Makan: Strawberry Barbecue sauce

By BRENDA S. DACPANO
www.nordis.net

Inadawko nga inspirasion ditoy ti sampinit barbecue sauce. Ti sampinit ket lokal a balang a raspberry a masarakan iti probinsia ti Quezon ken Laguna iti panawen ti kuaresma, Enero agingga Abril.

STRAWBERRY BARBECUE SAUCE. Tinuno a liempo ken sawsawan a barbecue sauce nga strawberry. Photo by Candice Mangili

Gapu ta awan met ti sampinit ditoy Baguio, pinadasko nga aramiden ti strawberry. Mabalin met nga usaren ditoy ti raspberry ken blueberry. Pangiyuper daytoy ti i-barbecue a manok wenno aniaman a klase a karne ken uray tofu, wenno mabalin met a siwsiwan iti tinuno a karne.

Ramen:

2 tasa strawberry
1 tasa suka
2-4 kutsara asukar, brown
2 kutsarita sili, flakes
2 bulong ti laurel
asin ken paminta a pangtimpla

Panangisagana:

1. Iproseso ti strawberry iti immersion blender wenno food processor wenno pis-iten babaen ti tinidor wenno potato masher.

2. Iti kaserola, ikabil ti suka, asukar, sili, bulong ti laurel, asin ken paminta.

3. Ipaburek iti kalalainganna a pudot.

4. Pakapsuten ti apuy ken inayon ti strawberry puree.

5. Kiwaren ken lutuen agingga napalet ti sarsa.

6. Adawen ken pabaawan.

7. Para iti bbq a manok, sapsapuan ti manok iti bbq sauce ken ikabil iti oven iti pudot a 425°F wenno 218 °C. Iluto iti 45 minutos wenno agingga maluto ti manok ken brown ti kudilna.

8. Mabalin met nga ituno iti uging ngem annadan a saan a makset. Nalaka a makset gapu iti ramenna nga asukar isu a yadayo bassit iti beggang. # nordis.net

Share

Leave a Reply