bangir para iti medium rare; 8 a minutos tunggal bangir para iti medium (pink ti kolor na iti tengnga no maiwa); ken 16 minutos iti agsumbangir iti well done. Kaluban ti tinuno ken bay-an nga aginana iti kaguddua iti oras ti pannakaluto daytoy, kas pagarigan, iti pannakaluto a medium a 8 a minutos, paginanaen ti tinuno iti 4 a minutos sakbay nga iwaen. No saan nga aramiden daytoy ken iwaen ti tinuno a saan a nakainana, agayus ti natural a tubbog daytoy ken agbalin a namaga ken natangken ti tinuno a karne.

Nalatak a sawsawan ti tinuno ti bugguong ken kalamansi nangruna para iti tinuno nga ikan. Naimas met ‘tay maaw-awagan a KBL (kamatis, bugguong ken lasona).

Para iti sawsawan ti barbecue a karne, naimas a paglaoken dagiti sumaganad a ramen: suka, asin, asukar, paminta, tinadtad a pipino (naikkat ti bukel) wenno tinadtad nga ungkay ti celery, lasona wenno sibuyas ken sili.

Para kadagiti tinuno a seafoods, natnateng ken uray karne, adtoy ti naimas a sawsawan:

Mustard dip: paglaoken dagiti ½ tasa a sour cream, ½ tasa a plain yogurt, 1 kutsara a tinadtad a parsley, 1 kutsara a tinadtad a sibuyas, 1 kutsarita a tinadtad a bawang, 1 kutsara a Dijon mustard, asin ken paminta a pangtimpla.

Garlic mayo: paglaoken dagiti vegetable/canola oil, tinadtad a bawang, tubbog ti maysa a lemon, mayonnaise, asin ken paminta.

Gremalata (salsa verde): paglaoken dagiti bulong ti parsley a tinadtad, tubbog ti maysa a lemon, tinadtad a bawang, olive/canola/corn oil, asin ken paminta.

Enjoy grilling, eating and bonding! Mamagwayawaya a Paskua kadakayo amin! # nordis.net