Statements: Dua a tawen a panagturay ni Pres. Duterte, Dua a tawen a panangparigat ti umili

Ti CPA-KALINGA
www.nordis.net

Ita a Hulyo 23, 2018 ket maangay manen ti maikatlo State of the Nation Address (SONA) ni President Rodrigo Duterte tapno mapan na manen ipasindayag dagiti naaramidan na kano ken programa na iti unos ti dua a tawen a panagturay na.

Ngem kadagiti a gagangay nga umili ket awan ti marikna a signipikante a panagdur-as ti panagbiag nu diket karkaru ket din mailumlom iti kinarigat gapu iti napaspas a panagngato dagiti presyo dagiti basaran a gagatangen gapu iti epekto ti Tax Reform for Acceleration and Inclusion wenno TRAIN Law nga ipanpannakkel ni Duterte. Tungpa ken parigat kadagiti umili ti panangdalapus ti TRAIN ni Duterte gapu iti saan a maatipa a panagngato dagiti magagatang idinto ta nailansa met dagiti presyo dagiti produkto dagiti mannalon ken tangdan dagiti mangmangged ken nababa nga empleyado kasta met iti awan taning a kontraktwalisasyon.

Pangta met iti kabiagan dagiti babassit nga operator ken driver ken kadagiti umili ti manarimaan nga implementasyon ti jeepney phase out iti mascara ti modernisasyon ti pampubliko a transportasyon babaen iti Department Order ti DOTr wenno Omnibus Franchisng Guidelines a naiyulog idi June 2017 a mangsukat iti amin a pampasahero a lugan iti e-jeep, solar powered jeep ken euro IV jeeps. Ultimo ti pampubliko a transportasyon ket kayat nga agawen dagiti kapitalista a korporasyon tapno pagganansyaan manipud iti inisyatiba dagiti babassit nga opereytors ken drivers nga iti nabayag panawen ket binaybay-an ti gobyerno. Nalawag nga saan a para iti umili wenno para iti mas episyente nga pampubliko a tranportasyon ti panggep ti jeepney modernization nu di ket para iti negosyo dagiti babaknang ken kapitalista a gagayyem ni Duterte. Sinu kadi ti makabael a makagatang iti 800,000 inggana 1.6 milyon a gatad ti maysa a lugan ken masapul saan a bumaba iti 15 a units/ lugan tapno makaala iti prangkisa? Iti udi na, sigurado a dagiti marigrigat a mannalon, mangmangged ken estudyante ti mangsagrap iti nakaru nga epekto na daytoy gapu iti awan mintis a panagtriple a panag-ngato ti pamasahe.

Awan naidumaan ni Duterte kadagiti sinublat na a nagturay ngem ketdi pinakaru na pay ti panangituyang kadagiti amo na a gangannaet kas iti China tapno rangsaben dagiti natural a kinabaknang para iti minas ken pangipatakderan kadagiti igante nga hydro-dam projects ken geothermal. Kasukat dagitoy dagiti inutang na a pondo ken nakapakete iti programa na a Build-Build-Build! Nu iti probinsya, adda ti siyam a gandat a maipasdek a dadakkel a dam iti karayan Chico, Saltan, Tanudan ken Pasil river a manglayus a iti nalawa a kadagaan ti Kalinga. Mainayun pay ditoy ti Chico River Irrigation Pump project nga inutang ni Duterte iti Bank of China nga aggatad 3.8 bilyon pesos.

Agkarkaradap manen ti kumpanya a Chevron kakumplot na ti NCIP-Kalinga a mangituloy iti gandat na nga agipatakder a geothermal project iti tri-boundary ti Tinglayan-Pasil-Lubuagan iti laksid iti panangsupyat dagiti maseknan nga umili. Babaen iti taktika a divide and rule ket addan dagiti sumagmamano a barangay a naallalilaw ken nangipaay iti pammalubos da. Usaren da dagiti scholarship program, infrastructures ken dadduma pay nga narugit a taktika tapno maawis da dagiti umili a mangituyang kadagiti ancestral a daga da pabor iti kumpanya.

Iti kapadasan, iti pannaka-implementar dagitoy a plano ket saan a mabigbig ti karbengan dagiti nainsigudan nga umili. Saan a nasaknap ti konsultasyon tapno maala ti usto a desisyon dagiti maseknan nga umili nu di ket dagiti laeng opisyales ken sumagmamano nga indibidwal ti kakonsulta ti NCIP ken kumpanya. Saanen a mailinged ti usto a rupa ti NCIP kas instrumento dagiti kumpanya tapno maipatungpal dagiti makadadael a proyekto da, imbes a tumakder para kadagiti nainsigudan nga umili!

Saan met a mailaksid ti probinsya ti Kalinga iti adun a listaan dagiti tokhang ken addan agarup kumurang sangapulo ti napapatay gapu iti iwaywayat ti gobyerno Duterte a gyera kontra droga. Nagbalin a lisensya daytoy tapno basta laeng pumatay kadagiti masuspetsa a drug user ken pushers ken panangbalewala iti due process.

Iti maysa a bangir, umir-irteng ti militarisasyon iti kaaw-awayan iti desperado a panggep gobyerno babaen ti Oplan Kapayapaan ti AFP a rebbeken ti CPP-NPA-NDF ken ti rebolusyunaryo a tignayan apaman nga aggibus ti 2018. Dagiti sibilyan nga umili ti kangrunaan a mangsagsagrap iti nakaru a pammutbuteng ken pannakataktak kadagiti pang-ekonomya a trabaho. Ti nakaru pay ket maysa a kangrunaan a target ti Oplan Kapayapaan ti AFP ket dagiti lehitimo organisasyon dagiti umili nga agresulta iti pannakatiliw, pannakaibalud ken panangisampa kadagiti parparbo a kaso kontra kadagiti aktibo a miembro ken lider ken kadagiti masuspetsa a supporters ti NPA.

Saan a seryoso ni Duterte tapno tumugaw para iti saritaan kappia wenno peace talk iti baet ti gobyerno ken iti CPP-NPA-NDF. Pakakitaan ti adun nga gandat ken backchannel talks dagiti agsumbangir a panel ngem iti maysa a balikas laeng ni Duterte ket nalaka a mawaswas dagitoy. Dagiti ipataw na a kondisyon nga imposible a mapasamak ket pakabuyaan laeng ti kinaawan sinseridad iti peace talk. Sayang dagiti narugian ken signipikante a nadanun ti peace talk kas iti Comprehensive Agreement on the Respect of Human Right and International Humanitarian Law (CARHRIL) kas pundasyon ti panangituloy iti saritaan kappia. Napateg ti sumaruno a paset ti peace talk a Comprehensive Agreement on Socio-Economic Reform wenno CASER tapno masungbatan ti kinamarigrigat ti umili a Pilipino ken atrasado nga agraryo ti pagilyan. Susi ti peace talk tapno mairamut ti umabot liman a dekada a gubat-sibil iti Pilipinas.

Ngem ketdi ti sungbat ni Duterte ken dagiti pasurot na ket Pederalismo! Awan ti panawen ti administrasyon nga mangsungbat iti arungaing dagiti umili gapu ta makumikom iti panangipapilit iti Pederalismo a porma ti panaggobyerno. Addang na daytoy tapno maikonsentra kanyana ti bileg ken turay iti sanguanan dagiti umad-ado a panangbatikos ken mangsupyat kadagiti programa na. Ginundawayan met daytoy dagiti oportunista a grupo iti local para iti bukod da nga interes ken pagkwartaan. Ipilit da a biagen ti nabayagen a natay a CPLA tapno pagbalinen kanu a Cordillera State Force nu agballigi ti pederalismo.

Kabayatanna, agtul-tuloy ti macho-pasista a postura ni Duterte, mangipakpakita iti kinaawan respeto na kadagiti babbai! Ti balikas na nga “uray ag-rape dagiti AFP iti tallo a babbai ket sagot na, ti okay lang nga panangpaltog dagitoy iti mabagbagi dagiti amasona a rebelde, ken ti panang agek na iti maysa a Filipina OFW idiay South Korea ket pakabuyaan iti kinaruker ken panangbastos kadagiti babbai isu’t gapu na a nagani iti adu a kritisismo gaputa ta daytoy ket nalawag nga panangtagibassit iti maysa a bulnerable a babai! Kangrunaan na, saan nga nainkalintegan dagiti wagas na nga agsao kas ama ti pagilyan, ti anya man nga rumwar iti ngiwat na ket mabalin nga ipatungpal dagiti aso aso a paspasurot ken soldados na! Ultimo ti Diyos ket saan a nakalisi iti kinarugit ti ngiwat ni Duterte iti panangibaga na a ti Diyos ket estupido.

Puno na ang Salop! Tama na, Sobra Na! Daytoy ti agallungogan a pukkaw ken unget ti nalawa umili a Pilipino. Umad-adun a bilang dagiti grupo ken organisasyon iti naduma-duma a sector ti tumaktakder ken mangsupyat kadagiti manangidadanes a programa ti rehimen Duterte.

Agpanawagan ti Cordillera Peoples Alliance iti MABTAD! Agriing kakailyan ken agtignay kontra iti tiranya ti agdama rehimen. Sisusuporta ti CPA Kalinga ken agsaludo kadagiti grupo ken sector nga tumakder ken agtignay laban kadagiti kontra-umili a programa ti rehimen. Nagrugin a nagwelga dagiti operators ken drivers kontra iti Jeepney phase out! Palawaen pay ti tignayan, kariten tayo ti amin, kangrunaan ti naruay a mannalon, kababaihan ken kabataang-estudyante kasta met dagiti tao ti simbaan, propesyunal ken dagiti justice advocates tapno tumipon iti protesta tapno labanan ti Jeepney phase-out ken TRAIN Law ken tiranya-pasismo ti estado.

TRAIN Law ibasura!
Jeepney phase-out isardeng!
Isubli ti tungtungan kappia!
Labanan ti tiranya! # nordis.net

Share

Leave a Reply