www.nordis.net

Ni ABRA HUMAN RIGHTS ADVOCATES

Septiyembre 21, aldaw a panaglagip iti pannaka –ideklara ti Martial Law nasurok a 30 a tawenen ti napalabas. Rumbeng laeng a saludwan dagiti banwar a nagidaton iti biag da idi panawen ti ML ni Marcos ta uray iti tengnga ti nadangkok a rehimen ket situtured da a timmakder a nangirupir ti kalintegan tao nangruna ti marigrigat nga umili.

Awan ti siasinoman a tao iti lubong a saan a mangkayat iti kappia. Kinapudno na, ti tarigagay ti tao ket maaddaan iti naan-anay ken pudpudno a kappia iti intero a biagna ken kagimongan, ngem ti agdama a kasasaad ken sistema ti pagilian a pakairamanan ti probinsya tayo nga Abra ket agtaltalinaed dagiti linteg, polpolisiya ken programa nga interes dagiti imperyalista a pagillian a mangdomdominar kadagiti nakurapay a pagillian kas koma ti Pilipinas. Iti daytoy a kasasaad, kumarkaro ti kinarigat wenno krisis ekonomya ken pulitika kairamanan ti kultura tayo. Nu rinibu ti mabisbisinan, no rinibu ti awanan makan ken agrigrigat nga umili a Pilipino ken awanan ti trabaho! Sadino ken ayan ti kappia kakaillian?

Makapasinna-ay ti maika-39 a tawen ti MARTIAL LAW, imbes nga adalen ken amirisen dagiti nagbalin a kapadasan ken ad-adal dagiti dadduma a nasyon ken grupo a nangitantandudo ti tignayan para ti karbengan tao ditoy pagillian, nagbalin a ramrambak ken programa a mangsalinong ken mangsalinged ti pudno nga esensya ti pananggun-od ti kappia.

Indeklara ni Presidente Ferdinand Marcos ti Martial Law wenno Presidential Decree 1081 a naminpinsan nga nangikkat iti karbengan dagiti amin nga umili nga agbiag, agsao ken agtignay para iti inaldaw-aldaw a panagbiag da. Pinagbalin da nga subersibo dagiti umili nga mangkonkondenar iti madi nga aramid ti gobyerno. Napalalo iti kinaranggas nga inaramid iti soldado kadagiti umili iti panawen ti operasyon, nangruna unay iti kaaw-awayan, saan met a nakalasat dagiti umili nga agnanaed iti sentro ken siyudad, adu ti pinapatay, rinames da nga babbai, tiniliw ken inbalud da nga awanan basol kas kadagiti pampulitikal nga balud ken saan nga panangrespeto kadagiti socio-politikal ken kultura dagiti nainsigudan nga umili.

Iti panawen daytoy nga linteg, naawan ken naipaidam kadatayo iti wayawaya ken demokrasya. Nu man pay kasta iti napasamak, saan nga nagpatingga iti umili a nagtignay tapnu labanan ken gibusan daytoy a kinadangkok isu a napasamak iti EDSA 1 ket isu met iti panagtugaw ni US Aquino Uno (Cory) a rehimen. Daytoy a panawen, saan nga nagbaliw ti kasasaad nu di ket nagtalinaed latta dagiti nadangkok a patakaran, linteg ken programa kas iti napasamak iti Mendiola Massacre idi October 21, 1987 a nakatayan dagiti pesante a nagrally para iti pudno a reporma ti daga.

Iti agdama nga administrasyon ni Presidente Noynoy Aquino 2, Tuloy-tuloy latta dagiti pammapatay, panangtiliw, panangibalud kadagiti lideres ken miyembro dagiti demokratiko nga organisasyon nga mangilablaban iti husto a kalintegan ken karbengan dagiti umili a marigrigat ken maidaddadanes. nasaknap latta ken grabe a kinarigat, kinaranggas ken pananglabsing iti karbengan tao ken pannakaidadanes iti nalawa nga umili ditoy pagilyan tayo kairamanan ti probinsya tayo nga Abra gapu iti nasagedsed ken tuloy-tuloy nga operasyon militar iti kaawawayan babaen iti baro nga Oplan Bayanihan ti AFP ken iti gobyerno ni P-Noy. Ditoy probinsya addaan ti maysa brigade a pormasyon iti AFP, ti 503rd IB PA nga bukbuklen iti 41st IB PA, 50th IB PA, Div. Recon Company ti 5th ID, 77th C Coy a Cadre Bn ti CAA – CAFGU, light armored Coy ken dadduma pay. Kalaksidan iti AFP adda ditoy ti RMG iti PNP, SAF ken PMG.Dagitoy a pormasyon iti AFP ket Makita a no sadino ti ayan ti adu adu wenno nasedsed nga aplikasyon ti minas ket isu met ti nakaibukbukan ti adu nga deployment ti soldado.

Tisumagmamano a pananglabsing iti karbengan tao iti panawen ti implementasyon ti Oplan Bayanihan iti probinsya tayo nga Abra a pakakitaan iti tuloy-tuloy a kinadamsak ken panangrames kadagiti karbengan tao ditoy lugar tayo: 3 nga kababaihan a nasikugan, adda maysa (1) a narames iti panawen ti panagkampo da iti sirok ti balbalay iti barrio, agpammarang da nga NPA tapno agsurveillance da iti sibilyan, maysa daytoy a buya ti (harassment) a pasamak iti Ud-uddiao Sallapadan; tiniliw dagiti kameng ti 41st IB ken 50th IB ni Sayan Makayba iti Baclingayan, Tubo gapu ta pinagsuspetsaan da nga NPA ken nagoperasyon da iti aglawlaw ti komunidad a saan da nga agpakpakita ken nagpakaammo kadagiti umili isu’t gapu nga maamak dagiti umili a mapan agtrabaho kadagiti uma ken talon da.

Kalaksidan iti kaawawayan, idi Agosto 9, Aldaw dagiti Nainsigudan nga Umili, adda Forum ti kakailian salakniban tay amin a nagtaudan (KASTAN) idiay ASIST Bangued campus, nga adda ti nasurok a 3 nga civilian intel, malaksid pay ti agarup maysa nga squad nga regular military nga adda iti ruar na daytoy ket maysa a pananglabsing a pakabuyaan iti harassment, maysa pay ket iti iyuumay da panag-surveilance iti mismo nga opisina idi Aug 8 ti maysa nga Sgt. Sabater a nangiyam- ammo ti bagi na a kas kameng ti 41st IB..

Inggana nga saan a maikkat ti nakaru na panangidadanes ken kurapsyon, Immoralidad, kinapasista ken kinaawan ti pudno a reporma ti daga, agrikultura ken naan-anay nga nailian nga indutriyalisasyon ken pudno nga sakit ti gimong a Pilipino saan tayo a maaprusan ti kappia, nailian a wayawaya ken demokrasya. ngarud Kasapulan nga gun-oden iti kappia saan a bendita a matinnag ket mapidot laeng. Dumalan ti nairteng a panakidangadang para ti panangragpat ti pudno nga wayawaya, hustisya ken kappia.

Inggana a nailatang ken maserbi a maeprenta ken mailako dagiti natural a rekurso tayo kadagiti babaknang a kompanya ken pagillian, distansyaan datayo ti tarigagay tayo a kappia, inggana nga adda gagem tayo a agpadominar, mangkontrol ti bileg pampulitika babaen ti warlordismo ket panawan datayo ti kappia. Inggana nga mausar ken pausar dagiti armado ti pagillian para kadagiti interest dagiti babaknang ken sumagmamano nga agtuturay nalidem a masirip ti kappia!

Iti kastoy a kasasaad, ti panagtignay ti umili laeng ti manamnama a solusyon ngem ti isango dagiti agturturay ket ti kinaranggas. San man nga ideklara ti Martial Rule, Emergency Rule ken dadduma pay nga awag kadaytoy ket agtultuloy latta nga awanan waya ken gaway ti umili nga mangiyebkas kadagiti problema a sangsangoen na.

Tumakder tayo a marigrigat ken maidadanes, saan tayo nga agbuteng a mangirupir iti kalintegan tao ken umili!

Ilaban tayo ti pudpudno a wayawaya ken demokrasya!
Isardeng ti oplan bayanihan tapno adda gundaway ti kappia!
Isardeng ti pampulitikal a pammapatay!
Isardeng ti warlordismo! # nordis.net