Maika-lima a kongreso ti Apit Tako naballigi

APIT TAKO Press Release
www.nordis.net

KANGRUNAAN A PWERSA. Naggibus ti Maikalima a Kongreso ti Alyansa dagiti Pesante iti Taeng Kordilyera babaen iti maysa a protesta iti Siudad ti Tabuk, Kalinga tapno kondenaren ti nasaknap ken naranggas nga atake kadagiti organisasion ti mannalon ken nainsigudan nga umili. (Ladawan ni Rogyn Beyao)

TABUK CITY, Kalinga — Balligi nga insayangkat ti Alyansa Dagiti Pesante iti Taeng Kordilyera (APIT TAKO) iti maika-lima a kongreso na isadiay Tabuk City Peoples’ Gym, Tabuk City, Probinsia ti Kalinga idi Nobiembre 17-18, 2018 nga adaan tema ” Paregtaen ken Palawaen ti Tignayan Dagiti Pesante ti Kordilyera. Labanan ti Pasismo ti Estado!”.

Dinar-ayan ti nasao nga aktibidad ti sumurok 700 katao manipud kadagiti pamprobinsia nga tsapter ti APITTAKO idiay Abra, Mt. Province, Ifugao ken Kalinga kasta met dagiti kameng manipud kadagiti organisasyon ti pesante iti Probinsia ti Apayao ken Benguet. Ada pay dagiti nagapu kadagiti nasyunal nga opisina kas iti Anakpawis Party List, Kilusang Magbubukid ng Pilipinas (KMP) ken Climate Change Network and Community Initiatives (CCNI).

Nangrugi ti aktibidad babaen ti panaglualo nga indauloan ni Bishop Elorde Sambat, ti agdama nga Presidente ti St. Toni’s College a masarakan idiay Bulanao, Tabuk City kalpasana ket pinasangbay ni Mr. Artemio Fontanilla, Chairman ti Timpuyog Dagiti Mannalon ti Kalinga (TMK), kas “host” ti kongreso. Inbingay met ni Mr. Juan Dammay, chairman ti APITTAKO ti panggep ti kongreso.

Ni Cong. Ariel “Ayik” Casilao ti Anakpawis Party List ti naimbitaran a “keynote speaker”. Pinadayawana dagiti dimar-ay ken segun kankuana ket napapanawen ti kongreso ti APITTAKO gapu kadagiti polisia iti agdama nga administrasion nga karkaro nga mangparparigat kadagiti mannalon ken dadduma pay nga nakurapay nga umili.

Awan ti pudno nga reporma agraryo ken industrialisasion. Inbingay na pay dagiti naaramidan ti Anakpawis Party List iti uneg ken ruwar ti House of Representative ken ti intero a Makabayan Bloc kas koma ti “free irrigation services” numanpay segun kenkuana ti tignayan dagiti mannalon ti kangrunaan a nangiduron tapno naipasa ti linteg para ti libre nga irigasion a saan a dagiti kongresista.

Inbingay met ni Danilo “Ka Daning” Ramos, chairman ti KMP ti agdama nga kasasaad dagiti pesante iti pagilian. Segun ti tinalantanna ket nakakaskas-ang iti kasasaad dagiti pesante iti sidong ti US-Duterte Administration. Surok 150 ti natay a mannalon gapu laeng ti panangirupir da ti karbengan da nayon na pay dagiti pamutbuteng. Kinuna pay a saan tayo nga agbuteng ta umno dagiti ilablaban tayo.

Simaruno dagiti “workshops” dagiti tsapter ken probinsya a sadinno ket inamirisda ti kasasaad dagiti mannalon wenno pesante iti probinsya da ken kasta met dagiti tsapter wenno organisasyonda. Karaman ti workshop nga indauloan ti CCNI partikular ti epekto ti panagbalbaliw ti klima ken ania dagiti naaramidan dagiti umili tapno saan a nakaro ti epektona.

Kasta met nga adda ti naisina nga workshop dagiti mangmangged-talon ti ti Lower Kalinga a nu sadinno ket nagnunumoanda ti tangdan a saan a kas iti agdama nga adda dagiti mangibaba tapno makaalada laeng ti trabaho. Kalpasana ket naibingay dagiti resulta iti intero nga delegasyon.

Nabaknang dagiti naibingay a resulta dagiti “workshops” ta adu dagiti naaramidan dagiti tsapter iti las-ud ti uppat a tawen manipud idi naudi a kongreso ti APITTAKO ken kasta met agdama a kasasaad dagiti pesante iti probinsya da.

Ginupgop ken ninayunan ni Ampy Mangili dagiti a naibingay ken ninayunanna nga isu ti nagbalin a kasasaad dagiti pesante iti Kordilyera.

Kabigatanna, nagamartsa dagiti delegados iti sentro ti Dagupan a bitbit dagiti panawagan dagiti pesante wenno mannalon saan laeng ti Kordilyera nu di ket iti intero a Pilipinas.

Kalpasana, inbingay ni Andres Wailan, Secretary-General ti APITTAKO ti Regional Secretariat Report a sinublat ni Mr. Juan Dammay nga nangibingay met ti Executive Committee Report.
Iti maudi a paset ket ti panangiparang ken diskusyon ti Tallo a Tawen Pangkabuklan a Programa ti APITTAKO: 2018-2021 nga inaprobaran iti kongreso. Kalpasanna ket nag-community “pattong” nga dinar-ayan dagiti delegados kas panangipakita nga nagballigi ti maika-lima a kongreso ti APITTAKO.# nordis.net

Share

Leave a Reply

This site uses Akismet to reduce spam. Learn how your comment data is processed.