Makan a la Pinoy: Thai Red Curry paste

Ni BRENDA S. DACPANO
www.nordis.net

Duyaw a curry paste ti kaaduan a magatang iti sadino man a tiendaan ditoy Baguio. Sumagmamano laeng ti pakasarakan ti nalabaga a curry. Isu a nasaysayaat no datayon mismo ti agaramid ti curry nga usarentayo. Agusar ti nalabaga a sili para iti red curry paste ken berde wenno saan pay a naluom a sili a sairo wenno siling labuyo para iti green curry paste.

RED CURRY PASTE. Dagiti ramen ken ramit iti panagaramid ti Thai red curry paste. Photo ni Brenda S. Dacpano

Kadawyan a mailaok daytoy iti karne ti manok, baka, karnero ken ikan – tuna, durado, tilapia, ken dadduma pay.

Ramen:

1 kutsara coriander seeds
1 kutsara cumin seeds
5 pidaso sili a sairo, nagango
2 kutsarita asin
4 bugas ti baraniw
1 tangan a galangal wenno laya
4 lasona
3 ngipen a bawang
1 bulong ti kafir/dalayap wenno
ukis ti dalayap

Panangisagana:

1. Ikirog ti bukel ti coriander ken cumin agingga agbalin a pulbos.

2. Yuper ti nagango a sili iti danum iti agarup 10 minutos, iw-iwaen iti babassit. Nayonan ti silina no kayatyo a nagasgasang.

3. Iti almiris, bayuen ti amin a ramen malaksid iti coriander ken cumin. Mabalin met nga agusar iti food processor. No napinon dagiti ramen, ilaok ti coriander ken cumin powder.

4. Mabalinen nga usaren a ramen iti Thai tilapia curry, lamb curry ken dadduma pay.

5. Agbayag iti makalawas no la ketdi maidulin iti uneg ti refrigerator.# nordis.net

Share

Leave a Reply