MAKAN A LA PINOY | Totilla

By BRENDA S. DACPANO
www.nordis.net

QUESADILLA. Tortilla a napalamanan iti keso.

Ti tortilla ket flatbread a naggapu iti Mexico. Kangrunaan a ramen daytoy ti arina a mais ngem mabalin met ti wheat flour. Pannakatinapayda daytoy a pangbalkot iti burrito, quesadilla ken fajita. Ti burrito ket napalaman iti giniling a karne ti baka, manok wenno picadillo a karne ti baboy ken sarsa. Ti quesadilla ket kasla sandwich a napalamanan iti karne ken/wenno natnateng ken keso. Texan-Mexican American ti fajita, napalamanan iti tinuno a karne ti baka a naiw-iwa iti paatiddog ken nalaokan iti green, red ken/wenno yellow a bell pepper, sibuyas ken sili.

Ramen ti tortilla:
3 tasa arina
1 kutsarita baking powder
1 kutsarita asin
1/3 tasa mantika
1 tasa danum nga apag-anem-em

Panangisagana:

  1. Sagaten dagiti arina, asin, baking powder, paglaoken iti dakkel a mixing bowl. De-mano a masaen wenno agusar iti stand mixer (usaren ti dough hook).
  2. Ilaok ti mantika ken apag-anem-em a danum.
  3. Masaen agingga nalamuyot ken maiporman a kasla bola.
  4. Warakiwakan iti arina ti rabaw ti board tapno saan a dumket ti masa.Gudduaen ti masa iti 16 a pidaso nga agpapada iti kadakkel .
  5. Pagdaplaten dagiti sinanbola babaen iti dakulap. Kaluban iti nadam-eg a tualia wenno kacha.
  6. Urayen nga umalsa iti agarup 15 minutos.
  7. Warakiwakan iti arina ti rabaw ti board, idaplat ditoy ti tortilla babaen ti rolling pin agingga naingpis wenno agsaragasag ti tortilla.
  8. Iti napuskol a pariok wenno cast iron pan iti kalalainganna a pudot/apuy, iluto ti tortilla iti maysa a minuto sakbay a balikiden. Iluto ti bangirna iti 30 segundo wenno agingga light brown ti dadduma a pasetna a kasla burik (spots).
  9. Uliten ti numero 7 ken 8 agingga malpas amin a pidaso.
  10. Usaren a dagus wenno pabaawan ken ikabil iti cellophane/ziplock freezer bag ken ipakni iti freezer. Mabalin nga agbayag iti agingga innem a bulan iti uneg ti freezer.# nordis.net
Share

Leave a Reply