Poetry: Biag ti saan a mabigbigbig a bannuar iti aw-away

Ni RENE BOY E. ABIVA
www.nordis.net

Idi kaub-ubingko
ti kaay-ayamko
urbon a nuang
kumpay ken arado.

Dagiti kabusor ti dasigko
nakaro panangsugatda iti bukotko
gapu iti kinaranggas ken kinaagumda
pinagbalinda a kas talon a naarado.

Ti daga a natawidko
inagum pay ti buksitan nga apu-apo
mainayon pay dagiti natatangsit nga usurero
a nangpabaklay nakaro nga interes iti utangko.

Uray dagiti sumagmamano nga aglaklako
iti bin-i, abono ken pestisidyo
pinakaroda ti panagrigrigatko
gapu ta madi pulos a masukdal dagiti balor
ti inda ilaklako.

Uray la limmukay dagiti tumengko
agpipikel ti intero a laslasagko
kasla agkarkarayam dagiti timel a rinib-ribu
nagatel, naut-ot ken napanaasen ti panaka-adipenko.
Iti unos ti panagbiagko
simmikkil ken immirut ti pannakatagabok.

Ala ket napanak idiay sentro
nagbiroknak ti baro a trabaho
pinetpetak ti maso
nagmason, nagpiyon ken nagkarpentero
ket saan a nagbayag, inikkatnak ti amok!
agkissayda kan ti tao.

Ada met nasapolko, piman
nagkargadornak idiay pabrika ti sigarilyo
ngem napalalo
laksid iti nababa a pasweldo,
naramanak pay ti adipen a panagtrabaho!
iti kasla sarwada a panagtrato
pa-obrada’t atiwmi pay ti kabalyo
dagiti ling-et ken katayko,
naiwarsi iti aglawlawko
ket permi ti as-asugko
Amin a nagrigatak,
Sinultop dagiti sitatao nga sairo!
ania ngata ti aramidek itattan?
Saludsodko ken ni Apo.

Arigkon ti maysa a ruot
a nangango ken aliston a mapag-ot
kararuak agsasarunoda a rinaut
naburbor ken gimmalis
a kas saluyot,
inaribungbongan pay dagiti kuton a kasla tagapulot
napukawen ti kinataok
iti maysada a puyot.

Datoy kinarigatko a nagsisirot
nagpatpatnag a nagsangsangitak gapu iti ut-ot
kasla nabalkotnak iti agbegbeggang a lupot
mapespespes pay itoy maymaysa a panunot
ngem inkarigatak ti nagmulagat!
ala ket nakigtotnak iti nangngeg ken nakitak.

Ti nalawa nga umili iti aglawlawko
dagiti padak a saan a naisab-sabali
nangngegko dagiti nalinteg a kiddawda ken pakaasi.

Ket padak isuda
a madida pulos makaluksaw iti napuskol nga adigi
gamin, pannakaadipenda ket maiyarig iti nabartek a maipar-parusisi.
Kasla darat iti kinaaduda!
kasla baybay iti kinalawada!
agpaypayapayda a kas agsisinniplag a ledda.

Ngem nadur-as ti kapadasanda
kasla ni Kristo a nailansa
suminit a bisin ket sinagrapda
kasla natikag a talon iti karabukobda
makatitileng dagiti as-asugda
ken nagtedtedted dagiti nangingisit ken napapalet a darada.

Ngem nakakaskasdaaw ta madi pulos nga agmaga
panawenen! kinunada
inlayatda dagiti nalasagan ken nauratan nga im-imada
ken inyibbayugda
ala ket sisasaganada a mangrebba
kadagiti landok ken balitok nga adigi
aginggana a dumaga.

Pirmi ungetda!
idissuordan ti naindasigan a didigra
gubat iti umili! Pukkawda
dalapusendan amin a patengga
arigdan ti maysa a nabileg nga armada
a mangisayangkat iti panagbaliw a nalabbaga.

Sapasap iti amin a padapada
dagiti kawar iti tunggal maysa
a nangpairut iti kasasaadda
pugsatenda!
ken mawayawayaan dagiti padada.

Itatta, naamiriskon
tiempon tapno tumiponakon
kadagiti kadasigko. #nordis.net

Share
« «  Burburtia Krokis   |   Makan a la Pinoy: Coleslaw  » »

Leave a Reply