Makan a la Pinoy: Ensalada a papaya

Ni BRENDA S. DACPANO
www.nordis.net

Mayat ti agaramid iti ensalada a papaya itatta gapu ta adu dagiti intinnag ti nadawel a bagio nga Ompong. Dagiti naata pay a papaya ket mabalin nga ilaok iti tinola, aramiden nga atsara a papaya wenno ensalada nga estilo iti Thailand, pawpaw salad wenno green papaya salad.

Ensalada a papaya. NiBrenda S. Dacpano

Ramen:
4-5 sili a sairo
4 a ngipen a bawang
6 pidaso nga utong, naputputed iti agarup dua pulgada
1 kamatis (naiwa) wenno sangarakem a botinggan (berry tomatoes)
1 kutsara a tubbog ti dalayap wenno lemon
2 kutsara hibe (daing a pasayan)
1 kutsara a burisangsang (muscovado)
2 kutsara patis
200 gramo papaya, nagadgad
1 kutsara a mani, nakirog

Panangisagana:
1. Bayuen iti almiris ti sili a sairo ken ilaok a bayuen ti bawang
2. Inayon ti utong ken kamatis, bayuen laeng iti apag-apaman a lumukneng.
3. Ipatedted ti tubbog ti dalayap ken ilaok ti hibe.
4. Ilaok ti papaya. Bayuen bayat nga ikiwkiwar.
5. Ibales iti pinggan ken parabawan iti narim-it a mani.# nordis.net

Share

Leave a Reply