Statements: Suppiaten iti jeepney phaseout

Ti KALINGA FEDERATION OF JEEPNEY OPERATORS AND DRIVERS ASSOCIATIONS
www.nordis.net

Dakami ti grupo ti Kalinga Federation of Jeepney Operators and Drivers Association (KaFeJODA). Dakami a babassit a jeepney operators ken drivers, agraman dagiti maapektaran nga umili ditoy Kalinga ket saanmi a palubosan ti kayat ken panggep ti administrasion ni Duterte nga imodernisa wenno sukatan dagiti pampubliko a transportasion. Kontrakami iti modernisasion gapu ta dakami ti kangrunaan a maapektaran. Patayenda ti pangkabiaganmi a babassit nga operators ken drivers.

Ania kadi gamin daytoy plano a jeepney phase out? Apay a kontraentayo? Ti plano a Jeepney Phase out ket isu ti inkapilitan a panagsukat kadagiti agdama a public utility vehicles (PUVs) wenno pampubliko a pampasada a jeepney,traysikel ken van. Ti mabalin laeng a maisukat kadagitoy ket dagiti electric wenno e-jeepneys, euro 4 a makina ken solar powered a lugan.

Umuna iti amin, nangina ken saanmi a kabaelan ti gatad dagiti maisukat a lugan. Ti e-jeep ket aggatad ti P800,000 agingga P1.2 milion, ti euro 4 engine ket maysa a milion inggana 1.5 milion ken ti solar powered ket P1.6 milion. Malaksid iti dayta, agduaduakami no kabaelan kadi dagitoy a lugan ti kalsada iti probinsiatayo.

Maikadua, imbes a modernisasion agbalin to a monopolisasion ken korporatisasion! Ti ultimo a panggep daytoy a plano ket alun-onen wenno kontrolen dagiti dadakkel a gangannaet a negosiante ken lokal a kapitalista dagiti agpaspasada a jeepney, kasta met laeng dagiti PUV ken babassit a pampasahero a lugan kas ti tricycle.

Maikatlo, manamnama a dakkel ti epekto daytoy a plano kadagiti babassit a jeepney operators, drivers ken pasahero. Dagiti drivers ket maisaltek iti narigrigat a panagbiag, maawan kadagiti ima dagiti babassit nga operators ti jeepney ken prangkisa dagitoy, agbalin a babayadan a driver wenno kontraktual, maawanan iti trabaho ken pangkabiagan gapu iti nangato a rekisito nga ikeddeng dagiti monopolyo ken korporasion. Dagiti rekisitos: edad, naileppas a tukad iti edukasion, eksaminasion ken dadduma pay. Kaaduan a pasahero ket ordinario a mangmangged, mannalon, estudyante wenno ordinario nga umili a sigurado a maapektaran met laeng no ngumato ti pasahe.

Apay kadi nga ipappapilit ti gobierno nga ipakan daytoy saan nga umannatop a jeepney phaseout ken bogus a modernisasion? Gapu iti duron dagiti kakumplotna a dadakkel a para aramid iti luglugan kas ti Toyota, Nisaan, Ford ken daduma pay a mangisaysayangkat iti pamuspusan tapno mailako ti nagabsuon a luganda iti pagiliantayo. Datayo ti agsagrap ti kinagamrud ken kinaagum dagiti kapitalista iti ganansia!

Ngarud, kakailian nga operators, drivers ken pasaheros, ania ti rumbeng nga aramiden ken panawagantayo? Kasapulantayo a gaw-aten ti nalawa a masa tapno paginnadalan ti maipanggep iti jeepney phase out. Kasapulan nga urnusentayo ti bagbagi, indibidual ken asosasiontayo tapno mabaelantayo a labanan ti programa ti gobierno a phase out, monopolio ken korporatisasion ti pampubliko a transportasion!

No to Jeepney Phase out! Protektaran ken ilabantayo ti pangkabiagantayo!
Labanan ti bogus a modernisasion!
Ibasura ti Omnibus Franchising Guidelines!
Labanan ti Overpricing ti lana!
Ibasura ti TRAIN Law ken Value-Added Tax ti lana! Ibasura ti Oil Deregulation Law! # nordis.net

Share

Leave a Reply