Makan a la Pinoy: Taraon a pangpadaruy iti dara

Ni BRENDA S. DACPANO
www.nordis.net

Gagangay a proseso ti bagi ti panagpalet/panagtukel ti dara (blood clotting) a makatulong iti panagsardeng iti panagpadara kadagiti nasugat wenno nadunor. Ngem parikut daytoy kadagiti addaan high blood pressure ken sakit iti puso. Mabalin a manglapped ti blood clot iti panagtaray ti dara iti puso, utek, bara ken dadduma pay a paset ti bagi a no saan a masigud a mataming ket agresulta iti komplikasion.

Taraon a pangpadaruy iti dara: Kelp, laya, bawang, sabong ti chamomile, cinnamon powder ken turmeric powder.Photo ni Brenda S. Dacpano

Adda dagiti agas (pharmaceutical drugs) a mabalin a tomaren a pangpadaruy iti dara ngem makadangran met iti bituka, dalem ken bato (kidney). Napadasakon ti nagtomar ti aspirin ngem makapasanaang iti tian isu a nagsukisokak iti internet kadagiti alternatibo a wagas. Adda dagiti naammuak a natural a taraon a makatulong iti panagdaruy iti dara ken mangkissay iti peggad iti panagpalet/panagtukel ti dara.

Dagiti taraon a mabalin a mangkissay iti peggad ti blood clot ken stroke:

1. Laya. Aramiden a tsaa wenno ilaok iti dadduma pay a taraon (tinola, dinengdeng, paksiw, kdpy.). Ti laya ket addaan salicylate a pangpadaruy iti dara ken nasamay a pangrelax kadagiti muscle ken pangikkat iti imflamasion.

2. Omega-3. Ti salmon, tuna, mackerel ken dadduma pay nga ikan/lames a nabaknang iti omega-3 fatty acids ket nasamay a pangpadaruy iti dara ken pangpababa iti kolesterol.

3. Turmeric. Ti laya a duyaw ket nabayagen a maus-usar a natural nga agas iti alta-presion ken inflamasion. Segun iti panagadal, makatulong ti turmeric iti blood platelets tapno malappedan ti panagtutukel/panagpalet ti dara.

4. Cayenne pepper. Ti Thai pepper ket maysa a klase ti sili a kayena. Daddadakkel daytoy a sili ngem iti sili a labuyo. Adu ti salicylates a linaon ti cayenne pepper isu a nabileg a pangpadaruy iti dara ken pangpababa met laeng iti blood pressure gapu ta pasayaatenna ti sirkulasion ti dara iti bagí.

5. Piña. Addaan enzyme a bromelain a manglapped iti pormasion ti uric acid crystal nga agbalin a gout ken bato iti kidney. Daytoy met laeng nga enzyme ti mangpadaruy iti blood platelets.

6. Olive oil. Aglaon iti antioxidants a manglaban iti free radicals ken imflamasion, a mangtulong iti panangpadaruy iti dara.

7. Chamomile. Aramiden a tsaa ti sabongna. Nasamay met a pangpaturog wenno pangrelax.

8. Kelp. Ti kelp ken dadduma pay a klase ti seaweeds ket nasayaat para kadagiti addaan alta-presion ta natural daytoy nga anti-coagulant.

9. Bawang. Nabayagen a maus-usar a pangpababa iti blood pressure ken pangpasayaat ti sirkulasion ti dara.

10. Cinnamon. Nasamay nga anti-coagulant. Mangpababa iti blood pressure ken pangpa-eppes iti imflamasion.

11. Dadduma pay a taraon a pangpadaruy iti dara: Natnateng – letsugas, kamatis, broccoli, sibuyas; prutas – berries, ubas, grapefruits, pomegrantes (granitas); tree nuts – walnuts, hazelnuts, kasuy, pistacios, brazil nuts; dark chocolate.

Suhestion laeng dagitoy a taraon, nasken nga ikonsulta iti doktor ti aniaman a sagsagubanit iti salun-at.nordis.net

Share

Leave a Reply