MAKAN ALA PINOY | Irish Coffee

Ni BRENDA S. DACPANO
www.nordis.net

IRISH COFFEE. Panangisagana iti Irish coffee iti Mario’s Restaurant iti Siudad ti Baguio. (Ladawan ni Brenda Dacpano)

Naisar-ongkami ken ni lakay ken dagiti kakabsatna iti Mario’s tapno iselebrar ti panagkasangay ni ipagko. Nagorderkami iti beef steak ta kasla saanka a napan ditoy a restaurant no saanka a mangan iti agdindinnamag nga steak ken Mario’s Caesar salad.

Adda iti menu-da ti Irish coffee isu a daytoy ti inorderko a drink, maibagay iti panawen a nalammin. Medio lumam-eken iti parbangon ken iti sardam, nasalemsem ti pul-oy ti angin. Saanko pay a naramanan ti original nga Irish coffee. Adda met dagiti nainumkon idi ngem dagitay laeng flavored coffee.

Adda nginnginana. Kunak iti panunotko nga isu siguro a nangina ta adda pay showmanship-na ta isaganada iti abaymo. Ipapudot ti chef (wenno barista ti awagda iti agisagana wenno agtimpla iti kape) ti crystal a baso iti portable nga stove, sananto basaen bassit ti pingir ti baso tapno nadam-eg ket nalaka a kumapet ti asukar inton maideppel daytoy. Ipapudotna manen ti pingir ti baso tapno ag-crystalize ti asukar. Ipapudotna met ti Irish coffee iti bassit a kapetera.

Bayat a maipappapudot ti kape, inikkanna iti maysa a jigger nga Irish whiskey ti baso ken pinasgedanna iti stove tapno ag-evaporate ti alcohol iti whiskey. Tinimplaanna iti bassit nga asukar ken inbukbokna iti baso ti kaburburek a kape. Pinarabawanna iti whipped cream.
Naimas ti kape a malaokan iti whiskey. Mayat nga isagana daytoy nga inumen itatta Disiembre ta nalam-ek ti panawen ken idasar kadagiti reunion iti panawen ti Paskua.

Ramen:

1 tasa brewed coffee
1 kutsarita – 1 kutsara asukar, brown
1 jigger/3 kutsara Irish whiskey (wenno uray ania a klase ti whiskey)
2-3 kutsarita heavy cream, binatil

Panangisagana:

  1. Ipapudot ti mug wenno Irish coffee glass iti apuy wenno bukbokan iti agburburek a danum santo ikaten ti danumna, paik-ikan ti baso.
  2. Ikkan iti napudot a kape ti baso agingga ¾ a mapunno. Ikanaw ditoy ti asukar a brown.
  3. Ibukbok met ditoy ti whiskey. Parabawan iti whipped cream. Idasar a napudot.
  4. Mabalin nga isagana a la Mario’s style a mapasgedan ti arakna wenno flambé (French iti flaming liquor). # nordis.net
Share

Leave a Reply