MAKAN ALA PINOY | Kapinan iti Virgin Island

Ni BRENDA S. DACPANO
www.nordis.net

Ti abalone wenno kapinan iti Boholano ket marine snails wenno biruruko iti baybay. Maysa daytoy kadagiti mailaklako iti intar dagiti karinderia iti baybay ti Virgin Island iti Bohol

ABALONE WENNO KAPINAN

Damok ti agpasiar iti Isla ti Bohol ket nakaay-ayo ken naidumduma ti nadanonmi kadagiti kakaduak iti Virgin Island ta dagiti karinderia ket adda mismo iti baybay. Nakatapog iti danum dagiti karinderia iti pagat-gurong. Naglitnaw ti danum ti baybay ken puraw ti daratna.

PAGGATANGAN KEN PANGANAN TI KAPINAN

Nataratar dagiti karinderia nga aglaklako kadagiti sadiwa nga ikan ken dadduma pay a taraon iti baybay a nakalap mismo sadiay. Mabalinmo nga ipaluto a tinuno, ginisa wenno adobo ti mapilim nga ikan wenno pusit. Nalatak ditoy ti abalone a daydayuen dagiti Chinese ngem ad-adu kano ti dumayo iti panawen ti Chinese New Year, manipud iti Enero agingga Pebrero.

Kinuna ni Mario Lacambra, cook ken agsanikua iti maysa a puesto ti karinderia sadiay nga adda nginnginana ti abalone gapu ta narigat kano nga alaen daytoy. Kinuna a masapul a batoken ti kapinan a nakakapet kadagiti sirok ti batbato.

SISIG A KAPINAN

Ti abalone a basbassit ngem dakulap ti kadakkelna ket agbalor iti P300-P500. Kalakaan ti lako ni Mario nga agbalor iti P100-300 depende iti kadakkelna. Kinunana a saanna met a tuonan iti dakkel ti presio tapno mabibiit a malako basta agganar laeng iti bassit ket mayaten. Dua a tawenen nga agkarkarinderiada kenni baketna a ni Fe iti isla. Pinakyawmi ti lakoda a kapinan a linaon ti palanggana nga agbalor ti P500. Kinuna ni Mario a sisig ti kadawyan a luto ti kapinan a kakayatan dagiti kustomerna. Inlambongna iti apagbiit ti abalone sananto inikkat iti shell-na, ken iniw-iwana iti babassit. Ingisana daytoy iti apagbiit iti bassit a mantika, naiw-iwa a laya, sibuyas, kamatis ken sili. Natimplaan daytoy iti bassit nga asin ken sweet chili sauce. Maysa a platito laeng ti nagbalinan ti kapinan idi maluto. Namnamaek a medio nakulbet daytoy ngem saan gayam, kasla taba ti baboy ti texture-na. Naimas daytoy isu a saanak nga agsiddaaw no agsublisubli dagiti Chinese ken lokal a turista gapu iti kapinan, malaksid iti nakaay-ayo a linak ti baybay.#

Share

Leave a Reply