Makan a la Pinoy: Tsaa a samsamping

Ni BRENDA S. DACPANO
www.nordis.net

Nalabit a pamiliarkayon iti bunga ti samsamping a maidengdeng wenno mailaok iti buridibud. Ngem ti sabong daytoy ket mabalin nga aramiden a tsaa.

SAMSAMPING TEA. Adu a benepisio iti salun-at ti maala iti tsaa a samsamping nga addaan iti kontemporario a klinical a panagsukisok. Segun iti maysa a panagsukisok, ti pulpos manipud iti narumek a bulong ti samsamping ket mangpasayaat iti abilidad a makabigbig, mangpadur-as iti memoria ken pigsa ti utek. Photo ni Brenda S. Dacpano

Maris asul ti sabong ti samsamping. Maitsaa daytoy a fresko wenno maipagango iti angin (air dried). Bukbukan ti agburburek a danum ti nagango a sabong ken balnawan santo paik-ikan. Bukbukan manen iti agburburek a danum ken bay-an a mauper ti tsaa iti lima minutos sakbay nga inumen. Naimas no matimplaan iti diru ken maperresan bassit ti dalayap wenno kalamansi.

Segun iti panagadal, adu ti benepisio a maala iti panaginum iti tsaa a samsamping (scientific name: Clitoria Ternatea). Maawagan met a Blue Bell Vine, Blue Pea, Butterfly Pea, Asian Pigeon Wings.

Benepisio manipud iti tsaa a samsamping:

1. Mapadur-as ti panagkita – aglaon ti antioxidant a proanthocyanidin a mangpasayaat iti taray ti dara agturong iti capillaries dagiti mata.

2. Mapadur-as ti panagtubo ti buok – nabaknang iti bioflanovoids a tumulong iti panagtubo ti buok ken mangpabuntog iti panaguban.

3. Mangpasayaat iti kudil – ti anti-oxidant ket mangparegta iti collagen ken selastin synthesis a tumulong iti panangpalasbang manen iti kudil ken makissayan ti kuretret ken dadduma pay a seniales ti panagbaket wenno panaglakay.

4. Aphrodisiac – tradisional a maus-usar kas aphrodisiac wenno pangpariing iti rugso partikular kadagiti babbai ken makaagas kadagiti problema mainaig iti panagregla.

5. Antioxidant, anti-anxiety ken depression – addaan flavonoids, anthocyanins ken phenolic compounds a mangpababa iti pangpa-stress nga oxidative.

6. Diuretic – pangpaisbo, nga agtungpal iti panangpababa iti blood pressure.

7. Makatulong iti panaggin-awa iti ut-ot (pain reliver) ken letteg (swelling).

8. Anti-diabetic – manglapped iti glucose intake manipud iti taraon.

9. Anti-microbial – iti sumagmamano a panagadal idiay India, dakkel ti epekto ti tsaa a samsamping kontra iti Staphylococcus Aureus.
10. Tumulong iti panangibaba iti gurigor babaen iti panangpalawa kadagiti blood vessels iti babaen ti kudil, no sadinno a nalaklaka a palammiisin ti dara.

11. Anti-HIV – ti sabong ti samsamping ket maysa kadagiti sumagmamano laeng nga herbs a naglaon iti cyclotide, a nakita a nga addaan anti-HIV effects. (manipud iti majesticherbs.com)

Idi nagkauna, ti sabong ti samsamping ket maus-usar a pangkolor iti innapuy wenno diket ken dadduma pay a taraon.

Idiay Cavite, ti nagan ti maysa nga ili sadiay a Ternate ket naggapu iti nagan ti samsamping a Ternatea.# nordis.net

Share

Leave a Reply