Statements: Pondo ti RA 7171, direkta nga iserbi kadagiti mannalon

By STOP EXPLOITATION
www.nordis.net

March 22, 2018

Panawen manen ti tabako. Iti agdama ket kapigsa ti panaggatud, panagpugon ken panaglako. Panawen tapno dagiti mannalon ket lak-amenda kuma ti bunga ti ling-et, bannog ken sakripisyo a nangpartuat ti produktoda a tabako. Ngem ti kinapudnona, saan a dagiti mannalon ti ad-adda a maragsakan tunggal panawen ti panagtatabako nu di ket dagiti middlemen ken trading centers kas iti Philip Morris Fortune Tobacco Corporation, Universal Leaf Philippines, Inc., Trans Manila, Inc. ken dadduma pay a kompanya ti tabako. Malaksid iti nababa a presyo a paggatang manipud kadagiti mannalon, dagitoy a trading centers ken middlemen ket ar-aramiden da pay ti naduma-duma a panangswitik kadagiti mannalon tapno agakopda iti dadakkel a ganansya kas ti downgrading, under-weighing, ken stop buying wenno Semana santa syndrome.

Iti uneg ti 25 a tawen sipud pay nagbalin a linteg ti R.A. 7171, nagtalinaed a maluglugi ken marigrigatan dagiti mannalon nga agmulmula ti tabako. Iti bangirna, agpaspastrek met dagiti local government units (LGUs) iti ginasgasot a milyon a pisos manipud iti excise tax ti tabako. Segun iti Department of Finance agdagup iti PhP 91.60 bilyon ti nakolekta a buwis manipud iti tabako idi tawen 2016 ken mapatta-patta a PhP120.66 bilyon ti nakolekta itay napan a 2017. Segun pay iti nasao nga ahensya ti gobyerno, iti napalabas a lima a tawen ket agarup 40% ti kabuklan a pondo dagiti LGUs iti Ilocos ket naggapu iti excise tax ti tabako. Kayatna a saoen, dakkel ti papel dagiti mannalon iti panagtayyek ti ekonomya ken politika iti rehiyon. Nupay dadakkel dagitoy a pondo, saan met nga agseserbi para kadagiti mannalon gapu iti pananggamulo wenno discretion dagiti LGUs nu kasano a busbosen ti nasao a pondo. Ti binilbilyon a pisos a bingay ti tunggal probinsia ti Ilocos ket umanay kuma a mangpasayaat iti panagbiag dagiti mannalon nu napintas ti pannakabusbosna. Ngem kaaduan nga LGUs ket saanda a sursuruten nu ania ti nakalanad iti linteg. Kas iti probinsya ti Ilocos Norte, madama pay laeng ti imbestigasyon ti Kongreso gapu iti maipagarup nga adu ti anomalya ti pannakabusbos ti agarup P1.5 bilyon a bingayna iti tobacco excise tax a pakairamanan ti P66.45 milyon a pinaggatang ti gobierno probinsyal kadagiti multicabs ken P193.4 milyon a naigatang ti agas, libro, sanitizer, Rosa Coaster, uniforms, sprayer ken foliar fertilizer manipud iti pondo ti RA7171.

Nalawag nu ania ti nakalanad iti linteg a RA7171 a dagitoy ti mabalin a pangigastusan iti nasao a pondo. 1) kooperatiba dagiti mannalon a mangpadur-as iti panagbiagda, 2) livelihood project 3) agro-industrial projects ken 4) infrastructure kas kuma farm-to-market roads. Dagitoy ket saan a sursuruten dagiti kaaduan nga LGUs.

Segun iti report ti DBM Local Budget Memorandum No.71 a napetsaan ti September 21, 2015 ken Memorandum Nos. 72 ken 73 a napetsaan ti Marso 8, 2016, agdagup iti PhP10.72 bilyon ti pakadagupan a bingay ti tallo a probinsya manipud iti excise tax ti tabako. Nu nausar iti umiso a wagas daytoy a pondo, umdas tapno napadur-as ti panagbiag ti agarup 37,000 a mannalon iti intero nga Ilocos. Kas pagarigan, pagaramid iti irrigasyon a mangpasayak iti 26,805 ektarya a kataltalonan, paggatang iti 4,765 a traktora a napintas ti klasena. Sobra-sobra nga uray iti sagdudua a traktor ti amin a barangay iti Ilocos a ti kangrunaan a pagsapulanda ket panagtalon. Nu ilasin ti 38% ti P10.72 bilyon ket umanay a mangsolbar ti gastos para iti maysa nga ektarya ti 37,000 a mannalon ti tabako.

Ngarud, aw-awaganmi amin nga agtuturay iti intero a Rehiyon Ilocos nga iserbida kuma a nasayaat ti pondo ti RA7171 kadagiti mannalon. Kidkiddawenmi kadagiti LGUs nga adda kuma automatic appropriation manipud iti nasao a pondo tapno agserbi a suporta pinansyal para kadagiti mannalon kangrunaanna nu adda kalamidad. Kidkiddawenmi pay ti uray PhP10 laeng nga insentibo iti kada kilo ti tabako mi wenno P20 ribu a nayon ti pastrekmi iti kada ektarya.

Aw-awaganmi met ti National Tobacco Administration (NTA) nga ipatungpalna kuma ti obligasyonna a mangisigurado nga amin a proyekto a pondoan ti RA7171 ket direkta nga agserbi wenno agbenepisyo dagiti mannalon kas nailanad iti Rule VIII Section 3 ti Joint Circular No.001-2014 a pinaruk-atan ti Department of Finance.

Presyo ti tabako ingato, P128 kada kilo!
Isardeng ti downgrading, under weighing ken semana santa syndrome!
Iserbi a direkta kadagiti mannalon ti pondo ti RA7171!
Isardeng ti korapsyon!
Pondo ti 7171 iserbi para iti pudno a reporma ti daga! # nordis.net

Share

Leave a Reply