Ni BRENDA S. DACPANO
www.nordis.net

Adobo ti maysa a nalatak a putahe ken pakabigbigan ti Pilipinas. Ti adobo ket manipud iti sao nga Espanyol a ti kayat na a sawen ket marinade wenno karne/seafood a naiyuper iti sarsa nga addaan suka ken bawang. Ngem ti husto nga awag kadaytoy a putahe ket saanen a naamuan ta sinukatan dagiti Espanyol iti adobo.

Pinadas ti pamiliak a nangrabii iti maysa a restaurant iti uneg ti mall iti Baguio. Simrek kami iti Adobo Connection. Segun iti adda iti menu daytoy, “adobo connects us all.” Agpayso kadi daytoy?

Adu ti adobo nga adda iti menu. Adda ti mestizang adobo, karne ti baboy a nailuto iti suka ken spices. Adda met ti adobo sa gata (adobo a manok a nagettaan), mama’s adobo (slow cooked chicken), adobo nga ikan ken tofu, ken dadduma pay nga inadobo. Ngem talaga met nga slow cooked ti adobo, daytoy ti mangpananam iti adobo — naiyuper iti suka, soy sauce ken bawang ken innayad a maiyanger iti nakauperan na aginggana lumukneng (karne ti baboy man wenno manok).

Nagorderak ti Fil-Ko fried chicken. (Fil para iti Filipino ken Ko para iti Korean.) Ngem idi dinamag ko iti waitress, ti manok ket naiyuper kano iti teriyaki sauce. Isu a kinuna ti maysa nga anak ko a Fil-Ja ngarud koma ti title na, Ja para iti Japanese, saan a Fil-Ko. “Pangit,” kuna met ti maysa pay nga anak ko, “maymayat ti Ja-Fil.” Immanayen daytoy a nagkakatawaan mi.

Inorder ko a kas side dish ti poqui-poqui, naimas met ngem asin ti intimpla da, saan a bugguong a kas iti orihinal a luto ti Ilokano a poqui-poqui a naigisa iti bugguong, kamatis ken sibuyas.

Inorder diay anak ko ti sisig. Mabalbalinen ti sisig da, timplang adobo ken adda met pasurot na a pangperres a kalamansi ngem adu unay ti sibuyas na ken nagbassit ti maysa a platter order. Mano a kakutsaraan ngata diay single order da?

Pinadas met ni lakay ‘tay adobo sa gata. “Mabalbalin metten,” kinuna na.

Leche flan koma ti kayat mi a dessert ngem naibus kano isu a blueberry cheesecake ti inorder mi. Nadagsen unay ti cheesecake, kasla gatas ti inusar da, saan a cream cheese.

Saanak a nakakonek iti adobo iti daytoy a pannangan mi. Ngem agpayso ti naisurat iti menu da, “home is where the adobo is.” # nordis.net