Agkurkurang dagiti kandidato ti SK

Ni Sherwin De Vera
www.nordis.net

BAGUIO CITY — Iti umuna a panangipakat ti Sangguniang Kabataan (SK) Reform Act of 2015, adu a lugar ti naobserbaran ti Commission on Elections nga agkurang ti nagkandidato. Adda pay dagiti sumagmamano a barangay nga awan pulos ti nangipila ti Certificate of Candidacy manipud tserman inggana kagawad.

Para iti organisasyon nga Anakbayan, kangrunaan a biddot ti gobierno ti pasamak. Kunana a dakkel a nakaulaw kadagiti agngayangay koma nga agopisyal ti SK ti probisyon kasilpo ti anti-dynasty ken ti tawen a mabalin tumaray.

“Nagkulang ang pamahalaan sa pagpapaliwanag ng bagong batas. Nahumaling sila sa pag-postpone at pagharap sa kanikanilang interes kaya walang nabuong plano sa paghikayat sa aktibong partisipasyon ng kabataan,” kuna ni Glenn Mendoza, Deputy Secretary General ti tsapter ti grupo iti Ilocos.

Kastamet nga adda epekto ti edad a makipagpaset gaputa kaadduan kadagiti agtutubo nga agtawen 18-24 ket adda ken makumikomen iti kolehiyo wenno trabaho.

Agkurang ti kandidato

Segun ti Department of Interior and Local Government Cordillera, 33 ti 1,175 barangay ti rehiyon ket awan ti kandidato para SK chairperson. Bayat a 5,024 laeng ti kandidato iti kagawad, agkurkurang para iti 8,225 a kasapulan.

Impalgak met ni Attorney John Paul Martin, election officer ti Baguio City a pito a barangay ket awan pulos ti nagipila ti kandidatura. Kinunana pay a pito laeng a barangay ti kumpleto ti kandidato, kaaduan ket agkurkurang.

Iti Ilocos Sur, ti ni Atty. Rhodora Arrocena, election officer ti probinsya nga adda dagiti barangay nga agkurkurang dagiti agkandidato. Iti naiyaramid a press briefing idiay Provincial Capitol, napagammoan pay nga adda ti maysa a barangay iti Vigan City nga awan ti nagkandidato.

Panakaupay ken panagiskwela

Para kada Martin ken Councilor Michael Lawana, presidente ti Liga ng Barangay, kunada a komon a sentimiento ti pannakaupay dagiti agtutubo ken ti panakakumikomda iti iskwela.

“Hindi na sila interesado, nawala ang kanilang enthusiasm because of the numerous postponement,” kuna ni Martin. Nasaona daytoy bayat iti panagatendarna iti forum nga insayangkat ti National Youth Commission- Northern Luzon Cluster kasilpo ti SK Reform Law idi Mayo 9.

Inbingay met ni Lawana ti kapanunutan na bayat ti inpaawag ti Department of Interior and Local Government (DILG) ti press conference iti parehas nga aldaw.

Kuna pay ti mangidadaulo ti Liga ng Barangay ti siudad nga iti panagdamdamagda, adu dagiti nangibaga a maarigatanda a nga aggiddan a sangoen ti panagtakem kas opisyal ken panagiskwela wenno panagtrabaho.

“Makapaawan ti ganas ken talek ti administrasyon ni Duterte. Bakit pa kami makikibahaging kabataan sa isang gobyerno na malinaw na niloloko ang mamamayan,” kuna met ni Mendoza bayat ti interbyu kenkuana.

Kontra political dynasty

Iti forum kasilpo ti SK Reform Law ti NYC, kinuna ni Armando Angeles, Jr., cluster head ti NYC Norhern Luzon, a maysa kadagiti kangrunaan a gapu ket ti probisyon kontra iti dinastiya a politikal.

Ngem tinakderan ti mangidadaulo ti NYC-NL a rumbeng ken napateg ti probisyon tapno maikkan ti gundaway ti sabali nga agserbi. Kasta met a maliklikan kano ti pannakapukaw ti “check and balance” iti intar dagiti opisyal.

Iti Ilocos Sur, inaklon met dagiti electionofficers nakaapekto ti probisyon kasilpo ti policatical dynasty.

Segun iti Section 10, saan a mapalubosan dagiti agkandidato nga adda ti kapamiliada inggana maikadua a tukad ti nagkinnabagian iti dara (second degree of consanguinity) nga agdama a nabotosan nga opisial iti tukad barangay inggana rehiyon iti lugar a tumarayanda kas opisial ti SK.

Binabalaw met ni Kabataan Partylist Cordillera coordinator Christian Ruiz daytoy a panagbuya.

“To say that the vacancies SK posts is because of the anti-political dynasty, is not just narrow and unfounded but is reflective on how patronage politics is still being tolerated, if not promoted, by the people in power and disgustingly, by the COMELEC itself – even how indirectly it could be,” kunana.

Panangliklik ti linteg

Ngem para kenni Martin, addaan problema (loophole) ti probisyon kasilpo ti politikal a dinastiya.

“Nalawag iti linteg nga aplikado ti probisyon nu adda kabagyam nga agdama nga agtaktakem nga opisyal, saan pay a mismo iti relasyon dagiti agngayngayangay,” kinuna ti abogado.

Inpuntona nga adda dagiti kaso nga agpada a tumaray ti nagannak ken anak, wenno agkakabsat kas opisyal ti barangay ken SK. Innayonna nga dakkel a karit iti SK Reform Act a risuten daytoy a banag tapno saan a mapukaw ti kaipapanan ti probisyon.

Kinuna ni Angeles a kadagiti insayangkat ti NYC a summit idi naglabas ket maysa ti nasao a “loophole” kadagiti natratar.

“Ti rimmuar a panagkaykaysa ket no kaspangarigan nga adda ti nagannak ken annakda a mangabak iti eleksion, diay nagkandidato iti SK ti aglusulos ta isuda ti addaan ti probisyon kasilpo ti dinastiya,” palawagna.

Kinunana nga ar-aramidenen ti Department of Interior and Local Government (DILG) ti pagannurotan daytoy a banag. # nordis.net

Share

Leave a Reply