14% laeng ti ML claims ti inaprubahan ti HRVCB

Ni BRENDA S. DACPANO
www.nordis.net

BAGUIO CITY — Impablaak ti Human Rights Victims’ Claims Board (HRVCB) idi Mayo 7 iti facebook a 14.65% wenno 11,103 laeng a claims ti pinal nga inaprubaranda iti kabuklan a 75,749 a nangipila iti aplikasion idi 2014 ken 2015. Adu ti na-deny gapu ta kurang kano ti insubmitar dagiti claimants nga ebidensia.

Imposteda met iti rabii ti Mayo 11 ti Board Resolution No. 17-2018, Panangaprubar iti Gatad ti Maysa a Punto a Mausar iti Kompyutasion iti Distribusion iti Kuarta a Reparasion kadagiti Eligible Claimants. Segun ditoy, ti kabuklan a puntos ti 11,103 a claims ket 55,276 puntos. Ti kabuklan a pondo ti reparasion ket P9,771,639,388 a bingayen iti 55,276 isu a P176,779 ti gatad ti maysa a punto.

Baro nga anunsio ti claims board

Adun ti agrekreklamo a claimants ta imposteda ti rurodda iti facebook ti HRVCB. Arakattuten ti claims board gapu ta agpason ti mandatoda ket saanda pay laeng a naiwaras ti reparasion. Nagaramidda ti adjustment iti wagas ti panagiwarasda. Nangiruarda ti baro nga anunsio para kadagiti claimants.

Segun iti anunsio, “Kadagiti adda iggemna a STI, no mabalin ket saankayo pay a mapan iti Landbank kadagitoy nga oras (Mayo 11). Para iti kaammuanyo, nagrugin ti panangikabil iti pondo kadagiti account-yo. Ngem ita nga oras, 3,600 nga abiso pay laeng ti naipasa iti Landbank para iti panangiyalis ti pondo iti account dagiti claimants.”

“Kadagiti saan a maibilang iti abiso iti Mayo 11, mabalin a mapan iti Landbank iti malem ti Martes, Mayo 15, 2018. No awan ti abiso iti Martes, kayat a sawen ket tseke ti maawatyo.

Kadagiti awan ti naisumitena a STI iti board, madama a maiprosproseso ti panagaramid ti tseke.

Kadagiti taga-Manila, mabalinyo a maala ti tsekeyo inton Biernes, Mayo 18 iti opisina ti HRVCB manipud 9:00AM agingga 5:00PM.

Kadagiti claimants nga adda iti probinsia, madama a pagtungtungtongan ti board no kasano ken no kaano a maalayo ti reparasionyo.

Agyamankami unay iti agtultuloy a pannakaawatyo,” panangleppas ti anunsio.

Dagiti aramiden pay ti board

Iti maysa a forum iti UP Hotel idiay Diliman, Quezon City idi Mayo 5, kinuna ni HRVCB Chairperson Lina Sarmiento nga adda pay aramidenda sakbay nga agleppas ti mandatoda iti Mayo 12: 1) aramiden ti Roll of Human Rights Violations Victims; 2) ited ti reparasion a kuarta kadagiti eligible claimants; 3) motu propio recognition; ken 4) pannakisilpo kadagiti maseknan nga ahensia ti gobierno para iti nonmonetary reparations.

Malagip nga idi 2013 ket naipasa ti linteg RA 1036. Nailanad iti implementing rules and regulations a rebbengen ti claims board nga aramiden ti listaan dagiti biktima tapno bigbigen isuda babaen ti panangimaldit iti nagan dagiti biktima iti Roll of Human Rights Violations Victims (HRVVs).

Iti panangiwaras ti kuarta a reparasion, maikkan ti 10 puntos dagiti biktima a natay wenno desaparacido; 6-9 puntos dagiti natortyur, narames wenno naabuso a sexual; 3-5 puntos dagiti naibalud; ken 1-2 puntos dagiti dadduma pay a panaglabsing. Ti pondo ket manipud iti P10 bilion nga ill-gotten wealth dagiti Marcos iti banko iti Switzerland nga insubli ti Swiss bank iti gobierno ti Pilipinas iti kondision a maited kadagiti biktima ti rehimen ni Marcos.

Ti claims board ket agaramid ti judicial notice motu propio kadagiti indibidual a nalabsing ti karbenganda ken mabigbigda kas lehitimo a claimant iti HRVV ken maibilang iti Roll of Victims.

Sakbay nga agleppas ti mandatoda, makisilpo ken makikoordina ti claims board ken agaramidda ti memorandum of agreement kadagiti ahensia ti gobierno: Department of Health (DOH), Department of Social Welfare and Development (DSWD), Department of Education (DepEd), Commission on Higher Education (CHED), Technical Education and Skills Development Authority (TESDA), ken dadduma pay nga ahensia ti gobierno a mangted ti kasapulan a serbisio a nonmonetary wenno saan a kuarta a reparasion kadagiti HRVVs ken/wenno ti pamiliada. Ti pondo a mausar ditoy ket aggapu iti badyet ti maseknan nga ahensia manipud iti tinawen a General Appropriations Act. Ngem no kasano ti implementasion daytoy ket saan pay a nadetalye ti wagasna.

Binigbig ni Sarmiento a ti saan a naaramid ditoy ket ti community reparation gapu ta indibidual laeng ti ranta daytoy a linteg.

Kinuna pay ni Sarmiento nga agingga iti maudi nga aldaw iti panagdesisyon ti board, agtultuloy latta ti panagsangpet dagiti apila kadagiti kaso a saan a naakseptar (denied) ngem kasapulan nga isardengen ti board agingga agsapa ti Mayo 6 tapno adda panawenda a mangipablaak iti pinal a listaan iti Mayo 7.
Daytoy maudi a lawas ti panagserra ti HRVCB adu pay ti saan a nakasubmitar ti Landbank savings transaction information (STI) a kasapulan tapno ditoy a maited ti kuarta a reparasion dagiti aprubado a claimants. Agarup 2,000 pay ti saan a nakaisubmitar ti STI, kinuna ni Sarmiento iti maysa nga interview idi Mayo 10. Daytoy ket gapu ta naladaw met ti pannakaawat dagiti biktima iti notice of resolution ken adda pay ketdi saan a nakaawat ti notice. Dakkel a makaigapu ti narigat nga akses dagiti biktima iti impormasion ken pakdaar manipud iti board.# nordis.net

Share

Leave a Reply