Makan a la Pinoy: Spicy Sujebi soup

Ni BRENDA S. DACPANO
www.nordis.net

Ti sujebi ket tradisional a sopas dagiti Koreano, hand-pulled dough soup wenno namasa nga arina ken naperpersay iti naingpis a malaokan iti nadumaduma a nateng. Kadawyan a maidasar iti matutudo ta nasamay a pampapudot iti bagi.

SPICY SUJEBI SOUP

Ramen ti sujebi dough:
2 tasa arina
¾ tasa danum
½ kutsarita asin
1 kutsara manitika

Panagaramid iti sujebi dough:

  1. Paglaoken amin a ramen ken iproseso iti food processor iti maysa a minuto wenno ramasen iti agarup 10 minutos wenno aginggana agbalin a nalamuyot a masa.
  2. Balkoten ti plastig bag ken idulin pay iti refrigerator.

Panagaramid iti digo:

  1. Iti dakkel a kaserola, ipisok ti 10 a daing a munamon ken sangadakulap a nagango a kelp (seaweed) . Ipaburek iti 10 a minutos.
  2. Adawen ti kelp ken ipaburek manen ti digo iti agarup 20 minutos.
  3. Iw-iwaen ti kelp iti agarup maysa pulgada kuadrado. Ipaigid pay.

Ramen:

1 tasa kimchi
1 kutsara gochujang (Korean chili paste)
300 gramo sundubu (soft tofu) wenno 2 tasa taho
bulong ti sibuyas, naiw-iwa
2 ngipen bawang, tinadtad
300 gramo sujebi

Panagaramid:

  1. Bayat nga agburburek ti digo ti sujebi, ipisok ti kimchi, gochujang, bawang ken naiw-iwa a kelp.
  2. Bennaten ti masa a sujebi agingga naingpis ken perpersayen a saggaysa nga itinnag iti agburburek a digo.
  3. Timplaan iti patis.
  4. Ilaok ti sundubu wenno taho ken bulong ti sibuyas.
  5. Adawen ken idasar a napudot.# nordis.net
Share

Leave a Reply