Usok ken panagkayo idiay Mt. Province, puersado nga iparit

Ni NORWIN GONZALES
www.nordis.net

BAGUIO CITY — Nagballaag ti Leonardo Pacsi Command – New People’s Army Mt. Province (LPC-NPA) kasilpo ti pangta ti gobierno a panangipaserra kadagiti usok ken panangiparit iti panagpukan ti kayo iti probinsya.

Daytoy ket maysa nga inisyatiba ti Provincial Director a ni PSSupt Allen Sumeg-ang Ocden. Nairakurak dagiti nasao nga addang ti probinsya iti miting nga impaayab ti Provincial Peace & Order Council (PPOC) ken ti Provincial Mining and Regulatory Board (PMRB) idi Abril 27 idiay Sagada.

Partikular a nadakamat dagiti usok idiay Fidelisan, Sagada; Matiim idiay Alab Proper ken Mainit, idiay Bontoc. No saan kano boluntaryo nga iserra dagitoy ket pasabogen ni Ocden.

Nayon pay, ti Batangan System kadagiti ili ti Tadian, Sagada ken Besao nga adda iti uneg ti tradisyunal a sistema ti panangmanehar iti kakayoan ket iligal segun kenni Ocden.

“Kellaat daytoy a pasamak iti Mt. Province. Nabayag a saan a tinukay ti probinsya daytoy inkapilitan a panangiserra dagiti usok no saan a mairehistro iti minahang bayan. Maipalagip a ginandat daydi Gobernador Mayaen ti panagipwersa iti panagrehistro dagiti babassit nga usok ngem linabanan dagiti umili daytoy gapu ta nagulib a pamuspusan ti panagparehistro tapnu mabuisan ken matengngel ti gobyerno dagiti usok,” kuna ni Magno Udyaw, tagapagsarita ti LPC-NPA.

Bininsa-binsa pay ni Udyaw no ania dagiti parikut ti agdama a People’s Small Scale Mining Act para kadagiti babassit a minero iti Mt. Province. Segun kenkuana, iti uneg ti linteg, maikkan laeng ti permit no maisubmitar dagiti nakaad-adu a papeles ken mabayadan ti adu a masingir.

Ti tunggal permit ket mangipalubos ti dua a tawen a panagusok ken no magun-od manen dagiti adu a rekisitos, mabalian a mapalubosan manen iti dua a daras pay wenno uppat isu nga innem a tawen ti maksimum.

“Nu saan a magteng dagiti rekisitos ket makanselar ti permit isu a mabalin nga aplayan ti sabali a tao wenno dakkel a kompanya a makabael a mangaramid kadagiti rekisitos ti reaksyunaryo a gobyerno. Nalaing a naamiris ti umili a kontra iti karbengan da iti bukod a pangngeddeng mainaig iti panagminas daytoy a patakaran,” kuna ni Udyaw.

Ti Presidential Decree 705 wenno Revised Forestry Code ti us-usaren met ni Ocden tapno ideklara nga iligal ti panagkayo kadagiti bambantay. Segun iti linteg, dagitoy kano ket public forest land. Uray kano balbalay ken pampubliko a pasiladades ket maideklara nga iligal iti panangiyaplikar ni Ocden iti daytoy a linteg. Nabayagen ti laban dagiti nainsigudan nga umili iti linteg a daytoy iti nadumaduma a porma.

“Nakalawlawag a kontra-umili daytoy a patakaran, nangruna kadatayo nga Igorot, gapu na rinabsutda amin a karbengan tayo iti bukod a daga a nagtaudan,” kuna ni Udyaw.

“Aso-aso met dagiti agtuturay, nangruna kenni Duterte, a mangipalpalubos nga agtalinaed dagiti dadakkel a kompanya, ken sumrek pay dagiti barbaro a kas ti CEXCI-Nickel Asia a kukua ti Japan. Inikkat na ni Gina Lopez iti DENR kas secretary gapu iti takder na a mangpaserra kadagiti kompanya a nakaro ti panangdadael da iti aglawlaw,” kuna na pay.

Kinondenar met ni Udyaw dagiti aramid ti agdama a sekretaryo ti Department of Environment and Natural Resources a ni Roy Cimatu. Militarista ken kontra-umili dagiti aramid na nga agserserbi kas proteksyon kadagiti dadakkel a kompanya bayat nga parparigatan ti umili.

“Us-usaren da ti PNP ken AFP, agraman ti Bantay Gubat, Masa Masid ken CAFGU tapnu ipilit ti lintegda a babaknang,” kuna ni Udyaw.

Nagpanawagan isuna kadagiti umili a tumipon ken sumuporta iti NPA tapno salakniban ti karbenganda iti bukod a panangngeddeng. # nordis.net

Share

Leave a Reply