Makan a la Pinoy: Camping food

Ni BRENDA S. DACPANO
www.nordis.net

Kadagiti weekends, kadawyan nga agbiahe out-of-town ti anakko nga ag-bouldering wenno ag-rock climbing kas paset ti physical fitness regimen-na ken nakahiligannan. Gapu ditoy, kasapulan ti taraon a balanse iti sustansya, nalaka nga isagana ngem saan a nalaka a mabangles.

Ramen ti tapa a lomo ti baboy. Photo ni Brenda S. Dacpano

No agkurang iti panawen nga agisana iti balon, gumatang laengen isuna ti burritos, Mexican flat bread a tortilla. Daytoy ket kasla lumpia a dakkel a napaseksekan ti innapuy, nail-ilgat a tinuno wenno nagisa a karne ti baka wenno manok ken naanger a bukel ti utong ken nadumaduma a nateng. Praktikal daytoy a balonen ta saanen a kasapulan ti pinggan wenno kobiertos.

Mabalin met nga iluto wenno igisan dagiti ipaseksek iti tortilla ngem imbes a tortilla agursar ti letsugas a kasla Korean samgeopsal.

Inlambong nga itlog ti kasimplean a balonen. Ngem no adda paglutuan a balonenyo, mayat met nga iluton idiay camp site kas omelet a nalaokan ti nadumaduma a nateng wenno nagadgad a keso.

De lata a beans ken karne ti kabiitan ta saanen a kasapulan a lutuen ngem no adda kabalinanna ket nasaysayaat met laeng no maipapudot ken napudot ti maipauneg.

Kadawyan nga adobo a karne ti lutlutuek nga ipabalon wenno tapa a karne. Adtoy man ti mabalin a padasenyo a tapa a mabalin nga iluton sakbay kayo nga agbiahe wenno mailutonto iti camping area. No ilutoyo iti campsite nasaysayaat a maipamaga/maibilag bassit ti tapa sakbay nga ibalkot. Ngem gapu ta inlutokon ditoy balay, babbabassiten ti iwana tapno saanen a kasapulan a puted-puteden/iw-iwaen pay iti bite size pieces no kanen idiay campsite.

Ramen:

1 kilo lomo (baboy wenno baka), iwaen iti naingpis
½ kutsarita paminta a narumek
¼ – ½ kutsarita a sili a pulbos (optional)
1 ½ kutsara asin
2 kutsara asukar, brown
1 sibuyas, paste wenno tinadtad
3 ngipen a bawang, paste wenno tinadtad
3 kutsara soy sauce
2 kutsara a suka
1 kutsara anisado wine wenno cooking wine(optional)
Mantika a pangprito

Panangisagana:

1. Buguan ti karne, paik-ikan. Iw-iwaen iti naingpis.

2. Ikabil ti karne iti ziplock plastic wenno regular a cellophane bag. No maikabil iti kastoy a bag, nalaklaka a mayuper iti marinade wenno curing solution ta saanen a kasapulan a kiwarkiwaren, ibalibalikid laengen ti plastic bag.

3. Ilaok ti dadduma pay a ramen malaksid iti mantika. Paglaoken amin a ramen ken iserra/sigloten ti plastic bag.

4. Iyuper iti 2-3 oras wenno agpatnag ken balikidin sagpaminsan.

5. Iprito iti mantika. # nordis.net

Share

Leave a Reply