Daranudor Ti Ilocandia: Panagraira ti pangta iti demokrasia ken seguridad ti umili

Ni SHERWIN DE VERA
www.nordis.net

Iti agdama, sangsangoek ti parparbo a kaso a rebellion iti korte, bayat nga isagsaganaan ti pananglaban ti malisioso a panangiraman ti Department of Justice (DOJ) iti nagan ko ti proscription petition tapno ideklara nga terorista ti Communist Party of the Philippines ken New People’s Army.

Malaksid ken daytoy, napakaammoanak ken naikkan ti kopia ti maysa a direktiba manipud ti PNP a nangikategoria kanyak ken dagiti dadduma pay nga aktibista kas “lider ti NPA.”

Ti nasao a dokumento ket naggapu iti PNP Intelligence Group nga addaan petsa a Mayo 28, 2018 a mangdadawat kadagiti operatibada iti “Summary of Information” kasilpo iti 20 a personahe dagiti progresibo nga organisasyon iti Ilocos ken Kordilyera a malisioso ken arbitrario nga inraman ti DOJ ti proscription petition.

Adu ti makaammo ken makapaneknek nga iti las-ud ti 16 a tawen ket dagitoy nga adbokasiya ti nabayagko a tinakderan ken intandudo. Kangkangrunaan a nakipasetak ti panangibutaktak ken pananglaban kadagiti makadadael a panagminas iti Ilocos, no sadinno ket nagbenepisyo ti sibubukel nga umili ken dagiti maseknan nga lokal a gobierno. Bayat a dagiti dadduma pay a naisurot a nagan ket nalatak a mangilablaban ti karbengan dagiti nainsigudan nga umili.

Kayatda saoen kadi a ti trabaho ken adbokasiami a panangitandudo ti karbengan-tao ken panangsalaknib ti aglawlaw ket isu ti obra dagiti ibilbilangda a NPA ken terorista?

No kastoy ti ububraen ti ibilbilangda nga NPA, makuna kadi nga iligal, krimen wenno terorismo daytoy?

Kaano pay a nagbalin a peggad ti demokrasia wenno krimen ti panangikiddaw ti panangbigbig ken respeto ti karbengan-tao? Kaano pay a naibilang a krimen ken terorismo ti panangsalaknib ti nakaparsuan ken natural a rekurso?

No ubra dagiti maikatkategoria a rebelde ken terorista ti panakitinnulong kadagiti lokal a gobierno para iti pagsiyaatan dagiti komunidad, panangipaay ti proyekto a sosyo-ekonomiko ken panangited ti treyning kasilpo ti panangidaulo ken panangimanehar dagiti organisasyon, saan ngata a maibilang a rebelled ken terorista ti adu nga orgaginsasion ken indibidwal?

Rebbengen ti gobierno nga itandudo ti karbengan ken salluadan ti seguridad ti umili ngem kasano no iti mismon gobierno ti manglablabsing dagitoy a karbengan?

Siasinno pay ti kumamangan ti umili no dagiti institusion a naituding a mangsalaknib ti seguridad ket isudan ti mangikabkabil iti peggad ti biag dagiti umili?

Kasano a pay a salakniban ti gobierno ti biag, pangkabiagan ken aglawlaw no isu mismo ti mangparpartuat ti gapu ken mangipalpalubos ti panakadadael dagitoy?

Segun ti agdama a kasasaad, saan kadi nga ti isaysayangkat ti administrasion a Duterte nga Oplan Tokhang ti adadda a nagpataud ti buteng ken nagresulta ti panangpapatay kadagiti inosente?

Saan kadi nga ti militarisasyon iti kaawawayan iti sidong ti Oplan Bayanihan ti nangipaay ti buteng ken rigat dagiti mannalon ken nainsigudan nga umili?

Saan kadi a ti agdama a turay ti mangususar ti pwersa ken pamutbuteng tapno sumurot iti kayatna ti amin a benneg ti gobierno?

Iti kastoy a mapaspasamak, rumbeng nga agsaludsod tayo, sadinno ti pangipaayantayo ti talek ken namanama? Napateg a saludsuden ti bagitayo, no sadinno ti pagtakderantayo — iti intar kadi dagiti mangidadanes wenno iti agbarbaringkuas a maidaddadanes?

Mayat a panunutentayo ti sungbat kadaytoy a bitla ni Abraham Sarmiento, Jr., lider-estudyante ti University of the Philippines Diliman idi panawen ti Martila Law:

“No saantayo nga agtignay, sinno ngarud ti agtignay? No saantayo nga agsao, sinno ngarud ti agsao? No saan nga itatta, kaanonto pay?”

Dagitoy ket napateg a saludsod iti agdama a panawen.

Iti daytoy a kanito nga umirirteng ti atake ti administrasion a Duterte iti demokratiko a karbengan ti umili.

Iti kasasaad nga awanen ti panangikankano dagiti armado nga otoridad kas ti militar ken pulis kadagiti ligal a proseso.

Iti mismo pannakapadas dagiti aktibista, kritiko ti administrasion ken kas kanyak iti pannaglipit ti gobierno.

Dagitoy a saludod ti mangitudo no sinno ti pudno a pangta iti demokrasia ti pagilian ken seguridad ti umili. # nordis.net

Share

Leave a Reply