Makan a la Pinoy: Pinasengngawan a tilapia
< 1 MIN READ
By BRENDA S. DACPANO
40 gramo a laya
1 kilo a tilapia (4-5 a pidaso)
1/4 tasa a digo ti nateng
4 a bulong ti sibuyas
1/2 tasa a cilantro wenno kinchay
1 pidaso a carrots
1/3 tasa a soy sauce
1 kutsarita a sesame oil wenno vegetable oil
Mabalin nga usaren ditoy ti karpa, tuna fillet wenno labahita
Preparasyon:
1. Ukisan ti laya ken iwaen iti naingpis ken paatiddog.
2. Siksikan ti tilapia, ikkaten ti bagis ken asang na. Iwaen iti narabaw ti agsumbangir ti tilapia iti mamitlo a pa-diagonal. Ikabil ti tunggal tilapia iti aluminum foil. Parabawan ti laya ken ibukbok ti guddua ti digo ti nateng. Iselyo ti aluminum foil.
3. Ikabil dagiti lames nga adda iti foil iti pagpasengngawan, kaluban. Pasengngawan iti 30 minutos wenno agingga maluto.
4. Lukatan ti foil ken iyalis ti lames iti plato. Parabawan ti naiwa a bulong ti sibuyas, carrots ken cilantro. Ibukbok ti nabati a digo ti nateng, soy sauce ken sesame oil. Idasar kakuyog ti napasengngawan a broccoli, pechay, bokchoy wenno wombok.
Digo ti nateng (vegetable stock)
Ipaburek iti 2 tasa a danum iti agarup 30 minutos dagiti naiwa a nateng: 1 carrot, 2 nga ungkay ti celery, 2 ngipen a bawang ken sibuyas. Timplaan iti asin ken paminta. Adawen ken sagaten.#
