STATEMENT | Ited ti umno ken maiyannatup a tulong para kadagiti mannalon

Ti SOLIDARITY OF PEASANTS AGAINST EXPLOITATION
www.nordis.net

Itay napalabas a bulan, dinalapus ni Bagyo Ompong (Mangkhut) ti intero nga amianan a Luzon a pakairamanan ti rehiyon Ilokos a nagresulta iti nakaru a didigra ken perdisyon iti agrikultura ken inpraistruktura. Segun iti datos ti Department of Agriculture Regional Office 1, agdagup iti P6.1 bilyon ti pukaw ti agrikultura kangrunaan ti pagay. Ngem segun kadagiti mannalon, mabalin a dakdakkel pay ti perdisyon iti agrikultura agsipud ta ti actual a kapadasanda ket 80-90% ti napukaw iti apitda.

Ti Narvacan a maysa kadagiti kadadakkelan ti mapapataudna nga irik iti probinsya ti Ilocos Sur ti napakaruan a nadidigraan a nagresulta iti dandani “zero harvest” iti agarup 960 ektarya a kapagayan. Segun ti datos, kadagupan ti 5,667 a mannalon iti nasao nga ili ket awan a pulos ti naapitda nga irik nga aggatad daytoy iti 236 milyon a pisos.

Malaksid iti kapagayan wenno kataltalonan, nairaman pay a naperdi dagiti sumagmamano a balbalay ken irigasyon. Ti irigasyon ket maysa kadagiti kapatgan a ramen ti agrikultura.
Iti kastoy a kasasaadmi a mannalon, naiget nga agpanpannawagan kami kadagiti naduma-duma a tukad ti gobyerno; manipud municipal, probinsyal, rehiyonal ken nasyonal tapno mangipaay iti umno, insigida ken maiyannatup a tulong tapno maalay-ayan ti rigat nga inkam sagsagabaen.

Gutigotenmi dagiti opisyales iti lokal a gobyerno iti intero a rehiyon Ilocos nga agbalin kuma nga agresibo (aggressive) nga agaramid iti addang tapno maipaay ti umannatup a tulong kadagiti nakaru a nadidigraan iti masakupanda. Maysa kadagiti mabalin nga aramiden dagiti LGUs ket mangpanday iti ordinansya wenno resolusyon a mangilatang iti cash subsidy wenno grants a sangapulo ribu a pisos ti kada pamilia a biktima (P10,000) manipud iti pondo nga aggapu iti R.A. 7171 excise tax. Babaen iti daytoy ket in-inut a maksubli dagiti mannalon iti normal a kasasaadda.

Iti Ilocos Norte, nangipasa ti gobyerno probinsyal iti supplemental Annual CY Investment Plan 2 a nangialokar iti 400 milyon a pisos (P400M) para iti quick response operation ken 100 milyon a pisos (P100M) a para iti repair dagiti partially ken totally damaged a balbalay ken pampubliko-inpraistruktura. Nupay kasta, daytoy ket ‘mabalin nga agpukaw’ a kasla asuk nu saan nga agridam dagiti umili.

Kasta met a gutigotenmi dagiti appo’t talon, institusyon ken indibidwal nga agpapautang ken agpapaabang a makipagpaset iti ibabangon dagiti mannalon manipud iti panangdalapus ti bagyo Ompong kadakuada babaen ti saan a panangsingir pay laeng iti utang dagiti mannalon ken awtomatiko a pannakaikkat ti interes ti utang. Kadagiti appo’t talon saanen a singiren ti abang iti napalabas a panagtalon. Iti kastoy a pamuspusan ket makapagtitinnulong tayo a maibangon ken maisubli ti normal a kasasaad dagiti mannalon iti particular ken ti ekonomya ti rehiyon tayo iti pangkabuklan.

Aw-awaganmi dagiti padami a mannalon a makipagkaykaysa iti STOP Exploitation tapno irupir kadagiti amin a maseknan nga ahensya ti gobyerno kas ti LGU, DSWD, DA, NIA, DPWH ken NTA ti pannakaipaay ti umno ken maiyannataup a tulong para kadatayo a biktima ti bagyo Ompong.

ITED TI RUMBENG KEN MAIYANNATUP A TULONG PARA KADAGITI BIKTIMA TI BAGYO OMPONG!
ISARDENG TI KURAPSYON, SAAN A PAGBALINEN A PAGGATASAN TI PONDO A PARA KADAGITI BIKTIMA KALAMIDAD!

Share

Leave a Reply