Insayangkat CordisRDS ti Bookkeeping training ti POs ti Abra

Ni KIM LAGYAB
www.nordis.net

BANGUED,Abra—Naangay ti bookkeeping seminar iti dua a komunidad ti Abra a partner areas ti Cordillera Disaster Response and Development Services Inc. (CorDis RDS) idi Abril 28- 29, 2018 para iti Sitio Masablang, Domenglay, Licuan-Baay ken iti Sitio Manapnap, Binasaran, Malibcong idi Mayo 1 ken 2, 2018.

Timmabuno iti nasao nga aktibidad dagiti miembro ti Masablang Farmers Association (MaFA) ken ti Manapnap Community Organization (MCO). Adda met laeng dagiti indibidual a dimmar-ay a naggapu iti kabangibang a bario nga interesado nga agadal. Dagitoy a peoples’ organization (PO) ket partners ti CorDisRDS para iti kumprehensibo a programa kasilpo iti disaster risk reduction ken dadduma pay a pagsayaatan ti umili iti las-ud ti innem a tawen. Agdagup iti 53 katao ti nagpartisipar iti bookkeeping training a naisayangkat. Panggep ti innadal a manayonan ti kaammuan dagiti POs a mangimanehar kadagiti sanikua ken proyekto a naibangon babaen ti bukodda a kabaelan.

Gapu ta ti nasao a bookkeeping seminar ket dawat ti dua nga POs tapno mapadur-asda pay ti serbisioda, naayat a nagbalin nga instructor dagiti community organizers ti CorDisRDS. Nagsentro ti innadal iti epektibo ken simple a wagas ti panagrecord ken panag-audit kadagiti proyekto ti umili kas ti rice cooperative ken kiskisan. Nayon iti innadal ti oryentasyon maipanggep iti husto a panangimanehar iti proyekto tapno saan a mabaybay-an ken agtultuloy ti benepisio nga ipaay daytoy kadagiti umili.

Naikkan ti gundaway dagiti dimmar-ay a mangipraktika iti nasursuroda babaen ti workshop no sadinno nga inaramatda ti naisuro a pormat iti panagrecord ken panag-audit. Nakipaset ti tunggal indibidual kangrunaan dagiti dadaulo ken nadutokan nga agrecord.

Iti Masablang, kayatda pay a sumayaat ti serbisio ti imbangonda a palay cooperative a nagserserbi iti nasurok 20 a tawen. Imbangonda ti kooperatiba tapno saanen nga umadayo dagiti umili a mapan agbirok ti bagas ken umutang kadagiti nangato ti interesna iti panawen nga agkurang ti bagas. Iti met benneg ti Manapnap ket tapno sumayaat met laeng ti panangpatarayda iti kiskisan nga agserserbi iti komunidad iti las-ud ti 29 a tawen ken tapno lumawa ti maserbisiuanda kas iti kabangibang a baryo.

Positibo ti reaksion dagiti dimmar-ay iti nasao nga aktibidad. Dagiti nagapu iti kabangibang a baryo ket kunada a kayatda met nga adda ti maisayangkat a bookkeeping training iti lugarda.

Kuna ni Maria Bautista, maysa kadagiti nakipaset manipud iti Masablang, “mayat ta adda ti kakastoy a seminar a pagadalan uray man pay no medio makaulaw ket mas nalaklaka a maawatan no idilig iti dati a sistema ti panagrecord nga ar-aramatenmi”.

“Ibingayko ti inadalko iti dadduma pay a padak a mangimatmaton kadagiti nadumaduma a proyekto ti umili” balikas a nagtaud kenni Lydia Viernes, maysa kadagiti timmabuno iti aktibidad a naggapu iti Sitio Sucao.# nordis.net

Share

Leave a Reply