MAKAN A LA PINOY | Manok a liningta iti soy sauce

By BRENDA S. DACPANO
www.nordis.net

Agusar ti sibubukel a manok para iti espesial nga okasion kas iti Paskua tapno napinpintas ti presentasionna no maidasar. Ngem mabalin met ti naiw-iwan wenno napagkapat a manok.

SOY CHICKEN. Luppo ti manok a liningta iti soy sauce ken anis. (Ladawan ni Brenda Dacpano)
Ramen:

1 manok (sibubukel wenno naiw-iwa)
4 a ngipen a bawang, naukisan ken napitpit
8 a sibubukel a paminta
1 kutsara a bukel ti anis
½ tasa soy sauce
¼ tasa suka
2 kutsara asukar a brown
2-3 tasa danum

Sawsawan:

laya a naganus, ginadgad iti pino wenno puree
soy sauce
tubbog ti kalamansi
1 kutsarita sesame oil

Panangisagana:
  1. Ikabil iti kaserola ti amin a ramen. Ilingta wenno ilambong iti kalalainganna nga apuy.
  2. Apaman a nagburek, ipakapsut ti apuyna. Iluto iti 45 minutos agingga maysa oras (depende iti kadakkel ti manok) no agusar iti sibubukel a manok wenno 30 minutos no naiw-iwan ti usaren.
  3. Kalpasan nga agburburek iti 30 minutos, ramanan ken timplaen wenno nayunan iti soy sauce ken/wenno asukar, no kasapulan, segun iti kayatyo a timplana.
  4. Patayen ti apuyna sakbay a maatianan tapno adda mabati a bassit a sarsana.
  5. Idasar nga adda sawsawanna a nagadgad a laya a naganus, soy sauce, tubbog ti kalamansi ken sesame oil. # nordis.net
Share

Leave a Reply