Nakondenar ti panangituding ti DILG kadagiti bakante a posisyon ti SK

NI SHERWIN DE VERA
www.nordis.net

BAGUIO CITY— Kinondenar ti dua a kadadakkelan nga organisasyon ti agtutubo iti pagilian ti singasing ti Department of Interior and Local Government (DILG) nga ikeddeng ti ahensya no siasinno ti agtakem kadagiti bakante a posisyon iti Sangguniang Kabataan.

Kuna ti Kabatan Partylist (KPL) Cordillera ken Anakbayan Ilocos a ti nasao a singasing ket paset ti addang tapno sibubukel a kontrolen ti administrasyon a Duterte ti amin a tukad ken tay-ak ti turay. Kinunada pay a pukawen daytoy ti esensya ti “demokrasya ken wayawaya iti SK.”

“We believe that option of having DILG or any other government office appoint the unfilled posts for the SK defeats the very core of democratic processes,” kuna ni Christian Ruiz ti KPL. Malaksid daytoy, impaganetgetna a maisupadi ti kayat a mapasamak ti DILG ti prinsipyo iti likudan ti panakaikabil ti probisyon kontra dinastiya.

Iti presscon ti DILG idi Mayo 9, inbingay ni Marlo Iringan, direktor ti ahensya iti Cordillera nga ad-addalenda ti dadduma pay a ligal a pamuspusan tapno mapunuan dagiti bakante a pwesto iti SK.

“We are looking into the possibility of transferring to the DILG secretary the appointing powers of the President, if it is legally attainable, if not then we conduct a special election,” palawag ti direktor.

Kuna ni Iringan a segun iti linteg, maiyaramid ti special elections no kas pangarigan adda dagiti bakante a posisyon. Ngem kunana a nagastos ken narikut no isayangkat daytoy.

Kuna met ni Glenn Mendoza, kamatalek a sekretari ti Anakbayan Ilocos, “nais natin palakasin ang pamumuno ng kabataan sa SK, dapat nating simulan ito sa pagkilala at respeto sa democratic process, sa paghirang ng mismong kabataan mula sa barangay ng mamumuno rito at hindi pwedeng DILG ang magtatakda.”

Kunana pay a no mapatuloy ti suhestiyon ti DILG, maikabil iti napeggad a kasaad ken mailukat ti manipulasyon dagiti politiko kadagiti agtakem nga opisyal ti SK. Inrekomendana a mabalin met a mismon ti barangay ti mangpaawag laengen ti panagbobotos para iti SK iti tukadda babaen ti koordinasyon iti Comelec ken DILG.

Kuna ti lider ti KPL a dagiti napipintas a probisyon ti SK Reform Law ket produkto ti dangadang ti agtutubo tapno baliwan ti imahe ti SK kas “breeding grounds for next generation trapos (traditional politicans).”

“Amidst the fascist and anti-people Duterte regime, the SK shall take a vital role in leading the youth in a path towards genuine politics of change. Politics that advances the rights and true interest of the youth and the people and is fearless in combating anything or anyone that hamper those rights,” innayonna.#nordis.net

Share

Leave a Reply