Women’s Front: Babai, paayen ti macho-pasismo ti rehimen a US-Duterte

By INNABUYOG
www.nordis.net

“Women hold up half of the sky.” Daytoy ket kinuna ni Mao Zedong, ti founding father ti Peoples Republic of China, tapno ipakita ken paneknekan ti kinapateg dagiti babbai kas parte ti gimong ken lubong. Iti mapaspasamak tatta, nalipatan sa ni Apo Presidente nga “women hold up half of the sky”. Kabi-kabila dagiti atake iti karbengan ken pagimbagan dagiti babbai ken ubbing a mangipakita nga ni President Duterte ti number one nga mangiwaywayat iti macho-pasismo, misogyny ken tyranny.

Lagipen tayo kakailyan, adu ti sexist ken misogynistic remarks nga insawsawang ni Presidente Duterte. Adda dita dagiti rape jokes nga insawsawang na idi agkampampanya paylang isuna ken idi madama ti Marawi siege, ti panangusar na iti “42 virgins” tapno padur-asen pay ti turismo, ti panangimando na iti pasista nga Armed Forces of the Philippines (AFP) nga paltogan dagiti babbai nga kameng ti New Peoples Army (NPA) iti uki da. Dagitoy ket nalawag nga direkta a pangta ken mangdadael iti dignidad dagiti babbai.

Idi adu ti nangdillaw ken mangkondenar kadigitoy nga sexist pronouncements na, imbaga ti Malacañang nga dagijay ket ang-angaw laeng and “they are not to be taken literally”. Kinuna pay ni Presidente Duterte idi November iti napalabas a tawen nga ituloy ti administrasyon na ti panangilaban iti karbengan dagiti babbai ken ubbing.

Imbes nga takderan na ti inkari na, nagtultuloy ti panangilupit-lupit ti administrasyon ni Duterte kadagiti babbai. Adda dagiti limma (5) nga women human rights defenders ditoy Kordilyera a napilaan kadagiti parparbo a kaso babaen iti 7th Infantry Battalion ti AFP. Nayon pay ditoy ti 5 manen nga women indigenous peoples human rights defenders a nainayon iti listaan dagiti terorista iti proscription petition nga inpila ti Department of Justice iti maysa a korte ijay Manila. Awan basol dagitoy nu di ket ilaban ti karbengan ken pagimbagan dagiti nainsigudan nga umili karaman dagiti babbai ken ubbing.

Maysa pay ditoy ti deportation order laban kenni Sister Patricia Fox, maysa nga Australian a pudno a nagserbi kadagiti mannalon ken dadduma pay a marigrigat nga umili ditoy pagilian iti uneg ti 27 a tawen gapu laeng ta nagsao isuna iti maysa a rally. Basulen gayam ita ti tumulong kadagiti marigrigat. Inayon pay ditoy ti panangpatalaw kenni Maria Lourdes Sereno, ti umuna a babai a Chief Justice ti Supreme Court, babaen iti quo warranto petition.

Bayat nga maat-atake dagiti pudno nga agserserbi kadagiti umili, agtultuloy met dagiti economic policies ti administrasyon ni Presidente Duterte nga agturong iti mas nakarkaro a kinapanglaw ken bisin kadagiti marigrigat. Ingga ita, nababa latta ti sweldo, awan ti seguridad iti trabaho gapu iti kontraktwalisasyon ken awan sarday ti panagngato ti presyo ti amin nga gagatangen gapu iti Tax Reform for Acceleration and Inclusion wenno TRAIN Law.

Nu ditoy Kordilyera, mariknan ti epekto ti TRAIN Law. Saanen a bumaba iti 40 pesos ti presyo ti maysa a kilo ti bagas. Uray ti asukar, mantika ken sardinas ket ngimmina iti 5 enggana 15 pesos. Ngimmina metlaeng ti presyo ti diesel, gasolina ken LPG. Daytoy ti rason nu apay nga jay dati nga nalaka a pamasahe iti taxi ditoy Baguio ket simmirit pangato. Adu ti mangibagbaga a nadoble ti pamasahe nu dagiti calibrated a taxi ti pagluganan. Nayon pay, adda metlaeng ti mapatta-patta a panagngato ti mabayadan iti kuryente. Ti kinagpaysoanna, nu ijay National Capital Region, ngimaton ti singir iti kuryente manipud idi Marso.

Nangnangruna a parigat ti TRAIN Law kadagiti nanang ta marigatan da nga mangiyan-anay ti bassit a mabirukan iti amin a kasapulan ti pamilya. Kasta met a nakaro ti epekto na daytoy kadagiti babassit nga aglaklako kas kadagiti ambulant/side walk vendors ken dadduma pay a mala-mangmangged a saan met nga agnumar iti maibagbaga a dakdakkel a take home pay gaputa saan dan a mabuwisan ngem agsagaba da iti panagngato ti presyo dagiti amin a gagatangen. Sunga uray nu makubbo dagiti mangmangged karaman dagiti babbai iti katatrabaho, saan a makahabol ti nagbassit a sweldo iti presyo dagiti gagatangen nga aglilinnumba nga ngumato.

Iti kastoy a kasasaad, maburiburan dagiti marigrigat, karkaro dagiti nanang, nga agbirok iti nadumaduma a pamay-an tapno masupusupan ti bassit a mabirok da. Maysa kadagitoy ti panagmiembro kadagiti kooperatiba tapno adda ti tumarayan da iti panawen nga kasapulan da unay ti “additional cash” nga nababa ti interes na iti pautang ken saan nga istrikto ken saan nga adu ti requirements tapno makautang nu ikompara kadagiti bangko.

Numanpay nakalanad iti Article 60 enggana 61 ti Republic Act 9520 wenno Cooperative Code of the Philippines of 2008 nga exempted iti panagbayad ti buwis dagiti kooperatiba, signipikante ti epekto ti TRAIN Law iti operasyon dagitoy. Iti sidong ti National Internal Revenue Code (NIRC), kasapulan nga agbayad dagiti miembro ti kooperatiba iti Documentary Stamp Tax (DST) iti amin a makunkuna a debt instruments kas iti mortgages, pledges ken deed of trust. Adda ti 50% nga panagngato dagitoy gaputa iti TRAIN Law, Php1.50 kada Php200 nga inutang ti makomput a gatad ti DST manipud iti piso kada Php200 nga nakalanad iti NIRC. Nu adda ti mortgage loan mo nga Php500,000, ti DST nga bayadam iti dati a computation ket Php2,500 laeng ngem ngimmato daytoy iti Php3,750 gapu iti TRAIN Law. Adda metlaeng ti 100% nga panagngato iti bayadan para iti original issue of Shares of Stocks. Dati ket piso laeng kada Php200 nga par value. Ngimmato daytoy iti P2. kada P200 nga par value.

Adda metlaeng ti nainayon a buwis a mabayadan gapu iti TRAIN Law. Ita a tawen, adda ti inruwar ti Bureau of Internal Revenue (BIR) a memorandum circular a mangmando kadagiti kooperatiba nga agkolekta iti DST kadagiti loan renewal gaputa nakalanad daytoy iti Section 195 iti TRAIN Law. Aggatad daytoy iti P40 para iti umuna a P5,000 ken P20 para iti succeeding wenno sumarsaruno a P5,000. Isunga nu irenew ti maysa a miembro ti loan na a P500,000, adda ti iwithhold ti kooperatiba a P2,000 para iti DST.

Nayon pay, iti sidong ti TRAIN Law, naikkan ti bileg ti BIR nga mangala iti impormasyon manipud kadagiti kooperatiba ken eksamenen dagiti kooperatiba uray nu awan ti pammalubos manipud iti Cooperative Development Authority.

Maysa laeng ti kayat na nga saoen dagitoy. Gapu iti TRAIN Law, nayon pay a baklayen dagiti marigrigat ti buwis iti pautang. Manamnama metlaeng nga agbalin nga stringent wenno istrikto dagiti kooperatiba kas kadagiti bangko isunga dumteng to ti panawen nga saanen nga accessible para kadagiti nakurapay dagiti serbisyo nga ipapaay dagiti kooperatiba.

­Ngarud, iti sango ti kumarkaro nga ablat ti macho-pasismo ni Presidente Duterte ken ti krisis iti ekonomya gapu kadagiti neoliberal a polisiya ti rehimen a US-Duterte, rumbeng laeng ken nainkalintegan a sumikad ken lumaban. Saan tayo nga itulok nga agtultuloy ti panagbaybay-a ken panangtagibassit kadagiti babbai. Ti kadakkelan nga ambag tayo kas babbai ket makipaset iti tignayan para iti pangkagimongan a panagbalbaliw, iti militante a garaw dagiti umili tapno maputed ti ramut ti kinakurapay. ABANTE, BABAE, PALABAN, MILITANTE! # nordis.net

Share

Leave a Reply