Makan a la Pinoy: Lames a tinudok ti baraniw

December 11, 2011 in Featured, food by editors

Ni BRENDA S. DACPANO
www.nordis.net

Cream dory a lames ti inusar ko ditoy ken tzatziki dip (Greek yogurt dip) ti inaramid ko a sawsawan. Mabalin nga usaren ditoy ti giniling a karne ti baboy wenno manok. Uray ania a klase ti lames/ikan ket mabalin nga usaren ditoy, nasken laeng nga ikkaten dagiti siit na.

Photo ni Brenda S. Dcpano

Ramen:

1 kilo a cream dory fillet, tinadtad
1 ½ tasa a bread crumbs
1 kutsara a tinadtad a wansoy/cilantro
2 ngipen a bawang, tinadtad
1 sibuyas, tinadtad
Asin ken paminta a pangtimpla
2 itlog
2 tasa nga arina
10 ungkay ti baraniw (lemon grass)
Mantika a pangprito (deep frying)

Preparasyon:

1. Tadtaden dagiti ramen: lames, wansoy, bawang ken sibuyas. (Agusar ti food processor no adda.)

2. Paglaoken ti giniling/tinadtad a lames, sibuyas, bawang, wansoy, asin ken paminta. Ilaok met ti 1 nga itlog ngem ibati ti maysa para iti egg wash. Ilaok ti kaguddua tasa a bread crumbs ngem ibati ti maysa a tasa para iti breading/crust.

3. Bugguan, paik-ikan ken puteden ti barniw iti agarup 4 a pulgada manipud iti puon. Narnaren ti puon ti baraniw tapno rumuar ti banglo daytoy intono maluto.

4. Mangbukel ti sangakutsara wenno dakdakkel bassit a fish mixture, pekkelen ken itudok ditoy ti baraniw. Aramiden a kasla lollipop wenno popsicle. Uliten daytoy aginggana maporma ken matudok amin.

5. Ibukbok ti bread crumbs iti pinggan. Batilen ti maysa nga itlog ken ikabil iti maysa pay a pinggan. Iti sabali a pinggan, ikabil ti arina. Usaren dagitoy a pangideppelan ti fish lollipop. Ideppel ti lollipop iti arina ken ideppel iti binatil nga itlog santo ipatulid iti bread crumbs.

6. Ipapudot ti mantika iti pariok. Ditoy nga iprito dagiti lames a tinudok ti baraniw ken naideppel iti breading.

7. Idasar a napudot a kakuyog ti sawsawan a sweet-sour sauce, soy sauce a naperresan ti kalamansi wenno tzatziki dip. (Kitaen ti resipe iti Nordis October 9, 2011 wenno ditoy a link http://www.nordis.net/?p=10724). # nordis.net