Statements: TRAIN law ken Cha-Cha ni Duterte, nakarkaro a mangparigat iti umili

Ni ALYANSA DAGITI MANNALON ITI ILOCOS NORTE
www.nordis.net

Apaman timmapog tayo iti baro a tawen 2018, naipasabat kadatayo ti saplit ti TRAIN ni Duterte – ti Tax Reform for Acceleration and Inclusion Law wenno Republic Act 10963 nga isu ti umuna kadagiti 5 a pakete ti tax reform program ti agdama nga administrasyon.

Ti kangrunaan a panggep ken linaon ti TRAIN ket makakolekta ti P137 bilyon a buis ita a tawen 2018 wenno P1.163 trilyon inggana 2020 tapno mapondoan dagiti proyekto a impraistruktura iti babaen ti programa a Build, Build, Build (BBB) ti gobierno, a makatulong kano a mangpartuat iti adu a trabaho tapno mangitag-ay ti panagbiag manipud iti kinakurapay. Ngem agpayso ngata a maitag-ay ti panagbiag dagiti marigrigat babaen ti TRAIN? Nu makolekta man ti gobierno ti targetna a P137 bilyon ita a 2018, pagbayadna met daytoy iti utang ken interes nga agdagup ti P309 bilyon ita a tawen a kangrunaan a pagbayad iti IMF ken World Bank. Iti agdama agdagupen ti $72.5 bilyon ti utang ti Pilipinas manipud iti sabali a pagilian segun met laeng iti datos ti gobierno.

Nupay saan pay a naan-anay a maiyimplementar ti nasao a linteg, nariknan a dagus dagiti umili kangrunaanna dagiti marigrigat ti negatibo nga epekto daytoy… NAKARKARO A PANAGRIGAT!

Iti napalabas a bulan, nagsasaruno a naipangato (lima a daras) ti presio ti produkto a petrolyo nga immabot iti dagup a P5.30 – P5.80 kada litro ti gasolina ken krudo ken nangatngato pay iti sidden (kerosene) ken LPG. Kas resulta, simmurot a naipangato ti presio dagiti kangrunaan a gatgatangen dagiti marigrigat nga umili iti inaldaw kas ti bagas, manteka, sardinas, kape, asukar, vetsin, ikan, nateng ken dadduma pay a kasapulan. Ti kalakaan a presio ti 3 in 1 twin pack coffee a magatang iti P9.80 idi, itan ket P12 – P12.20. Nu idi ket makagatangka iti P28/kilo ti NFA rice, itan ket P30-34 kada kilo. Nu idi ket P20.00 ti kada reppet ti sitaw, itan ket P25. Ngimmato met iti abereyds nga P0.80 centavos ti presio dagiti delatas, idinto a 10-20 pesos ti ngimmatoan ti presio kada kilo dagiti ikan ken karne. Manamnama met a ngumato ti pagbayad ti kuryente, danum, plete ken presyo dagiti kasapulan iti panagtalon kas ti abono ken pestisidyo. Nupay nagipababa dagiti kumpanya ti petrolyo iti P1.05 kada litro itay napalabas a lawas, saanen a simmurot a bimmaba ti presio dagiti magatgatang.

Agpayso a maysa kadagiti linaon ti TRAIN ket saanen a maikkatan ti buis dagiti agsusueldo iti nababbaba ngem P250,000 kada tawen ngem dagitoy ket bukbuklen laeng ti agarup 6.2 milyon a mangmangged, idinto a nasurok nga 11 milyon ti awanan trabaho ken nasurok met a 23 milyon ti agkurkurang ti panggedan (underemployed) a dagitoy ti umaw-awat iti nababbaba ngem ti minimum a sueldo. Dagitoy met laeng pakairamanan dagiti minilmilyon a mannalon ti kangrunaan nga agsagaba iti nakarkaro a panagrigat.

Ilaslastog met dagiti alipores ni Duterte a saan kano a maapektaran dagiti 10 milyon a karirirgatan ti panagbiagna nga umili ta adda P200 kada bulan nga ited ti gobierno kas tulong pinansyal. Ngem ania ti magatang ti P200? Ken daytoy ket temporaryo wenno para laeng iti 2018.

Iti benneg ti social services, bimmaba ti budget ti para iti salun-at iti 9.2% (P16.7 bilyon) idinto a dimmakel ti alokasyon para iti imprastruktura iti 27.5% wenno P1.1 trilyon.

Dagiti imprastruktura kas ti rangtay, kalsada, flyover, train system, airport ken seaport ket isu ti maysa kadagiti kangrunaan a pundoan ti gobyerno manipud iti TRAIN. Ngem dagitoy ket saan nga isu ti klase nga imprastruktura a direkta ken kangrunaan a kasapulan dagiti marigrigat nga umili. Dagitoy ket ad-adda nga agserbi a pagakupan iti higante a ganansya dagiti dadakkel a burukrata-kapitalista, burgesya komprador ken ganggannaet a korporasyon.

Kabayatan a laklak-amen tayo ti saplit ti TRAIN, desperado met ni Speaker Pantaleon Alvarez a mangikamkampanya iti Charter Change (cha cha) para iti panagbalin a pederalismo ti sistema ti gobierno. Iti agdama, adda ti dua a singasing a nakapila iti kongreso, ti Resolution of Both Houses No. 8 (RBH 8) ken ti PDP-LABAN Proposed Federal Constitution. Dagitoy dua a singasing ket agpada nga addaan iti napeggad ken kontra-umili a probisyon. Agpada nga ipalpalubosda ti panagbalin a diktador ni Presidente Duterte. Iti Section 6 ti RBH 8, apaman a maratipikaran ti konstitusyon, ti agdama a kongreso ket insigida a mawara ken ti agdama a presidente ket isu ti mangakem iti papel ti kongreso, agingga a mabukel ti pederal a kongreso. Iti Article XVIII Section 12, mabalinna pay nga iyababa iti maysa a tawen ti termino dagiti Commission on Election, Commission on Audit, Civil Service Commission, ken mabalinna nga irevamp ti hudikatura ket isukatna dagiti taona.

Malaksid iti galadna a diktadurya, dagitoy a singasing ket nakalawlawag a managimbubukod wenno para iti bukodda nga interes (self-serving constitution). Iti Article VIII Section 4 ti PDP-Laban proposed Federal Constitution, maiyalud-od manipud 3 tawen ket agbalin a 5 a tawen ti maysa a termino dagiti federal congressmen ken mabalinda ti pabutosan iti nasursurok ngem 3 a termino. Iti met Article VIII Section 18, apaman a maratipikaran daytoy a konstitusyon, amin a sueldo ti Chief Justice, amin a justices ti Supreme Court, Court of Appeals, Sandiganbayan agraman judges iti nababbaba a korte ket SAAN A MABUISAN. Kastoy met laeng ti linaon ti Article XVIII Section 15: ti sueldo ti presidente, bise presidente, presidente ti senado, speaker ti kongreso, amin a senador ken diputado, chairmen dagiti nadumaduma a constitutional commissions ket MAILAKSIDDA ITI BUIS.

Naipalaon pay kadagitoy a konstitusyon ti pannakakissay ti bill of rights wenno nadumaduma a kalintegan kas iti nawaya a panaguummong, panagorganisa, panag-union, panagiwarnak ken ekspresion. Ipalubosna pay ti 100% a panagtagikua dagiti ganggannaet iti daga, aniaman a negosyo a maipasdek iti pagilian, 100% management control kadagiti hospital, eskuelaan, istasyon ti TV, istasyon ti radyo, telekomunikasyon, military reservation ken dadduma pay a napapateg nga industriya ken instolasyon iti pagilian. Iti Section 21 ti PDP-LABAN proposed Federal Constitution ket mapukaw ti reporma nga agraryo nga isu ti esensyal nga aspeto tapno dumur-as ti pagilian.

Dagitoy dagiti sumagmamano laeng kadagiti isyu a sagsagrapen dagiti umili iti sidong ti rehimen US-Duterte. Mainayon pay ditoy ti kumarkaro a panaglabsing ti estado iti karbengan tao babaen iti naranggas a programana nga Oplan Kapayapaan, Oplan Tokhang, ken Oplan Double Barrel. Iti kaudian a datos, nasuroken a 13,000 ti napappapatay iti nakurang a dua a tawen a panagturay ni Duterte babaen ti kampanyana a kontra-droga. Nakalayat met nga ideklara ni Duterte ti Martial Law iti intero a pagilian kalpasan ti pannakaiyalud-od ti Martial Law idiay Mindanao a nagresulta iti namimpinsan a pannakarba ti syudad ti Marawi ken nakapukawan, nakadadaelan ti ginasgasut a bilyon a pisos ti balorna a sansanikua, nakatayan ti ginasgasut nga umili ken nagbakwit ti nasurok 500,000 a tattao nga agingga kadagitoy adu pay ti saan a nakasubli gapu ta awanen ti sublianda a pagtaengan.

Rumbeng unay a malapdan ti agtultuloy a kinaranggas ken tendensya a todo diktador ti rehimen a US-Duterte. Singiren tayo dagiti adu a karkarina idi panawen ti eleksyon. Labanan ti pasismo ti estado ken kontra umili a programa ti gobierno. Ipatungpal ti pudno a reporma iti daga! Ituloy ti Peace Talks! No to TRAIN! No to CHA CHA! # nordis.net

Share

Leave a Reply