June 16, 2013 in Featured, food
Ni BRENDA S. DACPANO
www.nordis.net
Daytoy sabonganay ken rabong a lumpia ket linaokak ti ikan a cream dory ngem mabalin nga usaren ditoy ti giniling a karne ti baka, baboy wenno manok. Mabalin met nga usaren ti dadduma pay a klase ti ikan wenno lames (tilapia, bangus, paltat, tuna, kdpy.) ngem isiitan.
Lumpia a sabonganay ken rabong. Photo by Brenda S. Dacpano
June 9, 2013 in Featured, food
Ni BRENDA S. DACPANO
www.nordis.net
Idi naminsan nga aldaw nagbirokkami ken ni lakay ken anak ko ti panganan nga addaan parkingan ken napardas a serbisyo. Nalagipmi ti kanayon a malablabsan a restaurant iti Legarda Road iti Syudad ti Baguio. Kinunak a red meat sa met ti kangrunaan a putaheda ditoy ngem padasenmi ah, maminsan iti makatawen met laeng ti anibersaryomi ken ni lakay. Addan mano a bulan nga inikkatmi ti redmeat dietmi idiay balay ta nagadu metten ti marikrikna a saksakit.
Route 55 burger. A half pound classic beef burger. Photo by Brenda S. Dacpano
Naimas ti grilled ribs nga addaan barbecue glaze, addaan ayamuom ken raman a tinuno ken nalukneng. Ngem naim-imas pay koma no na-caramelize ti rabawna. Read the rest of this entry →
May 19, 2013 in Featured, food
Ni BRENDA S. DACPANO
www.nordis.net
Pipian, maysa a tradisyunal a resipi ti Vigan a gagangay a kanen a kas merienda ngem mabalin met nga ipangan iti innapuy. Nalabit nga impluwensya ti Mexican pipian manipud iti galleon trade idi umuna a panawen. Ti kangrunaan a ramen ti Mexican pipian sauce ket giniling a bukel ti karabasa, kamatis, chiles ken herbs. Mabalin nga usaren ditoy ti karne ti baka/baboy imbes a manok.
Ramen:
2 kutsara a mantika
1 sibuyas
4 a ngipen a bawang
1 bukel a manok, naiwa iti serving size
2 kutsara a patis
Asin ken paminta a pangtimpla
½ tasa nga asuete, naiyuper iti 2 tasa a napudot a danum
4 a tasa a chicken broth
½ tasa a tostado a bagas, giniling Read the rest of this entry →
May 11, 2013 in Featured, food
Ni BRENDA S. DACPANO
www.nordis.net
Pinakbet ti paborito ni Cong. Teddy Casiño ken ti adu nga agbasbasa daytoy a diaryo. Luto dagiti Ilokano, gagangay ken nanumo a makan ngem kayat ti kaaduan isu nga inadaptaren dagiti nadumaduma a probinsya/rehiyon iti pagilian ken nagtauden ti nadumaduma a bersyon. Kunada a pinakbet Tagalog no ginisa iti karne ti baboy, natimplaan ti bugguong nga aramang ken nalaokan ti utong ken karabasa. Adda met ti ginettaan a bersyon kano ti Bicol. Uray ti bersyon ti Ilokano ket adu ngem ti kasimplean ti iluto tayo itatta.
Ramen:
¼ kilo a kamatis
Sanga-tangan a laya
Lasona
¼ kilo a paria bonito
4 a sili a berde (optional)
¼ kilo a tarong, naganos
Pasayan wenno bagnet
3 kutsara a bugguong a munamon Read the rest of this entry →
April 21, 2013 in Featured, food
Ni BRENDA S. DACPANO
www.nordis.net
Popular a luto ti Ilokano ti igado. Adu ti bersyon daytoy, adda ti natimplaan ti soy sauce, nalaukan ti adu a carrots ken patatas.
Ramen:
½ kilo a lomo/karne ti baboy
¼ kilo a dalem ti baboy
½ kilo a bagis ti baboy (small intestines)
3 pidaso a patatas (optional)
1 carrot, naiwa iti paatiddog
1 tasa a green peas
1 dakkel a bell pepper, nalabaga, naiwa iti paatiddog
1 ngipen a bawang, naiwa iti pino
1 sibuyas, naiwa iti pino
Asin ken paminta a pangtimpla
1 kutsarita nga asukar
4 kutsara a sukang Iloco
2 tasa a danum
Mantika a panggisa Read the rest of this entry →
April 7, 2013 in Featured, food
Ni BRENDA S. DACPANO
www.nordis.net
Ramen ti pork roll:
Lomo (tenderloin) wenno chicken breast
1 carrot, ginadgad
1 Sibuyas, ginadgad
1 ngipen a bawang, ginadgad
Keso, ginadgad
Asin ken paminta a pangtimpla
4 kutsara a mantika
PORK ROLL. Photo ni Brenda S. Dacpano
60 gramo a butter
1/3 tasa nga arina
4 tasa a gatas
60 gramo keso (parmesan), ginadgad
Sangapirit nga asin
Sangapirit a nutmeg powder (optional) Read the rest of this entry →
March 24, 2013 in Cordillera, Featured, food
By KATHLEEN T. OKUBO with reports from FELY TICBAEN
www.nordis.net
BAGUIO CITY — Presented on a 10 inch plate-like basket, woven from a local vine called nito that grows in what is now left of our depleted wild forests, lined with a cut-in-shape and length piece of fresh banana frond; that breakfast serving was a most inviting mix of natural earth colors.
JOIN THE SUNSHINE. Everyone seems to have left home to have breakfast in the Park, meet and make friends; above a young girl with her brother and uncle shared a table in the park to partake of the Dukto tan Duting , the Benguet Igorot breakfast with pickles, strawberries and yugort served at the on-going Strawberry Festival of La Trinidad. Photo by Kathleen T. Okubo
That breakfast did well to rally support, open and fire up the Strawberry Festival’s fun run that day. Looking at it, that tummy filling and appetite whetting plate-full truly represented the envisioned purposes of the town’s Strawberry Festival that was organized sixteen years ago and continues to successfully run a productive and entertaining town-bonding fiesta.
As La Trinidad Mayor Gregorio T. Abalos, Jr. said, “the Festival has effectively solidified the concerted efforts of the farmers, the business sector, the people and the municipal government to place the municipality on the map as the Strawbery Capital of the Philippines.”
He reported that the annual festival has also generated a yearly increase in tourist arrivals – both local and foreign.
The festival continues to promote worthy programs that encourages organic farming, local produce marketing through the organized initiatives of its people’s and their interpretation of the one town one product (otop) program without giving up traditional values of “sowing seeds of friendship”, preserving the traditional livelihood and continued practice of time-tested healthy farming systems, and promotion of good cultural practices.
That one plate-full-of-a breakfast presented traditional foods and recipes that is so telling of the community behind a growing and developing town that continues to preserve their cultural identity and keep to the good traditions.
Neat and colorfully presented in that plate made from natural materials were: clean-sliced wedges of different kinds of plain boiled camote – the violet, yellow, orange, white or gray dukto in a small bunch with a generous portion of yogurt and strawberry dip; a halfed-in-two hard boiled (organically produced) chicken egg – its yolk so orange in the middle of a very eggwhite; a healthy portion of demshang slivers of kindot – woodfire broiled fresh pork; several large pieces of very red, so-luscious duting on organically grown lettuce bed.
All of that was introduced ahead by a soul awakening whiff off the fresh brew, steaming hot (organically grown) Benguet arabica coffee that accompanied that hefty, healthy, mouth watering, modern day Benguet Igorot breakfast locally named Duting tan Dukto on strawberry festival menu for breakfast in the park by the national highway, with the mayor serenading in the background. “Bon apetit, ga pangan kitejo!”
The strawberry festival program of activities runs on until April 5, when it ends in the closing ceremony. # nordis.net
March 3, 2013 in Featured, food
By BRENDA S. DACPANO
www.nordis.net
Naaddaanak ti gundaway a mapan iti Mindanao kas paset ti trabaho ken pambar metten nga agpasiar ken agbirok kadagiti makmakan a saan a kadawyan a maramramanan iti amianan.
DURIAN. Photo by Brenda S. Dacpano
Iti sumaruno nga aldaw, nangrabii kami met idiay B-walk iti Marbel, Koronadal City. Saan a kas idiay Gensan, ditoy ket bassit ti taraon a naggapu iti baybay ngem adda met ti indasar da a guso seaweeds. Nakersang daytoy a klase ti seaweeds isu a mayat a linaokanda ti nagalip a pinya tapno lumammuyot bassit daytoy. Nagpaluto kami ti sinigang a kappo, tinuno a liempo ken paltat. Nag-dessert kami ti durian ken mangosteen.
PANGA SINUGBA. Photo by Brenda S.. Dacpano
Gapu ta nairana met nga agtudtudo idi nagpanggep kami nga agpasiar idiay Lake Sebu, nagsubli kami laengen idiay Gensan ken nagpasiar idiay Gensan View Resort ket nangan kami manen ditoy ti tinuno a panga ti tuna, sinigang a tuna belly, kilawen a tuna. Syempre, gapu ta adda kami ditoy kaad-aduan ken kalaklakaan ti durian, adu a durian ti kinnanmi. Inleppasmi ti aldaw babaen iti pangrabii a tinuno manen a panga ti tuna, guso salad, sinigang a kappo, prutas a marang. Napalalo ti bussogmi! # nordis.net
February 3, 2013 in Featured, food
Ni BRENDA S. DACPANO
www.nordis.net
Daytoy ti bersyon ko iti Australian schnitzel ken Japanese tonkatsu – karne a naideppel iti maregmeg ti tinapay (breadcrumbs) ken pinirito aginggana nasarangsang. Cream dory ti inusar ko ditoy imbes a karne. Mabalin nga usaren ditoy ti dadakkel a tilapia fillet, barukong ti manok a naiwa iti naingpis wenno namalmalo aginggana umingpis wenno karne ti baboy.
DORY-NORI ROLL. Photo by Brenda S. Dacpano
1 kilo a cream dory fillet
3-4 pidaso a nori (sushi seaweeds sheets)
Keso, naiwa iti paatiddog
Breadcrumbs
2 itlog, binatil
Asin ken paminta
mantika
Preparasyon:
1. Bugguan, paik-ikan ken iwaen iti naingpis dagiti dory fillet. Puteden iti 3-4 pulgada. Timplaan iti asin ken paminta.
2. Ti kada iwa ti fillet, mangkartib ti kapadana a kaakaba ken kaatiddog a nori. Iparabaw daytoy iti fillet. Ibalkot nga irolyo ditoy ti keso. Uliten daytoy a proseso aginggana mairolyo amin a fillet.
3. Batilen dagiti itlog. Ikabil ti breadcrumbs iti pinggan.
4. Isawsaw ti narolyo a dory iti binatil nga itlog santo ipatulid iti breadcrumbs. Uliten daytoy aginggana maipatulid amin dagiti dory-nori roll iti breadcrumbs.
5. Iprito aginggana ag-brown bassit ken nasarangsang. # nordis.net
January 20, 2013 in Featured, food
Ni BRENDA S. DACPANO
www.nordis.net
Relleno wenno napaseksekan (stuffed) manipud iti Mexican cuisine. Nalabit nga inyallatiw met ditoy pagilian tayo dagiti kolonyalista nga Espanyol.
Pinaseksekan a bangus. Photo by Noel Godinez
Ramen:
1 bangus (1 kilo wenno dakdakkel pay)
1 sibuyas, tinadtad/ginadgad
1 carrot, tinadtad/ginadgad
2 patatas, tinadtad/ginadgad (optional)
½ tasa pickle relish
½ tasa gisantes
¼ – ½ tasa a pasas (optional)
2 itlog, binatil
3 itlog, nalambong
3 kutsara a soy sauce
3 kutsara a tubbog ti kalamansi wenno lemon
Asin ken paminta
Mantika
Preparasyon:
Mayat no addan sukiyo idiay tiendaan a mangaramid/mangikkat ti lasag ken sisiit ti bangus. Ikkaten ti asang ken bagis ti bangus santo malmaluen ti bagi daytoy tapno nalaka nga isina ti lasag manipud iti kudil. Iseksek ti nalap-it nga spatula wenno putan ti aklo iti naggapuan ti asang. Annadan tapno saan a mapisang ti kudil ti bangus. Iyuper ti kudil iti kalamansi ken soy sauce. Ipaigid wenno ikabil iti uneg ti refrigerator.
Pasengngawan ti naikkat a linaon ti bangus iti danum iti agarup 20 minutos tapno nalaka nga ikkaten dagiti sisiit. Pabaawan sakbay nga isiitan. Ikabil iti malukong ti naisiitan a bangus ken ilaok ditoy dagiti dadduma pay a ramen malaksid iti nalambong nga itlog. Kutsaraen nga ipaseksek daytoy iti bangus, ipaseksek iti tengnga dagiti nalambong nga itlog. Paseksekan ti bangus aginggana agsubli met laeng iti sigud a sukog daytoy.
Sapsapuan ti bangus iti mantika ken ap-apan ti baking tray iti aluminum foil a nalanitan met laeng iti manitika. Iluto iti oven iti 180oC iti agarup 20 minutos wenno agingga ag-brown ti kudil ti bangus. Mabalin met nga iprito ti bangus. Sapsapuan pay nga umuna iti arina sakbay nga iprito tapno saan a dumket iti pariok ken nalaklaka a balikiden. # nordis.net
January 13, 2013 in Featured, food
Ni BRENDA S. DACPANO
www.nordis.net
Kalpasan ti pannangan ti nadumaduma a luto ti karne idi paskua ken baro a tawen, iliwen ken mayat a pangikkat iti uma iti nalalanit a makmakan ti dinengdeng. Para kaniak awan ti makaatiw iti inabraw. Saan a mabalin a lumabas ti maysa a lawas a saanak a makaraman ti dinengdeng.
Nalaka laeng a lutuen ti dinengdeng ngem adu dagiti mangibaga a narigat nangruna no ania ti umuna nga ipisok a nateng. Ti diskartek ket no ania ti natangtangken a nateng isu ti iyun-una nga ipisok. Padasentayo ti agluto ti buridibod.
Ramen:
kamatis
sibuyas
bugguong
Patani
bagas ti kamote
karabasa
bunga ti utong
tarong
paria
parda
samsamping
bunga ti marunggay
alukon/bungon
uong
pangsagpaw: pasayan, udang, kappi wenno tinuno nga ikan/lames
Imurian dagiti natnateng. Paluknengen ti patani iti 4 tasa a danum kagiddan ti bagas ti kamote. Mabalin nga isukat iti kamote ti tugi, bagas ti aba wenno ube a puraw. Timplaan ti bugguong no naluknengen ti patani. No maisigud ti apgad iti panagpabellad ti patani ken uray ania a bukbukel, saan a lumukneng no di ket kumudiser daytoy.
Ikabil ti sibuyas ken kamatis. No tinuno wenno pinirito a lames/ikan ti usaren, isagpawen daytoy ken bay-an nga agburek iti agarup lima minutos sakbay nga adawen ti sagpaw tapno saan a maburbor. No ti isagpaw ket pasayan, agatol wenno kappi, uray ipisok itono dandanin maluto dagiti natnateng.
Ipisok ti karabasa, lutuen iti agarup tallo a minutos. Isaruno ti bunga ti utong, paria, tarong, parda ken samsamping. Bay-an nga agburek iti agarup lima a minutos. Ikabil dagiti alukon, bunga ti marunggay, uong ken sagpaw a pasayan wenno udang. Iluto iti 3-5 minutos. Adawen ken idasar a napudot kagiddan ti innapuy. # nordis.net
December 9, 2012 in Featured, food
Ni BRENDA S. DACPANO
www.nordis.net
Ti gumbo ket stew wenno lauya a napalet. Okra ti kangrunaan a ramen daytoy. Ti gumbo ket manipud iti sao ti West African a ki ngombo wenno okra. Manipud iti kumbinasyon a panagluto ti French, Spanish, African, Italian ken German nga inadaptar ti Lousiana (USA) nga opisyal a putaheda.
CHICKEN GUMBO. Photo by Brenda S. Dacpano
Padasenyo daytoy a putahe a sabali a pakausaran ti lokal a natengtayo nga okra.
Ramen:
2 kutsara a mantika
Asin ken paminta a pangtimpla
1/2 kilo a karne ti manok, naiwa
2 ngipen a bawang, tinadtad
1 ulo a sibuyas, tinadtad
2 ungkay ti celery, naiwa iti pino
1-2 bell pepper, berde/nalabaga
2 kutsara nga arina
3 tasa a naglambongan ti karne ti manok
4 a patatas, naiwa iti pakwadrado
1 carrot, naiwa a pakwadrado
1 carrot, ginadgad wenno naiproseso iti blender (optional)
1 bulong ti sibuyas, naiwa iti guddua pulgada
1 bulong ti laurel
½ kutsarita a thyme
1 sili a nagasang (optional)
6-8 okra, naiwa iti guddua pulgada
Preparasyon:
1. Timplaan ti asin ken paminta dagiti iwa ti manok. Ipapudot ti mantika iti napuskol a kaserola ken ditoy nga iluto ti manok aginggana ag-brown ti kolorna. Adawen ken ipaigid pay.
2. Iti parehas a kaserola, igisa ti sibuyas, bawang, celery ken bell pepper. No nagisan, ilaok ditoy ti arina. Kiwaren aginggana ag-brown bassit ti arina. Ibukbok ditoy ti naglambongan ti manok santo ipisok ti manok, patatas ken carrots. Ilaok dagiti dadduma pay a ramen malaksid iti okra. Kaluban ken iluto iti 30 minutos iti kalalainganna a pudot. Kiwaren sagpaminsan. Timplaan iti asin ken paminta.
3. Adawen dagiti karne ti manok ken persa-persayen santo isubli iti kaserola. Ipisok ti okra ken iluto iti 10 pay a minutos.
4. Ikkaten ti bulong ti laurel.
5. Idasar a napudot kakuyog ti innapuy. # nordis.net
November 25, 2012 in Featured, food
Ni BRENDA S. DACPANO
www.nordis.net
Manok a nailuto iti Korean hot pepper paste wenno gochujang. Daytoy ti bersyon ko iti chicken afritada a Korean inspired. No naayat ka iti nagasang ken spicy a makan, daytoy ti para kaniam.
CHICKEN GOCHUJANG. Photo by Brenda S. Dacpano
1 kilo a luppo ti manok
2 kutsara a tinadtad a laya
1 ulo a bawang, tinadtad
3 sibuyas, tinadtad
2 kutsara a soy sauce
2 kutsara a manitika
Asin ken paminta a pangtimpla
1-2 kutsara a gochujang
1-2 tasa a danum
3 kutsara a sesame seeds, tostado
Bokchoy sidedish:
½ kilo bokchoy wenno pechay
2 kutsara a sesame oil
Asin ken paminta a pangtimpla
danum
Preparasyon:
1. Bugguan ken iwaen dagiti luppo ti manok iti serving size.
2. Ukisan ken tadtaden dagiti laya, sibuyas ken bawang.
3. Iti dakkel a pariok, ipapudot ti mantika ken igisa dagiti laya, sibuyas ken bawang. Iluto iti agarup 5 minutos. Ipisok ti karne ti manok, igisa iti aginggana ag-brown bassit ti manok .
4. Timplaan iti soy sauce ken paminta. Bukbokan iti danum ken ikabil ti 1 kutsara a gochujang, no kayat yo a nagasgasang, nayunan pay ti 1 kutsara a gochujang. (Magatang ti gochujang kadagiti Korean stores.) Kiwaren ken kaluban. Ipaburek iti kalalainganna a pudot/apuy. Kiwaren sagpaminsan tapno saan a dumekket iti pariok. Nayunan ti bassit a danum no maatianan ken saan pay a limmukneng ti karne. Iluto iti agarup 30 minutos aginggana maagsep ti karne ti raman ti ramen ken no napaleten ti digo daytoy. Adawen.
5. Itosta ti sesame seeds iti sabali a pariok iti apagbiit (30 segundos). Iparabaw daytoy iti chicken gochujang.
6. Bokchoy sidedish: Iti kaserola, ipaburek ti maysa litro a danum. Asinan ti danum no nagbureken ken ipisok ti bokchoy, kaluban. Patayen a dagus ti apuy ken bay-an a malpes ti bokchoy iti lima a minutos. Adawen ken paik-ikan. Timplaan iti bassit nga asin ken paminta ken patedtedan ti sesame oil. Idasar a partner ti chicken gochujang. # nordis.net
November 18, 2012 in Featured, food
Ni BRENDA S. DACPANO
www.nordis.net
Segun iti wiki.com, ti bacon ket manipud iti Germanic, Frankish a sao a bak/bako wenno bukot, bukot ti ayup (baboy). Inadaptar ti English iti lokal a terminoda a flitch wenno sikigan ti cured hog idi maika-20 a siglo. Ti bacon ket produkto ti British Isles (Great Britain, Scotland, Wales, Ireland) wenno maar-aramid iti sabali a pagilian babaen iti wagas ti British – naipreserba a karne ti baboy, inasinan tapno agbalin a bacon. No ditoy koma ket ‘tay inasin.
Ramen:
1 kilo liempo ti baboy
Curing ingredients:
5 kutsara nga asin
¾ kutsara nga asukar a puraw
¼ kutsarita a prague powder
½ tasa diru (para iti honey-cured bacon)
Bugguan ti karne ken paik-ikan. Paglaoken dagiti curing ingredients. Isapsapo daytoy iti karne, ikabil iti cellophane bag wenno container a makaluban. Bay-an a mauper iti uneg ti refrigerator iti 5-7 nga aldaw, ngem balikiden nga inaldaw. Kalpasan ti 7 nga aldaw, bugguan. Ipaburek iti danum iti 10 a minutos tapno maikkat dagiti sobra a curing ingredients. Paik-ikan ken ipakni iti uneg ti freezer tapno tumangken. Iwaen iti naiingpis. Iprito wenno iluto iti oven. # nordis.net
October 28, 2012 in Featured, food
Ni BRENDA S. DACPANO
www.nordis.net
Umadanin ti Paskua ken baro a tawen, nalabit nga isagsaganaantayo manen dagiti taraon nga idasar iti tallaong ti pamilia ken gagayyem. Kadagitoy met laeng a panawen nga adu ti paggastuan malaksid kadagiti makmakan isu a maaramid ti amin a wagas ti panagsalimetmet tapno adda maurnong a paggatang iti pagsasanguan.
Pinya ham a naipapudot ti pariok. Photo by Brenda S. Dacpano
Iti napalabas a tawen, maysa a luppo ti baboy a walo kilos kadagsen ti inaramid ko a hamon ngem nagkurang latta ta isu met ti namsaakanmi a pinulutan. Mabalin nga aramiden a boneless wenno adda tulangna. Ngem maymayat no addaan tulang ta naimas nga ilauya.
Hamon a karne ti baboy
Ramen: 2 kilos luppo ti baboy, asin, asukar, beer, pineapple juice
Injecting solution:
¼ tasa a napudot a danum
¼ tasa nga asin
¼ tasa nga asukar a puraw
½ kutsarita prague powder/#1 pink curing salt (optional)
½ kutsarita nga ham spice (optional)
¼ tasa smoke flavor wenno 1 kutsara nga anisado wine
Rubbing mixture:
¼ tasa nga asin
¼ tasa nga asukar a brown
½ kutsarita prague powder/#1 pink curing salt (optional)
Cooking solution (iti kada kilo a karne):
1 tasa a beer
1 tasa a pinepple juice
¼ kutsarita a cloves wenno 1 kutsarita a clove buds
2 a bulong ti laurel, nagango
10 bukel a paminta
1 tasa nga asukar a brown
Preparasyon
Bugguan ti karne ken paik-ikan. Paglaoken amin a ramen ti injecting solution ken kiwaren aginggana marunaw dagiti asin ken asukar. Agusar ti heringgilia a dakkel (diay maus-usar nga injection iti baka). Itudok ti solution iti amin a paset ti karne. Paik-ikan ti karne santo isapsapo ti rubbing mixture. Bay-an a mayadi ti karne iti 3-5 nga aldaw iti uneg ti refrigerator (saan nga ikabil iti freezer), inaldaw a balikiden.
No nayadin ti karne, bugguan ken bedbedan ti kitchen twine wenno balkoten ti iket tapno saan nga agsisina ti karne bayat iti panaganger. Ipaburek iti danum iti agarup 10 a minutos tapno maikkat dagiti sobra nga asin ken kemikal. Ibelleng ti naglambongan. Ipaburek iti cooking mixture. No nagbureken iti 10 a minutos, ikabil ti asukar a brown. Iluto iti kalalainganna a pudot iti agarup 30 minutos wenno aginggana nalukneng. Adawen ken pabaawan. Ikkaten ti twine wenno iket santo balkoten iti aluminum foil ken ipakni iti refrigerator wenno freezer.
Hamon a manok
Ramen: 1 kilo a manok (naidutdotan ken naikkaten ti lalaemna), asin, asukar, beer, pineapple juice
Injecting solution:
1 tasa a napudot a danum
2 kutsara nga asin
2 kutsara nga asukar a puraw
¼ kutsarita a prague
¼ kutsarita nga smoke flavor wenno 1 kutsara nga anisado wine
½ kutsarita nga ham spice
Rubbing mixture:
2 kutsara nga asin
2 kutsara nga asukar a brown
¼ kutsarita a prague
Preparasyon
Ti cooking mixture ti hamon a manok ket agpada iti hamon a baboy. Suroten ti preparasyon iti panagaramid ti hamon a baboy.
Honey glazed pinya ham a nailuto iti oven. Photo by Brenda S. Dacpano
1 tasa ng asukar a brown
¼ kutsarita nga asin
1 kutsara a gawgaw/cornstarch
1 lata (8 ounce) a crushed pinepple, pati syrup na
¼ tasa a diro
2 kutsarita a prepared mustard
Preparasyon
Iti kaserola, paglauken amin a ramen ti glaze. Iluto iti kalalaingan na a pudot. Kiwaren aginggana agburek ken napalet. No napalet unay, nayunan ti pineapple juice wenno danum. Ipunas daytoy iti hamon.
Iluto ti hamon iti oven iti 350°F iti 30 minutos. Kalpasan ti 30 minutos, ipunas ti glaze babaen iti brush. Isubli nga iluto iti oven iti agarup 20 minutos wenno aginggana ag-caramelize ti glaze. # nordis.net
October 21, 2012 in Featured, food
Ni BRENDA S. DACPANO
www.nordis.net
Naimas nga armusar ken uray ania nga oras iti aldaw. Ipangan iti kinirog nga innapuy ken atsara a papaya wenno ginisa a natnateng. Mabalin nga usaren ditoy dagiti karne ti baka, baboy, ugsa, manok, nuang ken lames/ikan.
Ramen:
1 kilo a karne, naiwa iti naingpis
2 kutsarita nga asin
¼ kutsarita a paprika (optional)
½ kutsarita a paminta, narumek
3 kutsara a soy sauce
2 kutsara a suka wenno tubbog ti kalamansi
2 kutsara a suka
1 sibuyas, ginadgad
5 ngipen a bawang, pinitpit
2 kutsara nga asukar, brown (optional)
Preparasyon:
1. Bugguan ti karne ken paik-ikan. Iwaen iti naingpis.
2. Paglaoken amin a ramen. Ikabil iti cellophane bags ken iserra wenno sigloten Iyuper iti dua nga oras aginggana agpatnag. Balikiden sagpaminsan.
3. Mabalinen nga iprito wenno ituno.
4. Para iti namaga a tapa, ibilag aginggana namaga. # nordis.net
October 14, 2012 in Featured, food
Ni BRENDA S. DACPANO
www.nordis.net
Pad Thai wenno fried Thai style, ginisa a rice noodles, nadumaduma a nateng ken itlog a nalaokan ti tarmarind sauce. Nalatak a luto ti Thai nga inyallatiw dagiti Vietnamese iti pannakinegosyoda idiay Thailand. Immallatiw metten ditoy pagilian ken inaklon tayon a maysa kadagiti makan para iti managaliwaksay a panagraman.
PAD THAI. Photo by Brenda S. Dacpano
Ramen:
½ kilo a rice noodles (flat rice noodles)
2 kutsara a mantika
6 a bulong ti kutsay wenno bulong ti sibuyas, naiwa iti agarup ½ pulgada
4 a ngipen a bawang
1 kutsarita a laya a nakaros wenno tinadtad
1-2 itlog
1 berde a bell pepper, naiwa iti paatiddog
Carrots a naiwa iti naingpis a paatiddog (optional)
Betsuelas a naiwa iti naingpis (optional)
2 tasa a toge (mongo/bean sprout)
½ tasa a wansoy (coriander/cilantro)
½ tasa a kinirog a mani, narumek
Pad Thai sauce:
¾ kutsara a tamarind paste wenno kalangakang a salamagi
3 kutsara a soy sauce
¼ tasa a danum wenno naglambongan ti natnateng/karne
1 kutsarita chili sauce wenno segun iti kayat a timpla
3 kutsara nga asukar a brown
½ kutsarita a paminta a narumek
Preparasyon:
1. Iyuper ti noodles iti napudot a danum aginggana nalap-it ngem saan a nalammuyot unay. Paik-ikan ken ipaigid pay bayat nga isagsagana dagiti dadduma pay a ramen.
2. Paglaoken dagiti ramen ti pad thai sauce. No awan ti magatang a tamarin paste agusar ti kalangakang a bunga ti salamagi. Iyuper ti naukisan a kalangakang iti 3 kutsara a napudot a danum santo ramasen. Ikkaten dagiti bukel ti salamagi. Saan nga itimpla amin daytoy no naalsem unay. Ibalanse ti raman a naalsem, nasam-it, naapgad ken nagasang.
3. Iti dakkel a pariok, igisa dagiti sibuyas/kutsay, bawang ken laya. Inayon ti carrots ken bell pepper.
4. Ilisi dagiti ginisa a natnateng iti igid ti pariok, agnayon ti mantika no kasapulan ken ipettak iti tengnga iti pariok ti itlog. Paspasan a kiwaren. Inayon ti noodles, kiwaren. Nayonan ti danum no namaga unay ken no saan pay a naluto ti noodles agingga iti al dente wenno nalukneng ngem saan unay a nalammuyot. Ikiwar met laeng ditoy ti sauce.
5. Adawen ken parabawan ti wansoy ken kinirog a mani. # nordis.net
September 30, 2012 in Baguio City, Featured, food
Ni BRENDA S. DACPANO
www.nordis.net
Adu dagiti naintar a panganan iti Session Road, nadumaduma a pagpilian depende iti pakailiwan a makan. Itay laeng nabiit a natakuatak ti Azotea Greens nga inrekomenda ti maysa a gayyem. Naidumduma daytoy kadagiti dadduma a panganan ta vegan-friendly.
AZOTEA GREEN SALAD. Photo by Brenda S. Dacpano
Agiserserbida kadagiti organic a natnateng ken aggapgapu iti bukodda nga hardin ti dadduma. Pinadasko ti Azotea salad greens a nalaokan ti vinaigraitte, adda pagpilian a tofu mango sauce ken mustard sauce. Nagpresko dagiti nateng ken mayat ti presentasyon dagiti laokna a babassit a patatas a naipatulid iti basil pesto. Nagrinnanudmi daytoy iti kaduak a gayyemko ken ti inorder na met a potato cheese soup. Pinangbulonmi ti fruit fusion shake a papaya, saba ken laranghita.
Adda pay iti menu da ti tinuktok a tofu, tofu a nabalkot iti nori ken nailuto iti getta ti niog. Mairekomenda met a padasen ti sisig nga uong ken crispy kangkong iti tofu mango sauce. Agserserbida met ti whole day breakfast manipud iti 6:30 iti agsapa aginggana 9:00 iti rabii. # nordis.net
September 16, 2012 in Featured, food
Ni BRENDA S. DACPANO
www.nordis.net
Adda dagiti agdawdawat ti resipi no ania ti mabalin nga aramiden iti napirito nga ikan wenno lames. Maysa a karit kadagiti saan a sanay nga agluto wenno kadagiti agkurkurang iti badyet no kasano a pagbalinen a saan a makauma ken saan a paulit-ulit ti sidaen.
TILAPIA. Prito a tilapia a naparabawan ti ginasa a natnateng iti sesame oil. Photo by Brenda S. Dacpano
Mangigisa ti bawang, sibuyas ken kamatis. Timplaan ti asin, paminta ken dua pirit nga asukar. Ikiwar ditoy ti binatil a maysa wenno dua nga itlog, nayunan di kaguddua tasa a danum. Ipisok ditoy ti napirito nga ikan wenno lames. Balikiden ti ikan ken bay-an a mauper iti sarsa iti agarup lima a minutos. Adawen ken idasar a napudot.
Ginettaan
Igisa ti laya, sibuyas ken bawang santo ibukbok ditoy ti getta ti maysa a niog, maysa aginggana maysa ket kaguddua a tasa a getta. Ikabil ditoy dagiti napirito nga ikan. Pagbureken iti kalalaingan na nga apuy. Balikiden ken kaluban. Iluto aginggana agmaga bassit. Mabalin a laokan ti bulong ti marunggay wenno rabong, naganus a pakak wenno langka.
Ginisa a nateng iti sesame oil
Igisa ti bawang, sibuyas iti ¼ tasa a sesame oil. Igisa met laeng ditoy ti ubod ti niog wenno inlambong a rabong a naiwa iti naingpis ken paatiddog. Inayon ditoy ti carrots, sitsaro ken uong (uray ania a klase). Timplaan iti asin, patis wenno soy sauce ken paminta. Ibukbok iti napirito nga ikan.
Sinigang iti miso
Iti napuskol a kaserola, igisa ti laya ken sibuyas, isaruno ti miso (naimas ti Japanese wenno Korean dark miso ngem no awan ti mabirokan mabalin met ti ordinaryo a miso). Ibukbok ditoy ti nagarasawan ti bagas wenno danum, maysa agingga dua litro. Ilaok ti labanos ken sili a berde, kaluban ken pagbureken. No nagbureken, ipisok ti pinirito nga ikan (kanduli, maya-maya, talakitok, tuna, tilapia ken dadduma pay a lames wenno ikan). Itimpla ditoy ti sinigang mix wenno digo ti nagsegsegan ti salamagi a nalambong. Timplaan ti asin ken patis. Iparabaw ti bulbulong (balangeg, kamote wenno pechay). Adawen no nalpesen dagiti bulbulong. Idasar a napudot. # nordis.net
September 9, 2012 in Featured, food
Ni BRENDA S. DACPANO
www.nordis.net
Pikaw wenno aba a balang (wild taro wenno wild gabi), gagangay a nateng iti aglawlaw iti kaaw-awayan ngem adu ti mabalin a pakalutuan daytoy ken naimas. Nadumaduma a luto ti pikaw ti dawat ni Manong Jimmy Laking, kolumnista iti Baguio Midland Courier. Sapay koma ta magustuanyo met dagitoy naisagana a taraon.
DINENGDENG A PIKAW. Photo by Brenda S. Dacpano
Gagangay iti aba, adda dagiti nagatel ngem adda met dagiti saan unay. Daytoy ti gapu no apay a saan a mabalin a kanen daytoy a naata ta mabalin a makasabidong gapu iti linaon daytoy a kemikal a calcium oxalate (http://en.wikipedia.org). Maawan daytoy a kemikal no mailuto ti aba ngem uray kasta adda latta dagiti nagatel. Tapno makissayan wenno maawan ti gatel ti aba, laokan ti sangapirit a baking soda bayat iti panagluto wenno iyuper ti bagas ti aba iti nalamiis a danum iti agpatnag sakbay a lutuen. Kadawyan a nagatel iti ima ti tutot ti aba isu a nasaysayaat no agusar ti guantes wenno supotan ti ima iti cellophane sakbay nga ukisan ti aba.
Laing a pinangat
Iti paset ti Bicol, nalatak ti lutoda a laing wenno laing a pinangat. Ti nagdumaan ti laing ken laing a pinangat ket mabalkot iti bulong ti aba ti laing a pinangat ken ti laing ket simple laeng a naiwa-iwa nga ungkay, bulong ken bagas ti aba a nagettaan.
Ramen ti laing a pinangat:
1 kilo nga ungkay, bulong ken bagas ti aba
¼ kilo a giniling a baboy
¼ kilo a daing nga ikan (bacalao, labahita), naiyuper iti agpatnag ken naperpersay
½ tasa a bugguong aramang
1 sibuyas, naiwa iti napino
2 ngipen a bawang, naiwa iti napino
Sanga-tangan a laya, naiwa iti napino
1 tasa a getta ti niog (umuna a pespes)
1 ½ tasa a getta ti niog (maikadua a pespes)
20-30 a bulong ti aba
Ukisan dagiti ungkay, bagas ti aba ken iwaen iti agarup dua pulgada. Iti pariok, igisa ti laya, sibuyas, bawang ken giniling a baboy. Intono nag-brown bassit ti karne, ilaok ti naperpersay a daing. Ipisok ditoy dagiti naiw-iwa nga aba. Ibukbok ditoy ti umuna a pespes ti getta ti niog. Timplaan ti bugguong ken ilaok ti sili. Iluto aginggana agmaga. Pabaawan.
SINIGANG NA BABOY. Photo by Brenda S. Dacpano
Tinubong a sagkit
Iti paset ti Apayao, adda ti resipi da a sagkit. Mailuto iti tubong wenno linawas ti bulo dagiti naiwa-iwa nga ungkay ti pikaw. Malaokan daytoy ti sili a sairo ken no ania ti masarakan a biag iti karayan, kas ti igat, udang, ken dadduma pay. Maidadang ti tubong iti beggang wenno maiyampir iti dalikan bayat a mailinlinay ti innapuy. Kada sumagmamano a minutos, sudsudan iti kayo ti tubong ti sagkit ken naynayunan ti sili ken dadduma pay a ramen. Ilaok met ditoy ti pangtimpla a bugguong. Idiay paset ti Calanasan ken Flora ti nakaramanak ti sagkit a natimplaan ti narayok a bugguong. Kadakuada, no narayrayok ti bugguong naim-imas ti sagkit. Nailaw-an ko ti nagkammet ket apo unayen a rayok dagiti ramay ko iti maysa nga aldaw, saan a maala iti panagsabon. Agtintinubong met laeng iti pikaw ti sumagmamano idiay Ilocos Sur ngem mas nalatak ti tinubong da a diket.
Sinigang a baboy
1 kilo a kasim wenno pork ribs
½ kilo a bagas ti aba, naukisan ken naiwa iti 2 pulgada kwadrado
Bulong ti balangeng
10 utong, naiwa/naputed iti 2 pulgada
3 tarong, naiwa iti diagonal
1-2 puraw a radish
5 a sili a berde a pangsigang
Salamagi wenno sinigang mix
1 sibuyas
3-5 kamatis
Patis ken asin
Ipaburek ti karne/tultulang ti baboy kagiddan ti bagas ti aba. Timplaan ti asin. Iluto daytoy aginggana nalukneng ti karne ken nalusak ti bagas ti aba. Ipisok dagiti utong, radish ken sili. Isaruno ti tarong ken kamatis ken timplaan ti salamagi. Ipisok ti balangeg, iluto iti agarup dua a minutos. Adawen ken idasar a napudot.
Dinengdeng a pikaw
3 puon a dadakkel a pikaw
sanga-tangan a laya, napitpit
1 sibuyas, naiwa iti naingpis
bugguong a munamon
Isina ti bagas iti ungkay ti pikaw. Ukisan ti bagas ken ungkay. Iti puon ti ungkay, guyuden ti ukis na babaen iti kutsilyo aginggana iti murdong. Uliten daytoy aginggana maikkat amin ti ukis ti ungkay. Buguan dagiti aba. Puteden dagiti ungkay iti agarup 4 a pulgada santo sigit-sigiten tapno saan unay nga akaba ken nabibiit a lutuen. Iwaen met dagiti naukisan a bagas ti aba iti naingpis. Ilaok dagiti naganos a bulongna.
Ipisok ti pikaw iti banga wenno kaserola, ikkan iti sangabaso a danum. Ilaok ditoy ti sibuyas ken pinitpit a laya. Pagbureken. Mangsegseg ti bugguong a munamon. Iti bassit a malukong ikabil ti bugguong a pangtimpla. Mangala ti dua nga aklo nga agburburek a sabaw ti dinengdeng, daytoy ti pangsegseg iti bugguong. Ti sabaw daytoy ti pangtimpla iti dinengdeng. Agusar ti sagatan tapno saan a maipisok dagiti siit. Kiwaren ti dinengdeng santo kaluban. Pakapsuten ti apuy ti dalikan. Kiwaren wenno kulogen sagpaminsan tapno saan a dumket ti aba iti kaserola. Lutuen iti 20 minutos wenno aginggana lumammuyot ti aba ken maatianan bassit wenno segun iti kayat a kaadu ti sabawna. # nordis.net
Recent Comments