Makan a la Pinoy: Adobo a karne ti kalding

Ni BRENDA S. DACPANO
www.nordis.net

Maysa ti adobo kadagiti paboritok a luto, karne man dayta wenno nateng a sabonganay wenno kangkong.

Adobo a karne ti kalding. Photo ni Brenda S. Dacpano

Iti nakaikamangak, ti kadawyan a pananglutoda iti kalding ket kaldereta, pinapaitan, sinalamagian nga ulo ken kilawen. Ngem ita, adobuek ti kalding a pagraranudanmi a kas nakaugalianmin nga agtitipon tunggal Sabado Gloria.

Ramen:

1 kilo karne ti kalding
2 pulgada laya
1 kutsara asin
1 sibuyas
3 kutsara mantika
2-3 ulo a bawang Ilocos
1/2 tasa soy sauce
1/2 tasa suka nga Iloco
1 kutsarita paminta
4 pidaso bulong ti laurel
sili ken bulong sibuyas (optional)

Panangisagana:

1. Tegtegen ti karne ti kalding a pang-adobo, agarup dua pulgada kuadrado.

2. Iti dakkel a kaserola, ilambong ti karne iti danum. Ikabil napitpit a laya, asin ken sibuyas. Pagbureken iti 10 a minutos. Aramiden daytoy tapno maikkat ti angdod ti kalding. Paik-ikan.

3. Iti kaserola, ipapudot ti mantika. Igisa ditoy ti napitpit a bawang agingga ag-brown bassit.

4. Ipisok ti nalambong a karne. Igisa agingga golden brown. Timplaan iti soy sauce ken paminta ken ilaok ti dadduma pay a ramen.

5. Nayonan iti uppat a tasa a danum. Kiwaren sagpaminsan. Iluto agingga maatianan ken nalukneng ti karne.

6. Idasar a napudot ken parabawan ti natadtad a sili ken bulong ti sibuyas, no agusar. # nordis.net

Share

Leave a Reply