Diaries From The Field: Mauway

Ni LENVILLE SALVADOR
www.nordis.net

Kalpasan ti mano oras a byahe ken pinnagna, nadanon ko ti nabati iti dati a balay ni Felix Agtang iti Mauway, Barangay Cabangaran, Vintar, Ilocos Norte. Maysa isuna kadagiti taga-Mauway a nagresidenten iti Isic-Isic sipud pay idi 1990s. Ginagarak ti barangay idi Abril 7, 2018 tapno danunen ken kakonsulta dagiti padak a biktima ti martial law ti diktador a ni Ferdinand Marcos.

Pinanawan dagiti residente ti Mauway karaman ni Felix dagiti balay ken pammataudan ti pangkabiaganda idi dekada ti 1990 gapu iti awan sardayna a militarisasyon ken panaglabsing iti pangtao a karbengan. Saanen a maibturan dagiti residente ti rigat nga impaay ti militarisasyon a nangrugi pay idi 1984 isu a nagdesisyondan nga umakar iti Dasar a paset ti Barangay Isic-isic.

Umuna a nadanunko ti Mauway idi 198. Kaduak idi daydi Abogado David Bueno ken sumagmamano a kaduami iti Ilocos Norte-Laoag City Human Rights Organization. Ti gagangay a ruta tapno madanun ti Mauway idi a panawen ket magnaka manipud iti Cabangaran, sa kan to sumurong nga agpaamianan a daya babaen iti panangsurotmo iti karayan.

Binisitak manen ti Mauway idi 2016 babaen ti pannagna iti agarup maysa nga oras manipud Dasar. Nasang-at daytoy a ruta ngem maikkat ti bannogmo no maimatangam ti napintas a bambantay ken matannawagam dagiti maris balitok a dawa ti pagay kadagiti taltalon. Ngem ti makaallukoy la unay ket ti makapabang-ar a karayan a pagkalapan iti lames ken pagbuboan iti udang. # nordis.net

Share

Leave a Reply