MAKAN A LA PINOY | Sisig

Ni BRENDA S. DACPANO
www.nordis.net

PORK SISIG. Sisig a sungo ken lapayag ti baboy a nalaokan iti liempo. (Ladawan ni BSD)

Adu a klase ti mabalin nga aramiden a sisig ngem ‘tay orihinal a lapayag ken sungo ti baboy ti aramidentayo itatta.

Insaganak daytoy sumagmamano nga aldaw sakbay iti panangselebrar iti panangpasangbay iti baro a tawen. Nasapa ti panangisaganak gaputa mabayag ti agiw-iwa iti babassit, ngem no adda ti food processor-yo ket nanamnam-ay bassit ti biagyo mainaig iti panagtadtadan.

Malaksid iti lapayag ken sungo ti baboy, linaokak daytoy iti liempo tapno adda balanse iti taba ken lasag ti baboy.

Ramen:

(makaaramid iti 6 servings, para iti 3 tao/serving)
1 kilo sungo ken lapayag ti baboy
1 kilo liempo
2 kutsarita asin
¼ – ½ tasa soy sauce
tubbog ti 15 a kalamansi
1 kutsarita paminta a narim-it
1 dakkel a sibuyas a puraw, naiwa iti pino
maysa ulo a bawang, tinadtad
sili a sairo (optional)
itlog
bulong ti sibuyas, naiwa iti pino

Panangisaga:
  1. Bugguan ken ilambong dagiti karne iti agarup 40 minutos. Adawen ken pabaawan.
  2. Iw-iwaen iti babbabassit ngem pang-adobo nga iwa ken iproseso iti food processor (no adda) wenno iw-iwaen/tadtaden iti babassit.
  3. Iti pariok, igisa ti bawang, sibuyas a puraw ken tinadtad a karne. Timplaan iti soy sauce ken paminta. Agnayon iti soy sauce no agkurang ti apgadna. Igisa agingga ag-brown bassit.
  4. Sakbay nga adawen, ilaok ti tubbog ti kalamansi ken paminta.
  5. Pabaawan, adawen ken ikabil iti container a makaluban ken ipenpen iti uneg ti freezer. Agbayag iti 3-4 a bulan.
  6. Iruar laeng ti kasapulan. Ipapudot ti sisig ken ipapudot met ti pangidasaran a sizzling plate. Ikabil ti sisig iti sizzling plate ken ipettakan iti maysa nga itlog bayat a napudot pay ti sizzling plate. Kiwaren tapno mailaok ti itlog iti sisig nga agserbi a kasla dressing wenno pangpapalet Iperresan iti 1-2 a kalamansi, parabawan iti naiw-iwa a bulong ti sibuyas ken sili (no agusar).
  7. Tapno espesial, sakbay nga idasar ti sizzling plate, bukbukan iti igid ti bassit (maysa jigger) nga arak (brandy wenno rum). Sindian tapno sumged ti arak. Bay-an nga ag-evaporate amin ti alcohol ken matay ti apuyna sakbay gaoen.# nordis.net
Share

Leave a Reply