Makan a la Pinoy: Bistek Tagalog

Ni BRENDA S. DACPANO
www.nordis.net

Ti Bistek Tagalog ket maibilang a tradisional a luto a Filipino nga impluensia ti Español manipud iti saoda a bistec wenno steak iti English.

BISTEK TAGALOG. Bistek Tagalog nga addaan napalet a sarsa a dalem. Photo by Brenda S. Dacpano

Kangrunaan a ramen ditoy ti lomo ti baka ngem mabalin met ti uray ania a paset a karne ti baka ngem kasapulan a naiw-iwa iti naingpis. Maiyuper daytoy iti soy sauce, kalamansi, bawang ken paminta. Ngem us-usarek met laeng ditoy ti sabali a klase ti karne kas ti karne ti manok ken baboy.

Ramen:

½ kilo lomo ti baka
tubbog ti 6 a kalamansi wenno
¼ tasa suka
4 kutsara soy sauce
1 sibuyas a dakkel, naiwa iti naingpis a kasla singsing
¼ tasa mantika
1 kutsara bawang, tinadtad
½ kutsarita paminta, narumek

Panangisagana:

1. Iw-iwaen iti naingpis ti lomo ti baka. Ikabil iti malukong ken iyuper iti tubbog ti kalamansi wenno suka, soy sauce ken paminta. Kiwaren ken kaluban. Bay-an a mauper iti maysa nga oras tapno maagsep ti karne ti nanam ti dadduma a ramenna. Ikabil iti uneg ti refrigerator.
2. Paik-ikan ti karne ken ireserba ti nangiyuperan a marinade.
3. Iti pariok, ipapudot ti mantika iti nakapsut nga apuy. Ipisok ti bawang. Kiwaren ken iluto agingga agmaris balitok, adawen ken paik-ikan.
4. Iti isu met laeng a pariok, iprito wenno stir-fry ti naiyuper a karne ti baka iti apagbiit, no nagusar ti lomo. Ngem no nakulbet ti karne nga inusar, nayunan bassit ti danum ken iluto agingga maatianan ken nalukneng ti karne.
5. Ilaok ti marinade iti karne, agingga napalet ti sarsana.
6. Ipisok ti onion rings. Kiwaren ken adawen.
7. Idasar a nawarakiwakan ti tostado a bawang. # nordis.net

Share

Leave a Reply