Commentary: TRAIN ni Duterte, parigat ti umili

By TIMPUYOG ITI MANALON TI KALINGA
www.nordis.net

“TRAIN ni Duterte… parigat ti Umili”. Ngumatngatngato a presyo dagiti gagatangen (ti marigrigat) iti palengke ti Tabuk narikna, karo ta di met mabinnat ti bassit a kwarta…la unay a kumarkaro latta a panagrigat. Ti Tax Reform for Acceleration and Inclusion (TRAIN) ket naaprobaran ken epektibo idi Enero 2018.

Napalabas a tawen, iti palengke ti Kabisera ti Tabuk, magatang ti maysa reppet nga utong kas kadakkel ti takyag iti P20.00 inggana 25.00, maysa reppet ti kangkong iti P10.00 inggana iti 15.00, maysa reppet a pako iti P10.00 inggana 15.00, ay na ta nagrugi ita nga Enero ket nganngani doble dagiti presyo ti natnateng, kas iti pako ni Nanang nga innala na idiay igid ti karayan. P15.00 inggana 20.00 ti ngimmatuan ti presyo dagitoy a kadauyan a lako a natnateng iti palengke.

Maysa malem a napan nagpalengke, dinamag iti maysa nga aglaklako (suki) nu apay a bigla a ngimmato ti presyo dagiti natnateng idinto ta nalaka idi napalabas a tawen. Ti dagus a sungbat na ket “gapo iti naaprobaran a linteg (TRAIN) ni Digong”. Dinamag manen nu ania ti TRAIN gamin, ket kuna ni suki, “a dayta man panagkikil da kadatayo a marigrigat laksid nga nangato a sigud dagiti babayadan a buwis(et)”, ni Nanang nakaungeten.

Awan ti mangngeg a sasao nu adda ka iti palengke nu di “ayna nangina”…mano tawar na “ay awan adeng ta isu ti pinanggatang ko”…daytoy ngay sibuyas “5 piso ti maysa” kasla kadakkel ti buwa.. nangalawngaw a kasla ariwawa ti train a kanayon madadael iti pasdek ti EDSA. Bassit ti nagatang ti sangagasut a kwarta nga umanay laeng a pangrabii.

Kasta a dagus ti epekto ti TRAIN a pakabuyaan ken mangpanpaneknek a saan a para iti marigrigat nga umili daytoy a linteg nu di ket paggatgatasan dagiti sigud a babaknang nga akinkontrol iti agraraira a sistema ti negosyo.

Nakadanun iti balay a pagnanaedan apagtugaw bassit tapno unnaten ti likod, madama ti padamag iti telebisyon a ngumato manen ti gasolina ken krudo iti 0.50 – 0.60 a sentimos…buwiset nga talaga. Agasem lima a daras (ti malagip) a ngimmato ti petrolyo manipod laeng Enero itatta a tawen 2018. Whew…ania ngayen ti ipainom ko iti motor ko nu kastoy.

Daytoy kadi ti ipapaay ti administrasyon ni DU30 iti umili a Pilipino? Kurang laeng a dua a tawen a nagtugaw ni Pres. Duterte ket naaramid nan amin ti kayat dagiti ganganaet a kapitalista ken imperyalista a nasyon babaen iti awan pugsat a panag-utang iti dadakkel a gatad a dolyar; panangaramid kadagiti linteg a mangpakaro iti rigrigat ti Pilipino; panangipalubos kadagiti military ti US ken adu a ganganaet a negosyo a sumrek iti Pilipinas tapno pespesen ti kinabaknang… aguray ka, dagitoy gayam ti ipukpukkaw ti umili nga “Imperyalista ibagsak”, “Burukrata kapitalista ibagsak” ken “Pyudalismo ibagsak”. Wen ibagsak dagitoy a ramut ti problema iti gimong a Pilipino. Rehimeng US-Duterte Ibagsak! # nordis.net

Share

Leave a Reply