Diaries From The Field: Basuram, iyawidmo

Ni BRENDA S. DACPANO
www.nordis.net

Idi napankami nagpasiar idiay Hundred Islands, apaman a simmangpetkami iti Lucap Wharf iti Barangay Lucap, Alaminos City, kasapulan nga agrehistro iti opisina ti Hundred Islands National Park (HINP). Nagbayad kami ti environmental ken entrance fee, ken nagdeposito ti P200 para iti dua supot a pagikkan ti basura.

A bird’s eye view of several of the total 124 islands in Pangasinan but officially called Hundred Islands. The City of Alaminos is implementing its program “Basura Mo, Iuwi Mo” since last year and is gaining support from the tourists. Also part of the cleanup efforts are the ‘scubasureros” who dive for garbage. The ‘scubasureros’ started collecting garbage from the sea since the Hundred Islands National Park management was turned over to the local government in 2005. Photo by Brenda S. Dacpano

Inrusat ti Siudad ti Alaminos ti programana a Basura Mo, Iuwi Mo wenno Basuram, Iyawid Mo idi napan a tawen. Panggep daytoy ti liter-free a HINP.

Ti tunggal grupo a mapan kadagiti isla ket kasapulan nga agdeposito iti P200 para iti dua a plastic bags a pagibellengan ti basura, maysa para iti mabulok (biodegradable) ken maysa para iti saan a mabulok (non-biodegradable). Ti pasahero ti maysa a bilog ket maibilang a maysa a grupo. Aglaon ti 15 a pasahero ti dakkel a bilog.

Kalpasan ti pasiar, no maisublin iti mainland ti bags nga addaan basura iti Waste Disposal Booth ket maisubli met ti deposito. Kas insentibo ti nagisubli ti basura, adda maited a gift card a Free Entrance ken Environmental Fee para iti dua iti sumaruno a panagbisita iti HINP.

Sakbay daytoy a programa, probleman ti siudad ti basura nga inyeg ti turismo iti lugar. Segun iti maysa a nakaumanko a nakapamin-anon a nagpasiar iti lugar, dakkel ti nagbaliwanna ta dimmalus ti aglawlaw ken naur-urnos dagiti bilog a maipapaabang a panglikmot kadagiti isla.

Adu pay ti saan a siaammo a mangipatungpal iti daytoy a programa kas nakitak iti sumagmamano a naiwara a basura ngem dakkel ti nagbaliwanna, kas kuna ti kakuyogko a nagpasiar a sigud a nakakitan ditoy.

Maipatpatungpal ti kastoy a programa kadagiti lugar ti turismo kas iti Palawan ken uray iti Mount Pulag ken dadduma pay a paset ti pagilian. Nasayaat daytoy a tuladen ti Siudad ti Baguio iti panangmanehar ti basura nangruna iti panawen ti Panagbenga ken itatta Holy Week a kaaduan ti dumayo a turista ditoy siudad. Kasapulan laeng a mapino ti sistema ken detalye daytoy tapno umannatup iti kasasaad ditoy. # nordis.net

Share

Leave a Reply