Treyning ti instruktor iti adbokasiya iti karbengan-tao, nairussuat

Ni SHERWIN DE VERA
www.nordis.net

BAGUIO CITY – Timabuno dagiti natudingan nga opisyal para iti karbengan-tao dagiti organisasyon ti umili ken sektor iti Trainor’s Training on Human Rights Advocacy and Documentation. Naangay daytoy iti opisina ti Ilocos Human Rights Alliance (IHRA) iti Syudad ti Candon idi Abril 19-20.

Panggep daytoy nga ikkan ti naananay a kaamoan ken kabaelan dagiti organisasyon a mangted ti instruksyon kasilpo ti trabaho kasilpo ti karbengan-tao kadagiti kamengda.

“Paset daytoy ti kabuklan a kampanya tapno isagana ti umili, lalo dagiti kameng ti progresibo nga organisasyon iti kumarkaro a ranggas ti rehimen a Duterte,” palawag ni Mary Ann Gabayan, Pangkabuklan a Sekretarya ti IHRA.

Natalantan iti treyning dagiti batayan a prinsipyo kasilpo ti adbokasiya ken panangirupir ti karbengan-tao. Nagtalmeg dagiti instruktor kadagiti praktikal a tarabay ken rumbeng nga aramiden nu adda mapaspasamak a panglabsing ti karbengan ti umili.

“Dakkel a tulong kanyami daytoy iti kasasaad nga adu kadagiti kamengmi ket dakdakamatenda a supporter nu saan a kameng ti New People’s Army,” kuna ni Glenn Mendoza ti Anakbayan Ilocos.

Maipalagip nga idi Hunyo ti napan a tawen, walo a kameng ti oranisasyon idiay Bugnay, Candon City ti ninaganan ti 7th Civil Military Operations Company a kameng ti rebelde a grupo.

Para kenni Mel Pugyao ti Gabriela, mayat nga adda dagiti naibingay nga adal kadagiti napalabas a paspasamak, kas ti panangsango dagiti lider-mannalon ditoy Ilocos Sur dagiti pammutbuteng kanyada dagiti militar ken pupulis. Kunana a nangted daytoy ti praktikal a tarabay kanyana kaspangarigan a maipisok ti kapada a kasasaad.

Malaksid kadagiti prinsipyo ken tarabay, innadal pay dagiti nakipaset ti nilaon ti Comprehensive Agreement on Respect on Human Rights and International Humanitarian Law (CARHRIHL) ken probisyon ti linlinteg kasilpo ti panagkampo iti uneg ti komunidad.

“Namnamaen a babaen kadaytoy ket lalo pay a maparegta ti panagreport dagiti umili kadagiti panaglabsing ti karbengan-tao. Babaen ti sistematiko ken napudno a dokumentasyon kadagitoy, lallalo tayo a maibutbutatak ti ranggas ti gobierno kontra ti umili,” kuna ni Gabayan. # nordis.net

Share

Leave a Reply