Makan a la Pinoy: Gelly candy, pangdepdep iti nasakit a piskel

Ni BRENDA S. DACPANO
www.nordis.net

Nasakit kadi dagiti piskel wenno muscle-yo gapu ta nabannog iti ehersesio wenno nagagara a nagna iti nawatiwat a dalan? Adtoy ti mabalin nga aramiden a makan a pangpabang-ar iti napiskelan a masel.

Gelly candy, pangdepdep iti nasakit a piskel. Photo by Brenda S. Dacpano

Ti ramen a turmeric wenno laya a duyaw ket aglaon ti curcumin a nasamay iti limteg a masel wenno susuop. Ti cinnamon ket tumulong iti bagi a mangsuppiat iti impeksion ken mang-repair iti tissue/muscle a nadangran. Ti cayenne pepper ket addan ti capsaicin a nasamay a pain-reliever.

1 tasa danum
6 laya a duyaw wenno 1 kutsara a pulbos (turmeric)
3 kutsara diro
1 kutsarita cinnamon a pulbos
1/8 kutsarita sili (cayenne)
1 kutsara agar-agar (gulaman)

Panangisagana:

  1. Iti kaserola, pagbureken ti danum. Ilaok dagiti ramen malaksid iti agar-agar. Kiwaren.
  2. No agusar ti presko a laya a duyaw, nayunan bassit ti danumna ken angeren iti 3 minutos. Ngem no agusar ti pulbos a turmeric, patayen ti apuyna apaman a nagburek.
  3. Ilaok nga ikiwar ti agar-agar.
  4. Ikabil iti molde a makaluban.
  5. Ikabil iti uneg ti refrigerator iti 10 a minutos wenno aginggana masukog ti mixture.
  6. Ikkaten iti nagsukogan ken iw-iwaen iti babassit a kasla candy.
  7. Ikabil iti garapon a makaluban ken ipakni iti uneg ti refrigerator.
  8. Mangan ti dua wenno tallo a kaiwa tapno mabang-aran ti nasakit a piskel. #nordis.net
Share

Leave a Reply