Diaries From The Field: Panagkasangay

Ni DONNA RABANG PETA
www.nordis.net

Cake, pansit, spaghetti, salad ken dadduma pay, gagangay a maidasar iti lamisaan kas panangselebrar iti panagkasangay. Iti baryo, gagangayen ti patupat, binagkal, ginettaan a pinaltaw wenno lubilubi ken dadduma pay nga aggapu iti mulmula iti arubayan, solb ti buksit!

Kadagiti awanan, ordinaryo laeng daytoy nga aldaw a lumabas. Saan a kasapulan ti kuarta tapno agselebrar iti panagkasangay. Ngem kadagiti babaknang, nagarbo ti maidasar, adda ti agkakangina a makan, mainum nga arak, adda pay videoke –daytoy ti kunada a padaya!

Aldaw ti Domingo, aldaw ti Dios, Marso 11 – aldaw ti kasangayko. Maysa nga ordinaryo nga aldaw dagiti kas kaniak a misyonera. Addaak iti byahe nga agsubli iti mission area.

Kinunak iti bagik, “ordinary day, byahe a byahe… whole year round a byahe…” ngem awan reklamo.”

Pammendisyon ni Bishop Jun Andaya, ti Apostolic Vicariate of Tabuk ti impaayna kaniak iti daytoy nga aldaw. Happy birthday!

“Mano a baka ti pinartem,” kantiyaw dagiti makaam-ammo kaniak. “Mammaminsanto lattan ti panagpadaya inton agtawenak ti 50!,” inkatawak.

Kalpasan ti misa idiay Tabuk, intuloyko manen a nagbyahe mapan iti lugar a pagmisyonanmi. Apaman a simmangpetak, adda ti immay nagawis a mapan kami kano makipangrabii iti maysa a balay. Sakbay ti pangrabii iti dayta a balay, inyaramid dagiti kakaduak a mamadre ti pammendisyon iti pamilia (family blessing). Paset ti family blessing ti panangibingay ti kasasaad ti pamilia. Iti napalabas a tawen, natay ti ama ti pamilia daytoy a pagtaengan.

“Dakkel a kawami ken rigatmi idi natay ni lakay ko, nadunggo ken responsable nga ama ken asawa,” kinuna ti balo. “Ngem kasta a talaga ti biag kasapulan nga agtuloy nga umanges,” inayonna.

“Birthday daytoy maysa a misyonera itatta!,” imbaga ti maysa a madre.

“Sige man ngarud Sis Donna ibingaymo man met ti kabibiagmo ta birthday’m met itatta,” kinunada.

Naimas ti linuto ni Manang Wilma, sapsapuriket a manok, pinikpikan, binungor ken kape! Solb ti birthday celebration! Happy birthday to you! Impukkaw dagiti kakaduak kalpasanda a nagkararag ken nagkanta.

Kas maysa a misyonera, uray sadino a suli ti lubong a papanan, birthday man wenno saan, tuloy ang ligaya! Tuloy ang misyon! Kadawyan a dagiti tattao a mangpasangbay kenka ti kaduam a mangselebrar ti birthday.

Saankon a mabilang no mano a tawen a nakadennak ti pamiliak bayat ti panagkasangayko. Adda maysa a pagsasao, “pamilia ti umuna sakbay ti dadduma,” wen pudno unay dayta. Ti pamilia, nangruna ti nagannak ket isu ti mariingan sipud pay maipasngay ti maysa a tao. Ti maysa a pamilia ket saan laeng a nakakahon iti maysa a pagnaedan wenno balay. Ti pamilia ket maysa a komunidad a mamati iti maymaysa a panggep, maymaysa a tarigagay tapno padur-asenna dagiti kameng ti komunidadna para iti pagsayaatan ti kaaduan. Agtitinnulong iti panagdur-as iti kada pamilia a kameng ti komunidad.

Saan a maliklikan ti rikna ken gagar a makadenna ti pamilia iti panawen nga agkasangay. Ken ad-adu dagiti panawen a marikna ti liday ngem maarpawan met laeng daytoy ti ragsak no makita dagiti tao nga ipatpategdaka ken babaen ti isim ken raniag iti rupada.

“Iti daytoy a lugar a nakaipanak, iturongko kenkuana ti panunotko ta kasta unay ti lidayko. Inyegna dagiti dalluyon ti ladingit iti kararuak; kas layus nga agdaranudor ti riribuk iti kaunggak. Apo, sika ti pastorko, adda aminen a masapulko. Ipaaymo kaniak ti baro a pigsa.” PSALM 42:6; 23:1,3.

Dagiti misyonero, makibiagda iti umili ken tumulongda iti panangpadur-as ti komunidad nangruna iti ispiritual ken panggimong a pagkasapulan. Makipagriknada nangruna kadagiti awanan estado iti gimong, dagiti nabaybay-an, maidaddadanes ken magunggundawayan.

Selebrarantayo ti panagkasangay ken ti baro a biag nga inted ti Dios babaen ti pannakipagbiag iti umili, ipaay ken ibingay ti serbisyo ken kinasirib iti komunidad saan laeng nga iti uneg ti pagtaengan. Naimpusuan a panagserbi nga awan ti dawatenna a subalit. Daytoy ti kaipapanan ti selebrasyon, daytoy ti kaipapanan ti panagkasangay – ti maiyanak manen tapno agserbi iti pada a tao. Daytoy ti awag ti namarsua, ken daytoy ti pudpudno a misyon tayo, agserbi iti pada a tao kas iti panagserbi ken panangidaton ni Hesus iti biagna. # nordis.net

Share

Leave a Reply