Makan a la Pinoy: Longanisa

Ni BRENDA S. DACPANO
www.nordis.net

Ti longganisa ket native a sausages ti Pilipinas a natimplaan iti nadumaduma nga spices manipud kadagiti rehiyon ken probinsia a nagtaudanda. Naggapu daytoy iti Spain a longaniza nga atiddog a pork sausage a natimplaan iti cinnamon, anis, bawang ken suka.

BINALONAN LONGGANISA. Adu ti magatang a Binalonan longganisa iti tiendaan ti Binalonan iti paset ti wet market. Kaaduan a puesto ti karne ket addaan met laeng iti lako a longganisa. (INSET) Naraay a longganisa ditoy nga ili. Photo ni Brenda S. Dacpano

Addaan ramen a protina kas ti karne ti baboy, baka, nuang, manok, tuna; ken uray natnateng kas ti sabonganay, ukis ti saba a dippig ken vegetable proteins kas extenders wenno pampaadu (para iti komersial). Kadawyan a maar-aramid iti kaababa a maysa agingga ¼ pulgada iti diametro ken dua agingga tallo a pulgada kaatiddog. Ti longganisa a naipaseksek iti natural wenno synthetic tube casing ket kadawyan a maipaburek iti danum iti nganngani malipus agingga maatianan ken maiprito iti bukodna a mantika agingga agkayumanggi.

Sumagmamano a klase ti longganisa:

Alaminos (Pangasinan) longganisa. Giniling a karne ti baboy a natimplaan iti bawang ken asin manipud iti repinado nga asin ti baybay ti Alaminos. Addaan naisangsangayan a maris duyaw-naranja (yellow-orange) gapu iti ramenna nga asuete. Naipaseksek iti bagis ti baboy ken agbilang iti innem kada silpo a napagsisina babaen iti iit ti niog wenno toothpick. Agraman a kasla Vigan ken Lucban longganisa.

Batac (Ilocos Norte) longganisa. Agpada ti ramanna iti Laoag longganisa, a naglaok ti suka ken bawang. Atiddog daytoy a longganisa a nakunikon a kasla uleg iti pannakapaketena. Mailambong iti danum agingga maatianan ken maiprito iti bukodna a mantika agingga agkayumanggi bassit. Maiw-iwa iti babassit ken maisubli manen a maiprito agingga agkayumanggi.

Binalonan (Pangasinan) longganisa. Agpada ti ramanna iti Alaminos longganisa malaksid a saan a natimplaan iti asuete. Nagsisina a naipaseksek iti bagis ti baboy ken nagalutan iti lubid ti agsumbangir nga ungto. Naigalut iti raay nga agarup maysa kilo.

Guagua (Pampanga) longganisa. Giniling a karne ti baboy a natimplaan iti asin ken suka. Naisangsangayan ti ramanna a naalsem.

Ibanag wenno Tuguegarao longganisa. Umalsem, umapgad ti ramanna nga addaan bawang. Kaasping ti Vigan Longganisa.

Laoag (Ilocos Norte) longganisa. Addaan ramen a giniling a karne ti baboy, asin, paminta, bawang ken suka nga Iloco. Nalatak ken naisangsangayan ti raman ti suka nga Iloko ken ti nabanglo a bawang ti Ilocos. Addaan kita nga ababa ken atiddog, ken ti atiddog ket agdagsen iti ¾ agingga maysa a kilo. Iggem ti Laoag ti Guiness record a kaatiddogan a longganisa iti lubong.

Lucban (Quezon) longganisa. Natimplaan iti adu a bawang a longganisa a karne ti baboy a derecado wenno spicy.

Mangaldan (Pangasinan) batutay. Dakkel ken nabussog a longganisa nga addaan ramen a giniling a karne ti nuang. Nalatak ti raman ti bawang ken addaan raman nga spicy ken nasam-it bassit.

Vigan (Ilocos Sur) longganisa. Naaramid manipud iti karne ken taba ti baboy, bawang, asin ken suka nga Iloco ken soy sauce para iti kolorna. Addaan maysa a dosena ti tunggal silpo. Maibitin tapno agmaga bassit. Kadawyan a kanen a maisiwsiw iti suka nga iloko a napettakan ti sili a sairo.

Urdaneta (Pangasinan) longganisa. Aglaon ti giniling a karne ti baboy, bawang, asin ken paminta. Kaasping ti Alaminos longganisa ngem ad-adu ti linaonna a taba ken saan a natimplaan iti suka. # nordis.net

Share
« «  Burburtia Krokis   |   Diaries From The Field: Mauway  » »

Leave a Reply