Makan a la Pinoy: Paria, baboy ken tofu ensalada

Ni BRENDA S. DACPANO
www.nordis.net

Nasayaat ti paria para iti panangpababa iti blood sugar. Mabalin nga aramiden nga ensalada a solo laeng a paria wenno malaokan iti nadumaduma a klase ti protina ken nateng.

Paria-baboy-tofu ensalada. Photo ni Brenda S. Dacpano

Ad’toy ti sumagmamano a suhestion a kumbinasyon ti paria ensalada: tofu, karne ti baboy/manok, nalingta nga itlog, itlog na maalat, delata a tuna wenno sardinas. Iluto nga umuna dagiti karne a kas adobo, tinuno wenno prito sakbay nga ilaok.

Ramen:

¼ kilo karne ti baboy
1 bloke tofu
1 paria (¼ kilo)
1 sibuyas wenno 3 lasona
1 kutsara suka
2 kutsara soy sauce wenno
2 kutsara patis wenno 1 kutsarita asin
1 kutsara asukar, brown wenno diru
sangapirit a paminta
sili a sairo (optional)
mani (optional)
mantika a pangprito

Panangisagana:

1. Iwaen ti ti tofu a pakuadrado a maysa pulgada wenno babbabassit pay. Iprito iti mantika agingga ag-brown bassit. Paik-ikan.

2. Kasta met nga iwaen ti karne ti baboy a kas kababassit ti tofu. Iprito agingga ag-brown wenno nasarangsang.

3. Buguan ken ikkaten ti bukel ti paria. Iwaen iti naingpis.

4. Iwaen met iti naingpis ti sibuyas wenno lasona. No agusar ti sili, iwaen met daytoy iti naingpis.

5. Iti dakkel a malukong, paglaoken amin a ramen.

6. Idasar a naparabawan ti narumek a mani. # nordis.net

Share
« «  Burburtia Krokis   |   UMA tours ‘Bungkalan’  » »

Leave a Reply