Terrorist list ti DOJ, kinondenar dagiti mannalon

Ni RENZ KANG
www.nordis.net

CANDON CITY, Ilocos Sur — Kinundenar ti Solidarity of Peasants Against Exploitation (Stop Exploitation) ken dadduma pay nga organisasyon ti mannalon ti panangiraman ti administrasyon a Duterte iti maysa nga aktibista ti Ilocos iti listaan dagiti terorista. Nainaganan ni Sherwin De Vera, Regional Coordinator ti Ilocos Network for the Environment (Defend Ilocos) iti impila ti Department of Justice a petisyon tapno maideklara a terorista a grupo ti Communist Party of the Philippines ken ti New People’s Army.

“Ti pannakairaman ti nagan ni De Vera iti nasurok a 600 a nagnagan ket maysa a dakkel a biddut ken nalawag a panangpadakes iti kinataona,” segun iti pablaak ti grupo. Binabalawda pay a ti pannakairamanna iti listaan ket nangikabil kenkuana iti peggad iti biag ken pamilyana.

Innayon ti grupo a ti addang ti administrasyon ket mangipakita iti “gandatna a pagtalnaen, pagulimeken ken pukawen dagiti lehitimo a kritikona” ken ti “kinatakrot” gaputa saanna a maakseptar dagiti kamalina.

Nainget nga aktibista

Segun kadakuada, ni De Vera ket maysa nga “environmental ken human rights activist” nga “aktibo a nangidaulo kadagiti fact finding ken medical missions” kadagiti komunidad ti mannalon ken nainsigudan nga umili nga apektado ti militarisasyon ken proyekto a makadadael ti aglawlaw. Bigbigen pay ti Stop Exploitation a “dakkel ti pinasetna iti balligi ti kampanya” laban iti panagminas ti blacksand iti rehiyon.

Kinuna ni Zaldy Alfiler, pgkabuklan a sekretaryo ti organisasyon, imbingayna a “dakkel a paset ti biag ken panawen” ni De Vera ket intedna iti tignayan ti umili “para iti panangitandudo ti karbengan tao ken nasalun-at a demokrasya.”

Segun kadagiti immun-unan a pablaak ti nagduduma nga organisasyon, manipud idi agbasbasa pay ni De Vera iti kolehiyo ket aktibon iti panakipaset kadagiti isyu ti umili iti rehiyon. Manipud iti kina lider-estudyante, nagtultuloy isuna inggana nagbalin a maysa kadagiti mabigbig a personahe ti progresibo a grupo ti Ilocos.

Katinnulong ti umili

Iti pannakiyuman kadagiti lider mannalon, imbingayda a ni De Vera ket tumultulong ken makipagrikna kadagiti parikut ken labanda.

“No kaniak a biang, saan a terorista ni Sherwin. Laeng dagiti politiko a maapapektaran ti ar-aramidenna ti agipakat ti puersa kadagiti awan gaway nga umili,” kinuna ni Meliton Ibus, pangulo ti Sangir ken Urnos ti Mannalon ti Ilocos Sur (Sumapi). Innayonna a maysa ni De Vera kadagiti “mangiwanwanwan kadakuada” tapno maamuan dagiti linteg, pudno a kaipapanan dagitoy ken kasano a maar-aramat para iti pagsayaatanda.

Kinuna met ni Nicasio Lacaden, ti Timpuyog ti Umili iti Karayan Buaya (TUKB), a maysa isuna a “katinnulongmi a mannalon” iti panangidatag kadagiti problemami iti maseknan nga ahensya ti gobyerno.

“Dakkel ti naitulongna kadakami a bumaranggay ti Arangin, Paoc Norte, Paco Sur ken Bani ditoy Sta. Lucia para iti pannakaipasdek ti flood conrol iti lugarmi. Nakipaset isuna tapno mabukel ti resolusyon nga indatagmi kadagiti maseknan para iti proyekto,” kinuna ni Joseph Valdez, punong barangay ti Arangin.

Kinunana ni Valdez, “no saan a gapu iti tulongda iti pananggun-od iti proyekto mabalin a napunas ti Karayan Buaya, dagiti komunidad ken pangkabiagan dagiti nasao a barangay.”

Managsukisok a tao

Kinuna ni Alfiler nga adu ti impaay a tulong ni De Vera kas panangsukisok kadagiti parikut ken kampanya ti mannalon. Malaksid ti panagakemna kas kangrunaan a lider ti Defend Ilocos, isuna ket nakaempleyo kas researcher ti Katinnulong Daguiti Umili ti Amianan, Inc., maysa nga institusyon a tumultulong kadagiti komunidad ti mannalon ken mangngalap iti Amianan a Luzon.

“Isuna ti maysa kadagiti timmulong iti panagsukisok kasilpo ti industriya ti tabako ken pannakausar ti tobacco excise tax iti rehiyon, kasta met ti linakuan ti mani ken dadduma pay nga isyu kasilpo ti agro-industry,” kinuna ni Alfiler.

Innayonna pay a napateg kadakuada ti inaramid ni De Vera a panagsukimat ti kasasaad ti serbisyo a padanum iti rehiyon ken ti pannakadadael dagiti talon iti igid ti Buaya River. Segun kenkuana, ti resulta dagitoy ket nangitunda ti napigsa a basaran kadagiti kiddaw ti mannalon kadagiti maseknan nga ahensya ti gobyerno.

Kinunana a “ti nasayod ken nasinged a relasyonna kadagiti mannalon iti luglugar a pappapananna ti kangrunaan a tulbek kadagiti nabagas a resulta dagiti inaramidna a panagsukisok.”

Saan a terorista

Segun iti Stop Exploitation, dagiti kabaelan, abilidad ken aktibidad ni De Vera ket mangpaneknek ti kaawan kinaagpaysona nga isuna ket maysa a miembro ti terorista.

Saan a patien ni Lacaden ken Ibus dagiti pammabasol kenni De Vera. Kunada a “saan daytoy a terorista” no di ket maysa a mangisaksakit kadakuada a mannalon ken marigrigat nga umili.

Ti panagbuya met ni Ibus, dagiti politiko a sobra ti kinaturayda ken managimbubukod nga agpangpanggep a mangpaulimek kadagiti nakurapay ti agbenepisyo kadagiti pananglipit a mapaspasamak kadagiti aktibista.

“Nainget ti panangkontrana iti militarisasyon kadagiti lugar nga adda dangadang ti mannalon ken laban kadagiti makadadael ti aglawlaw a proyekto, kasta met ti pannakalabsing ti karbengan tao,” nayon ni Lacaden. “Daytoy ti kadakkelan a rason no apay a liplipiten isuna ti gobyerno,” kinunana.

Sakbay ti pannakairamanna iti nasao a petisyon, immun-unan a natiliw ken naibalud ni De Vera gapu iti parparbo a kaso a rebelyon. Naibalud isuna iti Abra Provincial Jail iti nakurang a maysa a bulan. Temporaryo a nawayawayaan isuna idi Enero 10 babaen ti piyansa. # nordis.net

Share

Leave a Reply