Panagtipon dagiti lider ti Defend Ilocos, naangay

Ni RENZ KANG
www.nordis.net

VIGAN CITY — Naaramid ti miting dagiti lider ti Ilocos Network for the Environment (Defend Ilocos) idi Abril 10 iti St. Benedict Institute ti Benedictine Sisters of the Eucharistic King of St. Benedict Priory idiay Pantay Fatima, Vigan City. Timmabuno iti aktibidad dagiti mangibagbagi ti nadumaduma a kameng nga organisasyon ken institusyon ti grupo.

Kangrunaan a panggep ti tungtongan ti panangadal dagiti sinango nga isyu iti naglabas a tallo a tawen, panangpasingked dagiti kampanya ken addang pang-organisasyon tapno maannatupan ti baro a kasasaad. Indauluan ni Bishop Virmilion Tagalog, mangidadaulo ti Regional Coordinating Committee (RCC) ken ni Sherwin De Vera, Regional Coordinator ti panangipataray ti miting.

Basar iti imbingay a report ti sekretaryat, sinango ti Defend Ilocos ti tay-ak ti panagminas, panangtaming iti basura, proyekto nga enerhiya ken turismo, ken dagiti pangta kadagiti mangitantandudo ti panangsalaknib ti aglawlaw. Kadagitoy, kadadakkelan a balligi ti nagun-od iti benneg ti panagminas ken laban iti iligal a pagbasuraan. Kadagiti nasao nga isyu, babaen ti nadumaduma a tignay, naiduron dagiti maseknan nga ahensya a mangiruar ti cease-and-desist order kontra kadagiti naglabsing. Karaman a nailanad kadagiti nalatak a nagun-od ket dagiti kiniddaw ti grupo a tulong manipud iti lehislatura ti probinsya ti Ilocos Sur kas ti panangsuppiat iti makadadael a panagminas.

Napasingkeddan met iti tungtongan ti panagtalinaed ti panagminas ken dagiti proyekto a iti enerhiya kas kangrunaan a sanguen ti grupo kadagiti sumaruno a panawen. Numanpay kuna ni Bp. Tagalog nga adda latta met panangtaming kadagiti dadduma pay nga isyu. Maikkan talmeg iti panangsango ti organisasyon iti aplikasyon ti Cordillera Exploration Company, Inc. iti Cervantes, Ilocos Sur ken ti maitakder a mini-hydropower dam idiay Naguilian, La Union.

Nairuangan met ti dawat ni De Vera a mapabassit pay ti akemenna iti organisasyon tapno maikkanna ti atensyon ti panangsangona iti kasona ken pannakairamanna iti listaan ti terorista nga inruar ti Department of Justice (DOJ). Innayonna pay nga adda met laeng ti kiddaw ti Katinnulong Daguiti Umili iti Amianan, Incorporated, ti opisina a pagtrabtrabahuanna a liklikanna pay ti ag-field work ken agyan pay laeng iti opisina kas addang panseguridad.

Maipalagip a natiliw ken naibalud isuna idi Disiembre 2017 gapu iti parparbo a kaso a rebelyon. Napalubusan isuna nga agpiyansa idi Enero 10, 2018. Ngem kadaytoy laeng napalabas a bulan, naammuan a kabilang met ti naganna iti terrorist list ken petisyon ti DOJ a mangideklara a terorista a grupo ti Communist Party of the Philippines ken New People’s Army.

Pinatgan ti miembro ti kiddawna ngem dinawatda a saan isuna nga agikkat, ngem adda laeng ti madutukan a focal person, a mangakem pay ti dakkel a paset ti trabahona. Partikular nga iyawatda latta kaniana nga akem ti panangiwanwan ti trabaho iti edukasyon ken panagsukisok. Nakipagkaykaysa met ditoy ni De Vera.

Malaksid daytoy, inaprubaranda ti maysa a resolusyon a mangpampaneknek iti integridad ni De Vera ken kinaulbod dagiti akusasyon kontra kenkuana. Karaman ti ipasigurado dagiti nakipagpaset ti tulongda a mangkiddaw kadagiti lokal a gobyerno iti kapada a resolusyon.

Nadutokan a focal person ken naikkan otoridad a mangibagi ti organisasyon ken RCC ni Rev. Marcelino Mariano, mangibagbagi ti Ilocos Sur Ecumenical Movement iti Defend Ilocos. # nordis.net

Share

Leave a Reply