Statements: Takder kasilpo iti listaan ti terorista ti Department of Justice

Ti ALL-LEADERS MEETING TI CORDILLERA PEOPLES ALLIANCE – MT. PROVINCE
www.nordis.net

Dakami dagiti lider ti organisasyon ti nainsigudan nga umili iti Montañosa. Naummong kami tapno adalen ti agdama a kasasaad ken umno nga aramiden kadagitoy a panawen.

Kayatmi nga ipawaswas ti proscription petition ti Department of Justice (DOJ) a nakairamanan dagiti pito a lider ti Cordillera Peoples Alliance (CPA) a da Beverly Longid, Windel Bolinget, Joan Carling, Victoria Tauli-Corpuz , mismo a taga-Montañosa, ken da Joanna Cariño, Atty. Jose Molintas, Jeanette Ribaya-Cawiding a taga-Benguet. Kasta met ni Sherwin De Vera, taga-Ilocos Sur ken kameng ti Save the Abra River Movement a nangipaay ti serbisyo kadagiti komunidad nga apektado ti makadadael a panagminas ditoy Cordillera.

Saluadanmi isuda gapu iti panangitandudo ken panangidauloda ti dangadang para iti karbengan dagiti nainsigudan nga umili iti Cordillera, iti panangsalaknib iti nagtaudan a daga ken bukod a pangngeddeng.  Pinilida ti naisangsangayan a galad ti nainsigudan nga umili a mangilaban iti kolektibo a kalinteganda. Saanda a terorista!

Saan a baro ti panangliplipit, panangpadpadakes, panangranggas kadagiti tumaktakder para iti karbengan tao ken kas nainsigudan nga umili. Mainayon manen dagitoy immadu a parparbo ti gobierno a kaso kontra kadagiti miembro ken lider dagiti progresibo nga organisasyon ti umili.

Ar-aramiden ti gobierno dagitoy tapno agtalna dagiti umili a mangipraktika iti kultura a panangaywan iti nagtaudan a daga.  Kayatda a nawaya dagiti babaknang ken agturturay a mangala iti kinabaknang ti ili para iti pagganansyaanda.

Nalawag kadakami a ti masakbayan dagiti sumarsaruno a henerasyon ti gapu no apay a rumbeng a tumibker ken sumikad a mangilaban iti karbenganmi kas nainsigudan nga umili.

Karitenmi ngarud datayo amin a nainsigudan nga umili ken nadumaduma a sektor ta tumured, suppiaten ken ipawaswas ti listaan dagiti pabpabasolen ti DOJ a terorista kano ngem saan met nga agpayso. Imbes nga isuda ti rumbeng a mangisegurado iti hustisya ken mangsaluad iti kalintegan dagiti umili ket isuda mismo ti manglabsing kadagitoy. Maysa daytoy a pakakitaan ti tyranny.

Kas nainsigudan nga umili, saantayo a kultura ti buteng. Nangruna ta ti nakapusta ket daga, biag ken dayaw. Masapul a salakniban dagitoy kas nagkaykaysa a nainsigudan nga umili para iti naraniag a masakbayan.

Ipablaakmi ngarud daytoy iti amin a pagiwarnak tapno dumawat ti suporta a mawaswas daytoy parparbo a listaan ti DOJ.

Pinirmaanmi ita Abril 15, 2018. # nordis.net

 

Share

Leave a Reply