Makan a la Pinoy: Quekiam

Ni BRENDA S. DACPANO
www.nordis.net

PAGSIMUTAN. Nagbalinen a paset ti panagraman ti Filipino ti apgad ken nanam nga ipapaay ti baggoong a kadawyan a maaramat a pagsimutan ken pagtimpla iti nadumaduma a makan. Makita ti nabaggoong nga ikan iti kannigid ORIHINAL. Ti naluto a kikiam a ginandat ti nagsurat a lutoen basar ti sigud a resipi manipud iti Tsina. PHOTO NI bRENDA S DSCPSNO

Quekiam

Ti quekiam wenno ti ammotayo a kikiam a popular ditoy pagilian ket ‘tay mailaklako iti igid ti kalsada nga adda iti kariton. Kadawyan daytoy a kakuyog ti fish balls, squid balls ken chicken balls. Aglanglanga daytoy a kasla sausage ngem natirad ti agsumbangir nga ungtona.

Ngem ti orihinal a quekiam ket naggapu iti China. Naaramid daytoy manipud iti giniling a karne ti baboy ken pasayan a nabalkot iti bean curd sheet wenno tawpe. Adda laeng rigrigatna a sapulen ti paggatangan ti tawpe. Nabayag nga agbirbiroak ti paggatangan ti tawpe ngem iti laeng nabiit a nakasapolak iti uneg ti tiendaan ti Baguio, iti abay ti bagsakan ti natnateng iti Hangar Market.


Ramen:

½ kilo giniling a karne ti baboy

¼ kilo pasayan

1 carrot, tinadtad iti pino

2 sibuyas, tinadtad iti pino

3 ngipen a bawang, tinadtad iti pino

¼ tasa gawgaw

1 kutsarita asin

1 kutsara asukar

1 kutsarita five spice powder

8-10 tawpe

mantika

Panangisagana:

1. Paglaoken amin a ramen malaksid iti tawpe.

2. Bingayen ti mixture iti agkawalo wenno agkasangapulo. Balkoten a kasla lumpia ti tunggal gudua iti maysa pidaso a tawpe. Uliten daytoy agingga mabalkot amin.

3. Paalibungbongan wenno pasengngawan iti 15 minutos. Adawen ken pabaawan.

4. Iprito iti adu a mantika (deep fry). Ngem no saan pay a kanen a dagus mabalin nga ibenben iti freezer iti uneg ti makabulan. Ikabil iti freezer bag wenno pagikkan a makaluban ken ibenben iti freezer.

5. Idasar nga adda sawsawanna a sweet-sour sauce wenno mabalin a pangsagpaw iti ginisa a pansit wenno noodle soup.

Five spice powder

Adda ti magatang kadagiti spice stores a five-spice powder, ngem no awan ti masarakanyo paglaoken dagiti sumaganad:

3 kutsara a cinnamon powder

6 nga star anise wenno 2 kutsarita anise seeds

1 ½ kutsarita fennel seeds

1 ½ kutsarita Szechuan pepper wenno 1 ½ kutsarita paminta

¾ kutsarita cloves powder

Paglaoken amin nga spices ken pulbosen babaen iti almiris wenno spice grinder. Adu ti pagbalinanna daytoy. Mabalin nga ilebben iti makaluban a garapon ken ikabil iti uneg ti refrigerator tapno agbayag.# nordis.net

Share

Leave a Reply