MAKAN A LA PINOY | Zucchini-mangga-letsugas ensalada

Ni BRENDA S. DACPANO
www.nordis.net

NO-COOK ENSALADA. Ensalada a zucchini, mangga ken letsugas a nalaokan iti mint ken addaan dressing a sesame vinaigrette.

Nasayaat a pangballaet iti diet a karkarne wenno puro a protina ken pangikkat iti suya kadagiti natataba/namantika a taraon. Maibagay daytoy iti bulong ti mint ken naata a mangga ngem mabalin met nga usaren ti piña (naluom, saan a de lata) imbes a mangga a kas iti inaramidko idi Agosto 5, 2018 a piña-zucchini carpaccio. Kitaen ti resipe http://www.nordis.net/2018/08/makan-a-la-pinoy-pina-zucchini-carpaccio/

Ti zucchini (American) wenno courgette (British) wenno summer squash ket maysa a klase ti karabasa a mabalin a dumanon iti maysa a metro iti kaatiddogna no matangkenan. Ngem kadawyan a maburasen no naganus pay a kasla kadakkel ti pipino.

Ramen:

1/3 kilo zucchini
1 ulo a letsugas
1 mangga a naata (apple/Indian/carabao mango)
2 kutsara tubbog ti lemon/kalamansi
¼ – 1/3 tasa olive oil wenno sesame oil
1 kutsarita asin
sangapirit a paminta
2 kutsara diro wenno asukar

Panangisagana:
  1. Bugguan dagiti natnateng ken prutas.
  2. Iw-iwaen ti zucchini iti naingpis a nagbukel wenno paatiddog babaen iti panangusar iti peeler.
  3. Ikkaten dagiti ungkay ti mint, iwaen iti babassit a paatiddog.
  4. Iwaen met iti paatiddog a kasla gurabis ti mangga.
  5. Paglaoken amin a natnateng ken prutas iti dakkel a malukong wenno salad bowl. Ipalammiis pay iti uneg ti refrigerator.
  6. Iti dakkel a garapon, paglaoken dagiti ramen ti salad dressing: olive wenno sesame oil, asin, diro wenno asukar, paminta ken tubbog ti lemon wenno kalamansi. Kaluban ti garapon ken kulugen agingga aglaok amin a ramen ken medio napaleten ti dressing.
  7. Ilaok laeng ti dressing iti ensalada no idasaren.#
Share

Leave a Reply

This site uses Akismet to reduce spam. Learn how your comment data is processed.