Makan a la Pinoy: Manok nga inager iti tapuy

Ni BRENDA S. DACPANO
www.nodis.net

Iti gangannaet a sao, rice wine-braised chicken. Braise, manipud iti French a sao a braiser, ket kombinasion ti dua a wagas iti panagluto: panagprito (searing) ken panaganger (simmering). Awan ti masarakak a sakto a kaibatogan iti Ilocano ti braise ngem kaasidegan met ti anger wenno boil.

Manok nga inager iti tapuy. Photo ni Brenda S. Dacpano

Ti karne ket maiprito iti apagbiit iti napigsa nga apuy agingga agmaris brown amin a pasetna. Maaramid daytoy tapno maiselyado ti natural a likido ti karne iti uneg. Kalpasan a maiprito, maanger a nainnayad iti kalalainganna a likido agingga nalukneng ti karne.

Nasayaat nga angren dagiti nakulbet a karne wenno paset nga adu ti connective tissue-na kas dagiti kukod (baka, baboy), beef chunks/briskets, luppo ken gurong ti manok.

Ramen:

1 kilo luppo/gurong ti manok
1 ulo bawang, pinitpit
2 kutsara mantika (olive oil no adda)
2 tasa ubas (awan bukelna) wenno 1 tasa pasas
asin ken paminta a pangtimpla
2 tasa tapuy
1 tasa tarragon, bulong

Panangisagana:

1. Bugguan ken paik-ikan ti karne ti manok. Timplaan iti asin ken paminta.

2. Iti napuskol a kaserola, ipapudot ti mantika. Iprito ditoy ti karne agingga agmaris brown ti amin a paset ti karne.

3. Ipisok ti bawang. Igisa bassit.

4. Ilaok dagiti ubas wenno pasas ken tapuy. Kaluban.

5. Iluto iti oven iti 190°C (374°F) iti 40 minutos wenno angeren iti dalikan iti nakapsut nga apuy iti agarup 40 minutos wenno agingga nalukneng ti karne. Adawen ti karne.

6. Ipisok ti tarragon iti nagangeran ngem mangibati ti bassit a pangarkos. Ramanan no uston ti timpla ti sarsa. No naalsem ti inusar nga ubas, nayonan ti bassit nga asukar.

7. Ipatedted ti sarsa iti naanger a karne ken parabawan ti presko a bulong ti tarragon. # nordis.net

Share

Leave a Reply