Poetry: Rissik

Ni BRENDA S. DACPANO
www.nordis.net

Iti sardam magagaranak
panagsangbay sumuno nga aldaw,
isisingising ti init
agrissik iti landok ti tawa a bassit.

Sumuno nga aldaw ti bista,
madengngeg ti kaso a parparboda
kadatao ipabpabasolda,
nasudi nga aramid padpadaksenda
pagsayaatan ti kaaduan,
pagimbagan dagiti nakurapay,
hustisya ken kappia
magun-odto pay ngata?

Botas a kombat dumalagudog,
naukas ti rehas a landok,
apagbiit a maruk-atan
iti pagbaludan a nakakulluoban.

Dumanarudor a lugan,
soldados a wananan,
napalalo ti butengda,
makatakiasakto la ngata.

Arubayan ti korte,
iti sidong ti kayo
agpaspasangbay kasingin ti puso,
iliw nagkay-ab, apagsipasip a taldiap,
saan a makaasideg,
saan a makalailo
amangan no pati isuna
ket maibalud, mapungo.

Arungaing ti puso
Agpada ken ni dungngo
Pannakabag-en ukasen,
Manangidadanes usigen.

Dumtengto ti panawen
Maidadanes, mairurumen
Agbaringkuas, bumangonen
Rissik parubroben! # nordis.net

*Naputar iti uneg ti pagbaludan idi 1983 iti Camp Bado Dangwa, La Trinidad, Benguet
*Immuna nga impablaak ti Komisyon ng Wikang Filipino ken Pambansang Komisyon para sa Kultura at mga Sining iti libro a Dandaniw Ilokano: mga tulang Ilokano, 1621-2014.

Share

Leave a Reply